اطلكت من قتيبه وهو مكان عندة اي اعتراض
ولكن شرط عليه انو بنته متطلع برة العراق لان كان يعرف بيه انو اني طموحي اسافر واحب اسافر لان صراحه بعد فترة من زواجي كنت مضايقه من وضعي فردت اسافر لتركيه يم عمتي ولكن هو رفض وانتهى هذا الشي مثل كلشي يريد ينهي قتيبه بكلمه
المهم كان شرطه ماااسافر وانو كل اسبوع يجي ياخذه بنته الصبح يجبها بالليل واذا ماوافقت ياخذها مني فااني اضطريت اوافق مكنت اريد احرمه من بنته بس اضطريت اوافق على فكرة انو منعني من السفر
المهم انو
كام يجي ياخذ بنته وكمت عادي اشوفه واسلم عليه وكلش طبيعي ومافد يوم حجيت عليه كدام احد ابدا ولا راح يجي يوم احجي عليه لان العلاقات اخلاق واذا انتهت علاقتنه الزوجيه مو معناته انتهت اخلاقنه اني كنت وحدة من الي ارفض انو المراة لمن تطلك تكعد اطلع عيوب الدنيا بطليقها او حتى انو الرجال يظل يحجي على طليقته
اني لمن كانو يسئلون شنو سبب انفصالكم جنت اكول متوالمنه مااتفقنه قسمه مومعناتها طلعت من بيته راح اطلع عيوبه واكشف الستر عن بيته ولهذا السبب اني حتى من بعد ماانفصلت عنه ظليت احترمه وللحقيقه انو اني احبه بس مو كلشي نحبه لو نريدة ممكن يكون النه اكو هوايه شغلات نطمحلها ونسعى حتى نوصللها ولكن منطولها ولا نكدر نكمشها او تكون بدينا بس منعرف نحافظ عليها او منعرف نتعايش وياها لاتصورن كل نهايات الطلاق سبب نهايت الحب بعض حالات الطلاق مليئه بالحب ولكن ايضا يكون بيها انفصال بعض الاحيان نفكر انو كافي نعذب نفسنه او كافي نجرح مشاعرنا وكافي ندوس على كلبنه ولكن احنا بالحالتين نتألم وبالحاليتين دندوس على كلبنه ومرت سنه على طلاقي حاولت ارجع للدراسه
ولكن صارت بعض العوائق الي منعتني
وفكرت بالسفر لان اني مكنت دالكي نفسي بالعراق وكانت عندي عمه عايشه بتركيا هي سافرت التركيه من زمان كلش
واستقرت هناك ولدها وبناتها دخلو كليات والي منهم اشتغل والي منهم ازوج واني قررت اروح يمها وكان عندي عائق اخر وهو قتيبه لان كان من ضمن شروطه انو مااسافر خارج العراق
واني وافقت فهسه مااكدر اعترض ولكن قررت اجازف لان اني انسانه تؤمن باان الحياة في بعض الاحيان تطلب المجازفه وعن طريق والدي ومعارفه طلعت جواز سفر بدون موافقه منه طلعته لفردوس
ولكن للصدمه انو بعد
خمس تيام اجه قتيبه كلي شوفي دلفين اني احترمج وانتي ام بنتي
وحذرتج كلتلج فردوس متاخذيها وطلعين خارج العراق ولكنج بكل عين كويه رايحه مطلعتلها جواز
شعبالج اني مااكدر اعرف اصلا انتي وفردوس ممنوعين من السفر ومسافرين الاموافقه مني سمعتيني زين
وكلي شوفي اكلج غلطه ثانيه ويايه اندمج
واخذ منج فردوس واخليج تحلمين اشوفية وايضا قبلت ورضيت بلاامر الواقع
ومرت فترة على سالفت السفر وبخلال هاي الفترة قدمت خارجي سادس ودرست ونجحت
ونويت ادخل كليه بوقتها والدي والدتي كلش شجعوني على الفكرة والدتي كالت فردوس تبقه يمي من داومين ودخلت كليه قانون ودوامت والحياة متخله من روابط الماضي ومفاجئات الحاضر
يتبع......
#الكاتبه #روجمان
