Nta li silve, chi mille e mill'anni fa cummugghiavano li terri narré lu munti di focu, Muccu, figghiu ri Lucco lu longu, e Ifriddu, lu cavaddu amicu di iddu, scavavanu nu fossu pi ntumularici Cuzzi, la chiù sperta di li vulpi, la quali avianu volutu beni assai. Avianu viaggiatu pi simane ntere di na punta à l'autra di l'isula picchì Muccu avia promisu à li cristiani du so villaggiu chi nun fussi turnato ncasa senza purtari una di li spati chi stannu dintra li balatuna di la montagna du focu. Ifriddu e Cuzzi lu accumpagnavanu, picchì sempri aviano statu stati amici d'iddu chi un ammazzava l'armali, di chisti un manciava la carni e di la pedde d'iddi un si facia robbi. Li cristiani du villaggiu di Muccu un ci dunavanu assai cunfirenza ma nimmenu lu tinianu a distanza: pi farla curta pinzavanu chi fussi nu stranu picciottu ma chi un fussi accusì stranu chi un putia manciari cu iddi. Un jorno arrivau a lu villaggiu ri Muccu nu cristianu vistutu comu na fimmina, ma chi c'avia a lu cianco na spata rossa chi paria chidda di Frumu, lu ranni omo. Stu cristianu rissi chi pallava pi li putenti Crali du Nord e cuntava chi chissi in du luni avissiru abbruciatu tuttu lu villaggiu e si s'avissuru futtutu tuttu chiddu chi si putianu futtiri. Chissu rissi dd'omu e si n'jiu. Pi comu era cunsidiratu Muccu di tutti l'autri cristiani, tutti quanti si maravigghiaruno quannu iddu riciu sulenni chi c'avissi pinzatu iddu a vardari lu villaggiu, partennusi pi la muntagna di focu. Docu vivianu cristiani chi sapianu nesceri di li rossi balati di la muntagna spati chi un si putianu scassari, chiù duri di l'ossa di vacche. Cu chidde avissiru vardatu lu villaggiu da li Crali du Nord! Muccu avia à turnari prima di la sicunna luna i l'isula iera paurosa pi cu partia alla ventura nmezzu a li so silve. Nuddu di lu villaggiu vulia aiutare Muccu, sulu li so amici armali, Ifriddu i Cuzzi. Assemmola avianu camminatu pi iri dunni lu suli nasci à matina, dunannu e spaddi a dunni s'affuca nta lu mari. Un c'era na trazzera gnosciuta ri secuere e nuddu di chidda ginerazziune prima d'iddi avia mai pigghiatu la strata pi l'est. Di chissu sulu cunta binianu, tràditi da li patri à li figghi. Cunta chi pallavanu di villaggi nmenzi, chini di cristiani di tutti li razzi chi vivianu nta l'abbunnanza e chi sapianu nesciri farci, zappi, aratri, frecci e spati di li petri e di balati chiù ranni. Comu facissiru un si sapia. In chiddi simani di viaggiu Cuzzi la vulpi avia cunzigghiatu bonu à Muzzu. C'avia nsegnatu quali fussiru di li chianti nove chidde chi si putianu manciari pi nteru, chidde chi avianu sulu li rarichi boni di manciari, a attruvari l'Orienti senza taliari lu suli e puru la notti, aisannu l'ocula a lu cielu e mirannu a li stidde. La vita nmezzu li selvi era camurriusa: puru si c'era Ifriddu chi tinia luntanu cert'armali ca lu so nitritu i ca la vastizza du corpu so, c'era quarchi armalu chi un si scantava. Ri chissi Muccu ci ia ca diplommazzia, picchì iddu un ammazzava nuddu, picchì ntutti l'armali c'era n'arma. Tutti i boti chi na visina s'avvisignava, Muccu ci pallava (iddu nfatti sapia tutti li lignui di l'armali) pi persuadirla a irisinne. Spessi voti c'arinisciva, cacchi vota c'avia à pinzari Cuzzi a falla scantari cu li so denti o Ifriddi chi li so zoccola. Contra lu lupu sulitario, però, un ci potti nuddu di iddi tri e Cuzzi ci iù di mezzu lassannu sta vita. Li cristiani du villaggiu, prima di partiri, avianu dunatu a Muzzu nu cuteddu d'ossa, beddu filatu, ma iddu lu adoprava sulu pi tagghiari fronni e rarichi. Dda vota si n'appe à fuiri ncurrennu, pi la prima vota sopra lu groppuni di Ifirddu, cu lu curpiceddu ancura cavuru di Cuzzi ammezzu li vrazza. Muccu chiancennu pinzau chi si fussi statu n'autru cristianu, di chiddi chi accirinu e cummattunu cuntra l'armali, lu so amicu fussi statu ancora cu iddu, nmezzu li vivi. Prossimu à la so meta, puru si un lu sapia, ammucciatu fra l'arvuri e di la nebbia, nta lu fossu scavatu, Muzzu e Ifriddu dunaro arré nu issiri, nu amicu, à la matre terra. Na cosa mai viruta avia succirutu: chi nu cavaddu si mittissi supra lu gruppuni nu cristianu. Fu n'eventu novu e rivuluzziunariu, ma la causa di chistu avianu statu la morti e lu scantu e quannu Muzzu acchianau n'atra vota supra Ifriddi, pi cuntinuari lu viaggiu puru a chistu pinzava.
