Galuh Langkar Bapupur Dingin

Kusah bejudulan gin dah

"Uy, urangnya! Napa nih bajualan kadida urangnya nang manjaga, kalo unda putiki heja, neh. Unda tinggalakan kada usah babayaran." ujar acil Peah bemamai di warung pelataran rumah Imay.

"Hadang dulu cil kaasikan manyanga iwak cil ai ulun didalam nah. Handak manungkar apa pian? Mama tulak yasinan pang tadi." sahut babinian nang didalam rumah. Babinian nginih kada acil-acil lagi sidin masih babujangan balasan tahun hanyar sakulah SMA, kalas barapa takuni surang.

"Iyakah, bah cucuk ja pang dikiyaw-kiyaw sing tadian kada sing cangulan, sakalinya panunggunya mejeng. Aja nah May unda handak manukar galapung satangah kilu duwa gula saparapat."

"Hadang cil ulun maambilakan."

"Assalamualaikum!"

"Waalaikumsalam."

"Nah, satumatnya pian tulak ma, rajin sawat barandam dulu, dicarii abah hanyar taangkat baburitan." si Imay bore takaluar.

"Nyawa nih lah mudel unda tulak nih marumpi kaya rajin tuh ih, kuitan nih tulak babacaan bauntung batuah ai." sahut acil Enor umanya Imay.

"Ayuha barangja dah, Ma, ai. Nah, Cil tukaran pian. 9ribu Cil, ai." ujar Imay sambil maunjuk tukarakan acil Peah.

****

Uma bungasnya ih lakian nginih, pinanya murid hanyar pang, nah. Napang saragamnya pina malaini umat.

"Ay.. ay ikam tahulah andakan ruang kapala sakulah dimana ha?"

Astaga naga, sidin managur badahulu lawan unda sakalinya. Haduh lamas lintuhut timbul nah ih. Kayapa nih.

"A a anu di sana tuh nah parak kalas 2 dihiga lab komputer." han kalo saking galudupannya jantung bapandir ja galatiran gagap-gagap. Manunjuk ja jua kada karuan tampuh asal tunjuk ja.

"Kawalah ikam ja yang maantarakan aku, lah lah lah."

"Emmm... iih ayuha."

"Anu nama ikam siapa?"

"Namaku Imay, ikam pang bungas? Eh.

"Hha, namaku..."