-الو
=الو
..
سكوت تام
..
=مين معايا
..
بيرد القلب من جوه
معقول ممكن يكون هو
..
-ازيِك
=مين
-انا 'يٰس'
=اه ازيَّك
-تمام وانتي
=كلوا تمام
..
*سكوت تام *
..
عدي ثواني و ثواني
ومحدش بيكلم التاني
فهمت انو بيعيط
وان دموعوا هتهيج
بدات تقلبها تهريج
و صوته اصبح تشويش
.
='لسه بردو غاوي حشيش
لسا بتسقط ف الجامعه .؟!
ايه مش سامعه '
.
بيضحك ضحكه مكتومه
..
-انا دلوقتي بقيت دكتور
= ياعم خلي الغطا مستور
علي مين بس ياسي الدكتور
سيب المداري و بلاش يبان
-صحيح انتي بقيتي فين .؟
=انا دلوقتي دكتوره اسنان
وانت..؟!
-انا دلوقتي دكتور قلب
=مع انك محبتهاش يعني
-قررت اداوي قلوب الناس
من ساعة ما بدأ يوجعني
= ايه مالك بعد الشر
-لا مفيش حبه وجع
فالخيط كَر
= ايه عندك حاجه كمان
اوعي تنسي اني دكتورة اسنان
-الا قوليلي يا دكتوره
ساعات الوجع مش بيبان
مش ده صحيح ..؟!
=لو الفرشه بتعملك تجريح
استخدم سواك خام
..
*سكوت تام *
..
فهمت انه بيلمح
لقلبه اللي سابته متجرح
..
-الفرشه مش بتجيب الجرح
لا بتعرف تنضف و لا بتلِف
وانا جرحي رغم سنيني
لسا بينزف مش بيخف
=مش عارفه يا (يٰس) والله
بس المفروض و الجايز
ان انت ف الاصل مش عايز
تداوي جرحك بأيديك
فين اللي كانوا حواليك
مهم بردو زيي سابوك
وانت فضلت و بقيت
مش انا لوحدي اللي اتخليت
..
اصبح هنا بقي موجوع
من اول دخولها ف الموضوع
..
-كلام ف منتهي البلاهه
ايه يا دكتوره مدرستيش
حالة ف الطب اسمها "العاهه"
ولا نسيتي الطب بالايام
..
*سكوت تام *
..
والمرادي طَول
سير المكالمه هيتحول
ما بيت الصمت و الحيره
وبين الحب و الغيره
و شوشره بين الاصوات
بداو الاتنين بعياط
...
=علي فكره لسا بشوفَك ف الاحلام
..
*سكوت تام *
..
-انا من بعدِك عايش و السلام
..
*سكوت تام*
..
-مش انتي تمام
=ايوه تمام
-طب يلا سلام
=ماشي سلام
..
*سكوت تام*
..
#محمد_بدوي
