#لأني_أحببت/ 16
#قصة_حب
... ناديه@
...
مرت الأيام على علاقتي بـسلطان"
مالتقينه بعد هالمرة اللي اختلفنه بيها وتعاركنه
كل يوم أوصّل شيرين لمدرستها وبعدها اروح للدوام وارجع بطريقي للبيت ..
بس اخابره بالتلفون بليل من تنام شيرين نحجي قليل ونطمن على بعض بالايام اللي نور الدين يكون بالدوام
حاولت اثگل واقلل من الكلام وياه رغم اشتياقي إله واتمنى يصير كلشي بيننا بالحلال ورغم ماحسيت بي حزين دائما وكلامه كله حسرات وألم ودائما احس بي تعبان وضايج ويكلي ناديه بس انتي اللي مصبرتني على العيشه
...
من رجع نور من الإجازة بقى بالصالة ينام ميصعد لغرفته وماطلع من البيت
حاله كلش متتدهور بحيث لحيته طالت وشعره مكفش وشكله تبهذل
حسيت بي متألم لفراق ضيّ
طلبت منه اروح اجيبها
رفض كلي المفروض هيه تحبني وترجع من وحدها
توسلتله ..
نور حبيبي شوف حالك فدوة مااكدر اشوفك هيج دمرت نفسك ولاتنسى حـ تصير أب ..!
بقى يتحسر وكلي ببرود روحي ناديه
بدلت ملابسي بسرعة ورحت بيتهم مسافه قريبه كم بيت عن بيتنه
من دخلت شفت ضمياء خنزرت عليه وراحت ماحجت كلمة
عود متحجي وياي زعلانه حضرت جنابها
وأمها ظلت تدردم وتدّعي علينه متدري ببنتها الخاينة هيه السبب بكلشي صار
غلست عنهن شسويلهن مارديت ولا اهتميت لخاطر نور خطيه
دخلت لغرفتها جوة
ضيّ جانت متمددة ومبهذله شكلها يخرع صاير
وعلاگه جيس مليان أدوية يمها
شافتني كامت طفرت
كعدت يمها
ضيّ كومي غسلي وبدلي وحطي مكياج رتبي نفسج وشكلج ورجعي وياي للبيت
سوت نفسها تتعزز
مااا .. ما ارجع ...
بربج متلوگج هاي التصرفات ضيّ بطلي هالسوالف
الاعتراف اللي اعترفته لنور ناقص واكدر اكمله وعندي دليل
شفتها ارتبكت وانخطف لونها وتحيرت
ماشي ناديه ..
انتظريني دقايق اجمع اغراضي وارتب حالي
كمت وكفت .. وهددتها ..
بسسس
خليها ببالج ضيّ من تولدين الطفل اني اللي اسويله تحليل الحمض النووي حتى اتأكد منه ابن نور لو لا ..
صارت عصبية وصرخت
لج ناديه انتي شكد حقيرة و ..
اشش ...
احترمي نفسج ولا تتصرفين اي تصرف يضوجني تدرين بيه اكدر اخربط عليج حياتج
افتهمتي ؟
سكتت وهزت براسها ودمعت عيونها
كالت اطلعي هسة انتظريني برة
دقايق واجهز
طلعت انتظرتها بالحديقه ما اتحمل اسمع كلام امها لو نظرات ضمياء الحاقده
عشر دقايق وطلعت ضيّ بعد ماحجت شي وياي
شفتها مبدله ومخليه مكياج ورافعه شعرها
اخذت منها قسم من الغراض وصلنه للبيت
نور شافنه كام على حيله
شفتها ابتسمت بس هو على أساس زعلان عافها وصعد لفوك
كتلها روح لحكي
تركي الغراض بعدين صعديها
تلهفت وصعدت تركض
...
اااه شكد حلو الزواج
ياربي شوكت اتزوج سلطان وتنسد علينه باب الغرفه ونتوج حبنه
كعدت وبقيت اتحسر واتخيل حبيبي سلطان"
شيرين عدها واجبات بالدروس ساعدتها بيهن واني تاركه واجباتي ودروسي مالي واهس هالسنه كلش للدراسة
....
مرّ اسبوع تقريبا كننا بشهر نيسان والجو حلو ربيع بس ماكنت أطلع لبرة
نور رجع مثل قبل يأخذ ضيّ ويطلع نزهات وعزايم ومطاعم ونبقى أني وشيرين ندرس بالبيت
ومرات استغلها فرصه اخابر سلطان"
بس مو دائماََ احصله ابقى اخابر أكثر من مرة واتفشل وانحرج عرفت بي عايش ويه بيت عمه وبنات عمة دائما يجاوبون من اتصل وعنده اخوان وخوات صغار لهذا ميكدر يرد عليه بسرعه
مستواي كان بالمدرسة مو زين وسقطت بكم درس
مرت الايام
.. ابتعدت عن سلطان لأن قربت فترة الأمتحانات النهائية على أساس اعوض وادرس وسلطان" ماكان متتطلب ولا يتذمر
كنت استغرب صارلنه شهور مالتقينه بس إتصالات بيننا ومرات اشوفه من بعيد من ارجع من الدوام ..
