#لأني_أحببت/ 2
رواية_حب
ناديه @
...
#لأني_أحببت بابا أخذه مني القدر ..
#لأني_أحببت إخواني عشت حياتي كلها تضحية لأجلهم وحرمان وأيثار وهملت نفسي ونسيت أهتم بمظهري وحالي ...
..
كل يوم وكل شهر وكل سنه تمرّ عليه بحياتي عذاب ومرار وحزن
.. تحملت وكابرت وماتأثرت ولاضعفت گدام المصاعب بحيث عشت أكبر من عمري ..
آثرت على نفسي إخواني
وكنت ما اعتني بمضهري الخارجي أبد
مبهذلة حتى شعري مالحگ أرتبه لو أسشورة واسوي تسريحات تليق بعمري وتناسبني
كلشي بيه بسيط وعادي
اصلا ماحب اهتمام من أحد ولا تجذبني سوالف البنات من إكسسوارات ومكياج ومياعة ودلع
ألبس على الأكثر بنطرون لو تراك عريض وبالمدرسه صدريه وقميص ردن طويله
ومشيتي عاديه ماأتصنع بيها
بس شيرين كنت اهتم بيها بشكل خاص وامشطلها واسويلها تسريحه حلوه وملابسها ثياب قصيرة وبدلات كأنما لعابتي المفضله واهتم بيها أكثر من نفسي وإداريها
وهيه عندي ملاكي وروحي واشوف بيها اللي ماشفته بنفسي من طفولتي ولا حصلت عليه من الدنيا
.....
بعد وفاة بابا بعطله نص السنه واللي صادف بعد زواج نور الدين وضيّ
تغيرت هواي أمور بحياتي للأسوأ
الصدمه قويه جانت ودمرتني دمار وسببتلي جرح غميگ بداخلي ماكنت أبّين لأحد
بس من انفرد بمكان وحدي انفجر بالبكي والنحيب والحسرة
وكدام الكل اتظاهر بنفسي قويه ومتفائله ..
رغم ماكنت متحضرة لهذا اليوم وعرفت ببابا حـيتركني وحيده وخاصه من تمرض وبقى بالمستشفى تذكرت ماما وشلون من دخلت للمستشفى
بعد معاناة طويلة ماتت وعافتنه ..
شيرين كانت الوحيدة اللي مصبرتني اكون قويه واكمل المسيرة الصعبه بالحياة علمودها لأن نور تغير جذرياََ بعد زواجه
اهتمامه تكرس لزوجته ومن يروح لدوامه ويرجع مايكلف نفسه يجيب أي شيء الي لو لـشيرين
كلشي صار لحبيبة قلبه ضيّ"
كملت دراسه هالسنه بصعوبة وكنت اتابع شيرين لحظه بلحظه وادرسها ومن ننرجع من المدرسه اغديها واسبّحها واغسل ملابسها وانيمها بحضني
ضيّ دورها جداََ مزعج بالبيت بالأيام اللي يجي بيها نور تتدلع وتلبس ملابس فاضحه وتتمركص وحتى بغرفتهم نسمعها اني وشيرين أحاول بالنهار اطلع بالحديقه افرش حصير ونكعد على صوت العصافير بالفي ندرس لحد ما تكتفي ضيّ وتشبع غرورها وبعد منسمع صوتها المزعج
بيتنا كان عبارة عن باب حديد كبيرة على الشارع وحديقه صغيره بالطارمه ومدخل الباب الصغيرة الداخليه للبيت وبالداخل صاله وغرفتين صغار جوة وحده كانت لبابا وبقت مسدوده بعد وفاته
وغرفه أني وشيرين سوة وحمام ومطبخ ومن المطبخ باب ثانيه على الحديقه بره قريبه على باب الشارع
ومن الصاله درج موكلش عالي وفوك غرفتين وحده لنور ووحده مخليها مخزن لغراضنه وفراشنه
وصاله صغيرة
وسطح مامستغلي هالكد بس انشّر الملابس بي وقبل الغروب انزلها
بمرور الأيام من يروح نور للدوام ضيّ تروح لبيت أهلها وتعوفنه وحدنه مترجع إلا بوقت متأخر
ماكنت أتدخل بخصوصياتها نهائياََ حتى ضمياء ماعاد شفتها هالفترة لحد ماخلصت العطله ورجعنه للدوام وماكنت اشكي من أختها اتجنب الكلام وياهه حتى لاتصير مشاكل وخصوصاََ تصرفات ضيّ المنافقه من يجي نور تسوي نفسها تطبخ وتنظف كدامه وتهتم بينه وبفترة دوامه اصلا متاكل ويانه ودائماََ تتبطر وتتمادى بالأسلوب الخشن الوقح والجاف من تحجي ويانه
..
