عانس!
كلمة اكيد عدت علي بنات كتير اوي. كلمة فيها تقليل و تحقير من الانسان اللي قدامك. كأنك بتقوله انت زيك زي اي علبة جبنة بيضا مرمية في التلاجة و صلاحيتها خلصت خلاص. بس انا عندي سؤال محيرني اوي بصراحة: لو الانسان ليه تاريخ صلاحية فعلاً، فليه تاريخ الصلاحية دة بيطبق علي الست بس؟ ليه مايعيبش الراجل انه يفضل من غير جواز بقية عمره لاكن تبقي مصيبة لو بنت قفلت التلاتين من غير جواز؟
يعني انا عمري ما شفت ولد كل ما طنط شكرية صاحبت امه تجيلهم تقله بابتسامة صفرة: مش هنفرح بيك بقي يا حبيبي؟ 😊
ولا شفت ولد كل ما يروح فرح ام العريس تقوله و هي بتمصمص شفايفها: معلش يا حبيبي، بكرا ربنا يعدلهالك. 😏
طب سؤال تاني: ليه الناس ممكن تتقبل ان بنت تتجوز واحد اكبر منها بعشر سنين، لكن لو العكس حصل يقولوا دة ايه الولية المخبولة اللي واخدة عيل من دور عيالها دي؟
عارفة ليه؟ لأن انتي موقفتيش لطنط شكرية و قلتلها: انا عندي 100 حاجة في حياتي افرح بيها غير اني اجيب لنفسي بلوة تترمي قدام التليفزيون بالساعات و تقعد طول اليوم تحش في بطاطس محمرة! مقلتلهاش انا عندي شغلي و اصحابي و دراستي اهم من وائل ابن حضرتك اللي عين الب امه عنده شقة جاهزة من مجاميعه. ما قلتيش لأمك (طنط ام الموكوسة) و هي عمالة تمدح فيكي و فنفسك في الطبيخ قدام ابن خالتك اللي بيشتغل في الامارات: انا مش غسالة اطباق بتقولي للي هيشتريها انها full option! جري ايه يا حجة ما تديله ضمان سنتين احسن!
كلنا عندنا 100 طنط شكرية. في البيت، في الشارع، في الشغل، في كل حتة و كل وقت فيه طنط شكرية. فيه ناس ماعاشوش حياتهم ولا حققوا هدفهم فمن مصلحتهم انك تبقي زيهم عشان ميحسوش ان هم بس اللي عدي عليهم الزمن و طلعلهم لسانه و قالهم راحت عليك يا حدق، علي رأي فؤاد المهندس. ما يحسوش ان هما بس اللي عمرهم عدي من غير ما يعملوا لنفسهم قيمة. بيستخدموكي عشان يثبتوا لنفسهم ان هي دي سنة الحياة.
اتجوزي و خلفي. بس دايما حطي في دماغك ان جوزك دة ممكن يسيبك و ولادك مسيرهم يعيشوا حياتهم هما كمان و يسيبوكي و تبقي لوحدك. مش هايبقالك غير نفسك! حاولي تصونيها و تحترميها عشان هي الحاجة الوحيدة اللي بقيالك. ما تستسلميش لأي حد يحاول يقنعك ان حياتك متوقفة علي راجل، و قاومي اي حد بيقولك ان حياتك هتبقي احسن لما تخدي لقب مدام. متقبليش حد مش عاجبك لمجرد ان كل صحابك اتجوزوا إلا انت. متحسيش انك ناقصة حاجة عشان لسه ملقتيش ابن الحلال. متدوريش و متسمحيش لحد يدلل عليكي لأن نصيبك ربنا هيجبهولك في وقته. ما ترضيش بأي حاجة، عشان انت مش اي حد.
سلامه عليكوا
أنت تقرأ
سلامه عليكوا
Юморانا عارفة ان wattpad معمول عشان القصص و الروايات بس برضه مافيش مانع نزود عليه المقالات كمان. هي مش مقالة اوي يعني بس تقدروا تقولوا عليها وجهة نظر واحدة في كل اللخبطة و الاحباط و العك اللي احنا عايشين فيه دة. اتمني ان el blog تعجبكوا وتتابعوها. سلامه...
