يوميات انتخابيه (٢)
صيدلي في أواخر الاربعين من العمر .. قابلته في إحدى الزيارات الميدانيه على الصيدليات .. كان بيحكي بحُرقه .. ناقم عالمهنه كلها .. بيشتغل بالنهار في مستودع أدويه وبالليل بيداوم بصيدليه ..القصه فين؟؟ انه جرّب فتح صيدليه .. إنما خلال سنه ونص إنكسر .. تراكمت عليه ديون بخمسين ألف ... إضطر يبيع الصيدليه بثلاثين ألف ويتداين الباقي عشان يسد المستودعات ...
روّحت متضايقه عليه يومها .. من حقه يحلم يكون عنده صيدليه خاصه فيه .. بس في اشي غلط هون !! سنه ونص وتراكم عليه هالقد مبلغ كبير ؟؟ مزبوط احنا صيادله مش تجار .. إنما لما بدك تعمل مشروع حياتك .. بدك تفكر كتير بالمكان والكيفيه وتعمل جدوى اقتصاديه .. حرام اللي عم بيصير مع كتير صيادله .. بيحسبوها غلط.. بيتمقلبوا بالخلو العالي والايجار الكبير .. بابين ومخزن وسدة وقصص..
أكيد الرزقه مكتوبه .. والحمد لله .. إنما هذا لا يغني عن (إعقل وتوكل )..
نرجع لزميلنا .. اللي قلبه يعتصر ألماً.. على الفلوس اللي ضاعت والحلم اللي ذهب أدراج الرياح.. خلينا نتعلم منه انه ما نتسرع .. نختار موقع صح.. وما تغرنا الديكورات .. ولا نرضى بالايجارات الخرافيه وبعدين نقع على رؤوسنا طَبْ.. بلاش نتهور بشراء بضاعه كتيره .. تتكدس بعدين بالصيدليه ويطلع لنا شبح الإكسبير .. !!
وتستمر جولاتي .. الله يوفق الجميع..
#يوميات_انتخابيه
#فريق_الهمة_الصيدلاني
#بالهمة_نحييها💪💪💪