ليالي مرت علينا اني واختي الصغيرة بدون أكل
ونور ياخذ ضيّ بأرقى مطاعم ومنتجعات ويتنزهون بالشلالات ويرجعون لوقت متأخر بليل
كنت أطلب من شيرين تسكت وما تشكي كدامه لنور وعمري ما شكيت كدامها بالعكس أحببها بنور واكلها خطيه يريد يرتاح من تعب العمل وزوجته تريحّه وتنسي التعب
وأسليها بالتلفزيون وأقرالها قصص حتى تنام ..
المصرف اللي أصرفه كان كله من راتب تقاعد بابا اللي استلمه بوقته من ارجع من المدرسه
اخذ شيرين من مدرستها واصعد سيارات ركاب لدائرة التقاعد بشهاده الوفاه
وارجع اضمه جوة السرير مالتي وهذا الشئ الوحيد اللي ماحاسبني عليه نور لاهو ولازوجته يمكن ناسيه لو يدرون جان ياخذوا مني
كمت اشتري كياس حليب واسوي حليب دافئ وانكع بي خبز لو صمون بايت وارش عليه شكر وناكله اني وشيرين يطلع طيب كلش بالوقت اللي ياكل بي نور ويه زوجته المشويات والاكلات الجاهزة بغرفته ونشم الريحه من فوگ
لو مرات بالمطاعم ..
مرات اشتري بسكت وكم شغله اضمهم بغرفتي لأن نور مو دائما يتسوگ واذا تسوگ ضيّ تاخذ المسواگ تضمه متخلي بس البتيته والبصل والطماطه بالثلاجة
استمرت هالحاله شهور وماشكيت حتى مرات ... مراااات بالصدفه يسألني نور تحتاجين شئ ناديه !
أبوسه من خده واكلله لا ماريد شئ بس لا تحرمني من شوفتك فرحان
يبتسم ويمسح على راسي ويروح
ااااه ...حسرات مو حسره وحده لفراگ بابا اللي خلاني وحيده واعاني وحدي وراح وعافني ..
لو ماما اللي ورطتني بأختي شيرين وحملتنّي مسؤوليتها وراحت عبء كلش ثقيل ..
قبل الامتحانات النهائية لصف الثالث متوسط انقطعنه فترة المراجعة
الحمد لله تابعت إمتحانات شيرين ونجحت الاولى وفرحت بنحاحهها اكثر من ما فرحت بنجاحي واشتريتلها كراسات تلوين وقصص حتى تتسلى بيهم بالعطله واني بقيت اراجع بغرفتي موادنه وكتبنه بالمدرسة
فد يوم اجت ضمياء وطلبت مني نراجع سوة
اني ماحبيت الفكرة لأن تأخرني لو تروح لغرفه ضيّ ويظلن يركصن ويغنن وبعدين أني اصلا كرهتها لضمياء بسبب تصرفات اختها حسيتها السبب اللي عرفتنه بيها ودخلت لبيتنا
بديت اتهرب لو اتعذر بسبب شيرين اغسللها وانيمها وكنت اواجه صعوبه بالدراسة وخصوصا متطلبات البيت وشيرين وضيّ اللي متسوي شي من شغل البيت بس ملابسها تغسلهم وتوديني للسطح اشرهم وتعالي من ينشفن نزليهن وروحي وتعالي وجيبي هاي وودي هاي لحد ما اهلك من التعب
ضمياء كالت اكو دورات تقويه بالمدرسة قنعتها لضيّ وآمنت يمها شيرين ووصيتها متطلع بالشارع ولا تصعد بالسطح كلش اخاف عليها وخفت يصير عليها شئ إذا اعوفها
الدورات على أساس الصبح بالتسعه بدلت ملابس المدرسه وطلعت ويه ضمياء ...
يتبع ..
قصة ناديه ..2@
