#لأني_أحببت /29
#قصة_حب
.. ناديه@
..
انا اشتاگيت الك واهتزّت الــــــروح*
وينك يا ضوه عيــــــــوني وحبيبي "
الصخر حن وسمعني وگالّي شبيك*
عجيبه شلون ماتسمع نحيبــــي "
احس نار اني بيه وتاكل بالــــــــروح*
وبس حــــــضـــنك يطفّيلي لهيبي"
الف دكتور جابــــــــــــــوا ماتداويت*
لان قفلتهه عليك وبس انتـــــــه طـبـيـبـي "
***
لقاءنه هذا كان جداََ ساخن ..
شوگ ولقاء بعد الفراگ وحنين وعتاب وآهات ..
الرجفة بعدهي بجسمي والكلام أختفى وحبيت لهفته ولمساته
و انفاسه الحاره
ماباسني بس بقه يلمس بخدودي وبشعري ويشمني بعمق وعيونه تدمع
لفيت أيديّه على ركبته بقوة وبقيت أشمه ..
تمنيته يبوسني ..
ماادري ليش أمتنع ..جان متردد
يمكن لأن توقع أني مرتبطه لو بباله فد شي ثاني
بعدها كتله بهمس سلطان أريد مي
كعدني على الكرسي وكلي لحظه هسة
راح جابلي بطل مي فتحته وشربته كله وبعدني أرجف
كعد يمي وبس يعاين ببوجهي شاف أيدي
شبيها ايدج ناديه !
ماكو شئ البارحه أنجويت بالفرن
يالله ... بشرفج ناديه صدگ تحجين !
غير تنتبهين لنفسج
كام جاب شاش وقطن سحبها خلاها بحضنه وبده يعقم بيها وينظف الحرق بكل رقة
وأني مليّت عيني منه وماحاسه بالألم بالعكس مرتاحه بشكل مينوصف
كلي ..
ناديه تأخرتي يلة جيتي هواي انتظرتج
ناديه ... تدرين من أول يوم دخلت للجامعة نشرت أشاعه عن أسمي الكامل ومعلومات كلت راح توصلج بسرعه
جنت متأكد انج منتظرتني
وأشتريت رقم جديد وخليته بالعماده ووصيتهم ينطوا لأي واحد يسأل عني
شمدريك راح توصل الأخبار الي ؟؟!
ناديه اكيد توصلج عن طريق شيرين
شلون عرفت شيرين ؟
ضحك وكام رجع الغراض وغسل ايديه ونشفهم ورجع كعد يمي خله رأسي بحضنه ياويلي دكم القميص مفتوحه وصدره يجنن دافي وبي عطر مميز
بقيت أمسح بخدي بصدره وكعت جنطتي من حضني مهتميت تعلقت بياخه قميصه وهو دا يكمل كلامه
..
ناديه رجعت للعراق قبل شهرين على أساس أصفي أملاكنه
بعت بيتنه وبعدها ظليت أدور عليج
كل يوم اوكف بمكاننه القديم راس الشارع تمنيت اشوفج ماطلعتي من البيت خفت اسأل عنج تصيرلج مشاكل
صدفه شفت شيرين نزلت من سيارة الجامعه راقبتها عرفت بيها بكليه الطب أستغليت الفرصه قدمت أوراقي بما أنني طبيب جراحه وباطنيه وقررت أخذ محاضرات هناك مؤقت على أمل اوصلج عن طريق شيرين
سلطان" شلون عرفت هي هاي شيرين اختي !
ناديه تشبهج وأني شايفها من كانت صغيرة واسمها مو غريب هالصدفة
معقولة شيرين تشبهني !
تشبهج بس صوتها مو صوت أبو ندى وضحك ..
وخرت راسي من حضنه الدافي
أبتسمت .. على فكره انته هم صاير صوتك صوت ابو ندى
لزم ايديه اثنينهم و باسهم
ناديه حبيبتي اني بعد كم يوم راجع تعالي وياي ..
انتي بعدج تحبيني مو ناديه !
سلطان" مستحيل ..
مااكدر ..
ليش ..!؟
هواي احداث صارت وراك لازم تعرفها
لاتكليلي تزوجتي !
يعني لو كنت متزوجه وعندي اطفال جان شسويت !
شفته انخطف لونة وتغيرت ملامحة وكام ابتعد عني كعد بعيد مسافة
تحسر ..وسألني
ناديه انتي متزوجه جاوبي ؟
اول جاوبني انته سلطان ..
ماادري ناديه ارجوج لاتحرجيني يعني انتي حسب رغبتج انتي تريدني منتظرتني !؟
اذا متريديني وداعتج ارجع اليوم وبعد متشوفيني
بديت اتنفس بصعوبة غمضت عيوني
اجتني عصره قويه بظهري لزمت خاصرتي
ناااديه شبيج !
شنو يوجعج ؟
ناااديه !
