#كحل_عرب
(الفوضى)
((( بقلم زينب ماجد )))
الحلقة_51
(غيرة حمزة)
انسى حزنك... لايحن حزني
او على عناد الحزن يازين غني
حتى اصيحن:
ياحسرتي اتباعدي
او يابسمتي الضاعت تدني
آآخ مني..
او آآخ من روحي الكضت هذا العمر ..
بس بالتمني.
للشاعر الكبير (عريان السيد خلف)
طب عباس من برا جاي ، للغرفة حتى ينام على المبردة ، الاء نايمة ، تمدد بالكاع خاطر ينام ، صدت الكارتونة كدامه ، كضاها ، فتحها ، باوعها .. عرفة كارتونة مال موبايل ، فز من مكانه وهو ياخذ الكارتونة : يممممة ، يمممه
- هاااا
- ياهو الجايب تليفون من هاذ الجديد
- محد ياهو العندة يشتري ؟
- جا هاي الكارتونة المن ؟
عقدت حواجبها : خاف من برا جايبينها الجهال
- بيها هاي مالتها شني شوفي الواير
- شمدريني يا امي ، امشي كعدت اختك الخاتونة خل تطلع تغسل الحوش حتصير بالعسرة وهي متوثة نوم بهالغرفة .
مشى للغرفة وهو يرفس الاء : هييي الذبانة .. هوووووي
- شنية لا ترفسسسسس
- اوجعية كعدي يلا خل انام بمكانج امي تريدج
- ما اريد وخر خل انام
تحركت ادور لذيج الجهة ، لمحته وهو كاض الكارتونة بساع كعدت بس ما كلتله شي ، سويت روحي انزل بثوبي ، بس خفت الرجفة كضتني واني اتحسس الموبايل .. ناسية روحي بنومتي .
وهو يصيح : دكومي يلا
ويشمر بالكارتونة ع الميز ، الجهاز بصدري ما طايح الحمد لله ، شلون نسيته هي لو متزحلك جا علكوني .
كمت من المكان واني عيني على الكارتونة، هو نام بمكاني ، عفتها ما خذتها كدامه خاف يشك ، عباس رغم زغير بس حيل نبيه وكلش شكوكي .
طلعت امي اتلكتني باوامرها: نايمة ما تكعدين اني وحدي كومي عاوني كومي اشتغلي ولب لب لب ....الخ
عفتها ورحت للتواليت، سركيت الباب وطلعت الموبايل ، ماكو اي اتصال ، اي همزين هاذ احسن من ذاك الموبايل يدك هواي ، حطيته بصدري وطلعت ، صدت بوجهي نانة ، باوعت للحمام : شو الحمام ناشف
- وشكو
- اشجنتي اتسوين اذا اديج والحمام ناشفة
- اطكطك بعصاجيلي عص عص عص عص
- خو زن زن زنننننن
:- يييييييي
عيبت بس ضل ابالي لا انوب كل مرة تنعاد ويشكون بيه عدي شي لو يراقبوني .. طلعت بلا ريوك اغسل بالحوش واني افكر بهالمصيبة الجابها اليه ، اشلون بالله اظل حاطته بصدري ؟