مااعرف اذا كان يتهرب مني لو اكو شئ يمنعه ..
بعد الامتحانات النهائية بيوم
اشتاقيتله هواي
كلت اواعده ونطلع من زمان ماطلعنه ولاشفته
رحت اتصلت بالتلفون مفصول !!
آخر مرة خابرته قبل الأمتحانات
شنو الموضوع !؟
ياربي گلبي يوجعني عليه وممرتاحة ابد
محد حاس بيه بالبيت صار عندي إرباك وقلق
نور مشغول بحمل ضيّ وعايش وياهه الحب والغرام وما حاس بيه ولا عاد سأل عني
شيرين كبرت ونجحت للثالث الإبتدائي
لكن اني استلمت النتيجه كمال وگعت بـ 3 دروس على أساس عندي فرصة اعوض امتحنهن بشهر التاسع بلكي واعبر هالسنة ..
بقيت محتاره بموضوع سلطان
مامعقولة يعوفني بسهولة
مستحيل ..
ليش ما شتاقلي !
سلطاني وحبيبي وينه !
انجنيت ..
يربي بس لا صاير شي عليه قدر لو حادث دخيلك إلهي
بقيت أدعو ليل نهار
يارب كون مابي شي حبيبي
لو اندل بيته اروحله واتطمن عنه
بعد شهر تقريبا مرّ ماتحملت بعذ ما عندي حلّ غير اروح لضمياء أكيد سعد يعرف شي
رحت طلع اخوها الصغير كتله صيحلي ضمياء
مادخلت لبيتهم
طلعت ضمياء استغربت من شافتني
اشرتلها اجت وراي وكفنه بعيد عن الباب ماريد احد يسمعني
لزمت ايدها .. ضمياء اروحلج فدوة خابري سعد وسألي عن سلطان
جرت ايدها ...شنو !؟
انتي مجنونه !
تخبلتي ناديه؟!
شعدج انتي ويه سلطان" !
على اساس شريفه حضرتج وماعدج علاقات وبعدين اني تركته لسعد من زمان
كنت ارجف ومتوترة ذليت نفسي الها وتوسلت بيها دنگت على أيدها وبستها
... ضمياء ارجوج فدوه اروحلج
شتريدين تكولين عني كولي اليوم دبريها وجيبيلي خبر عن سلطان أترجاج
ناديه منين اجيبلج اخباره وبعد سوايتج باختي لاتتوقعين اساعدج واسويلج زين يله ولي روحي منا
بجيت وعفتها ورحت بعد ماكانت تستهزء بيه وفشلتني حتى ماسألتها ليش تركته لسعد
معقولة شكثر كانت سافله وياه
اللي شفته بعيني واللي كانت تسولفلي عنه من علاقتهم شلون تتركه بسهولة !
رجعت للبيت متفشلة وأيست من سلطان
مااعرف شسوي
اريد اصرخ ياربي اختنگت
علاقتي بسلطان" مو شهر وشهرين صارلنه شهور
اكثر من سنه وبيننا ارتباط روحي ومشاعر وأحاسيس حلوة ووعود وعهود وأحلام عشناها وبنيناهه سوية
سهرت ليالي بس افكر بي واتذكر كلشي صار بيننا وكل
كلامه ... انفاسه ... عطره ... لو من يزعل عليه ياويلي وسواد ليلي ونتراضه بعد الزعل
شنو اللي خلاه يعوفني ويختفي !
كلشي توقعت بس ماتوقعت يعوفني بس لا يطلع كذاب الخاين حقدت عليه وكرهته وبقيت العن الساعه اللي شفته بيها من يوم اللي كان ينتظرني مقابيل المدرسه وانطاني الملازم والاسئله وتحرش بيه ..
خدعني وورطني وياه
ركضت طلعتهن من الميز
خطه وكتابته ..اسمه ..سلطان عبد الرحيم ..
حضنتهن وبجيت
ماعندي منه ذكرى غيرهن
لمست شفايفي تذكرت من گلي اني اول واحد وآخر واحد يبوس هالشفايف
حسرات وآهات على فراگه وغدرة بيه
...
يتبع ...
#قصه_ناديه@ 16