سسسلطان جيبلي بعد مي فتحت جنطتي طلعت الدوة
جابلي مي وصرخ من شاف الكبسول بيدي شنو هذا !!
اخذه مني وقراه
ناديه شنو هذا طلع كل الدوه اللي بجنطتي حتى موبايلي ومكياجي تتطشرن بالكاع
سلطان فدوة خليني اخذ العلاج وبعدين افهمك
ناديه هذا علاج فشل كلوي !
شنو بيج فهميني ؟
صرخت آاااي راح أموت سلطااان "
شالني مددني على السرير ونزعني السترة والبوت والجواريب وغطاني ببطانيه
وراح جاب أبره حقنة يمكن مااعرف شنو
لزمت طرف السرير حديد وصرخت من الألم راح موت سلطان انطيني العلاج
رخي ايدج لاتخافين
شد ايدي بحبل بلاستك وضربني ابره بالوريد
سلطان شنو هاي !
شدا تسوي !
لاتخافين بس أسترخي ارجوج لو نسيتي اني طبيب
ثواني وحسيت بفرق خف الألم ارتخيت ونعست
رجع غطاني لزمت ايده اشرتله تعال احضنني حبيبي تمدد يمي وباسني براسي
شنو هاي ناديه رجعت اخذج وياي الكاج سكراب ومنتهية !
وداعتك انته فجرني أنتحاري اسمه "سلطان عبد الرحيم "
حضنني حيل وبقه يضحك
آآه منج شمشتاگ لسوالفج ..
وتاليها ويه هالحب ولج سنين معذبتني انتي مووت
تتدنيت يمه وهمست بس خليني هسه على صدرك حبيبي ماادري غفيت شويه
كعدت على صوت موبايلي يدگ
انتجيت وشفت سلطان كاعد بعيد عني ويفرك بيديه وضايج كلش اشرتله انطيني الموبايل
عدلت نفسي
سألته ببيش الساعة شكثر نمت ؟
كلي ردي ناديه صارله ساعه يدگ الموبايل اكيد قلقين عليج
لكيت مكالمات شيرين وراغب وضيّ
اتصلت بشيرين طمنتها
كتلها لاتقلقين حبيبتي شويه واجي عندي شغل من ارجع افهمج وطمنني ضيّ
سلطان عيونه بيها حزن وخوف حسيت بي مقهور وضايج
رجعت اتصلت براغب
صرخ ببوجهي ليش متردين !
على كيفك شبيك تصارخ عندي شغل والموبايل صامت
بقه يعاتبني
شبيك راغب أهدة بليل نتفاهم واحجيلك ماشي !
سلطان ظل يتحسر حسرات مو طبيعية حسرة وره حسرة
كتله آسفة ولو ضوجتك اليوم بالمي بس ممكن تجيبلي بعد واشكرك على المسكن نفعتني الابره ارتاحيت عليها وخف الألم
كمت اخذت السترة وجنطتي ولبست الجواريب والبوت وعيوني عليه وخايفة احجيله وماعرف شلون افهمه
بقى ساكت ومتألم اخذت المي منه شربت بعده ساكت وماسأل اي شي
سلطان" اني رايحة
لحظه ..
ناديه خليني اوصلج لبيتكم اخاف تتطيحين بالطريق
لا سلطان ماكو داعي راح استأجر تكسي وحدي
دا اطلع لزم ايدي ... ناديه ..
راغب زوجج ؟؟
أبتسمت لأن لمست الغيرة العنده جن جنونه
حضنته بكل قوتي وشميته بعمق
ياربي ليش هيج أكو حواجز بين العشاق
مكدرت اجاوبه لأن ماراح يفهمني
اقتربت من شفايفه ردت ابوسه رجع لورة ماباسني دفعني وفشلني ...
كلي روحي ناديه طلعي
دار وجهه
ضجت حيل منه وطلعت من غرفته كوه أمشي
يمكن بدون گلب بقيت ..
لا مو يمكن وإنما أكيد تركت گلبي كله هالمره عنده
الجو صار بارد كلش ومغيم يمكن راح تمطر صعدت بالتكسي ورجعت للبيت
وصيت شيرين وضيّ يسوون عشه خاص راغب راح يجي يتعشه ونور كان بالدوام
كنت مقرره اكللهم على سلطان الليلة بس كنت كلش خايفه
زين" فرح وظل يهووس لأن كلش يحبه لـراغب
دخلت للحمام ونزعت ملابسي مليت البانيو مي دافي وغطست بي استرخيت وارتاحيت
يالله ...
لو نجتمع أني وسلطان هنا بالحلال ..
شيصير ياربي !!
غمضت عيوني وبقيت أتذكر كل لحضه صارت اليوم وكل همسه ولمسه وكل كلمه من سلطاني حبيبي ...
عشگ صباي هذا وبي ذكريات وغرام وريحة الحب الأول ...
...
#قصه_ناديه@29
