مريم بنية صغيرة عمرها 9 سنوات .. أهلها خير من الله بس ماعدهم لكمه ينطوها ، هاي الحجاية اللي تنكال على اللي يزوج بته هي وصغيرة ، وفعلا زوجوها بهذا العمر ، العمر اللي لازم بيه كل بنية تتفرع للدراسة وتثقف نفسها ، ومن وجهة نظري طفلة بهيج عمر متتحمل مسؤولية تصرفاتها ، فشلون تتحمل مسؤولية رجال وبيت بأكمله؟؟
تزوجت مريم وسكنت عند عيالها ، وعاشت حياتها مابين رجل اغتصب طفولتها ، ومابين ظلم العيال اللي بمجتمعنا اغلبهم يعتبرون الجنة خدامة بالبيت ، ومن كبرت مريم وصار عمرها 14 سنة حملت وجابت بنية وزادت مسؤولياتها أكثر .. من صار السقوط وصار عدنه قنوات تلفزيونية يرسلون رسائل بشريط القناة للتعارف ، بلحظة ضعف حبت تجرب مشاعر الحب ، وتعرفت على شخص ضحك عليها بكلامه المعسول وطلب منها تهرب وياه من بيت عيالها ، وفعلا هربت من ظلم إلى ظلم اكبر .. ضحك عليها وخذاها باعها لبيت دعارة ، وظلت تشتغل بالدعارة حدما تم القبض عليها هي واللي وياها وانسجنت ثلاث سنوات ..
عرفوا أهلها بالخبر ، قرروا التكتم عالموضوع لحدما اجه يوم اللي طلعت بيه ، خذاها اخوهة وزورها الكاظم ( عليه السلام) ، كلتله خوية مشتهية كباب شوي .. خذاها لمطعم واكلت كباب ، واجه وقت اللي ترجع بيه لبيت أهلها .. خذاها بطريق صحراوي كلتله
: خوية وين مودينه؟؟ هذا مو طريق البيت؟؟
:هذا الطريق مختصر ..
اخذها أخوها وقتلها ، فرغ عليهة رصاص الرشاشة وتركها بمكانها .. بعد التحقيقات تم إلقاء القبض على الأخ وسجن ستة اشهر فقط وطلع بعدها لان هاي القضية تعتبر قضية غسل عار !!!
أما الأهل فرفضوا استلام جثة البنية ، واخذتها البلدية دفعتها !!!
.
.
سؤالي لكم
من المذنب ؟؟؟ الاهل اللي زوجوا بتهم بعمر صغير ؟؟ لو البنية اللي مكدرت تتحمل ضغوطات الحياة
