اها الولد طلع مشى ولينا اتقدت بالبكاء. المديرة قالت ليها قلة ادب واحتيال كمان. والله ده اخرك يا زمن. في استاذة لغة عربية متفلسفة جدا. قالت : هذا زمانك يا مهازل فأمرحي. اها المديرة. قالت ليها انا قلت ليك جيبي ولي امرك. تجيبي لي راجل من الشارع والله ما سبقك عليها زول. انتي يا لينا سمعة سيئة للمدرسة ومن اليوم ما عندك قراية هنا .. انتي مفصولة من المدرسة دي . وانا حارفع تقرير سؤ سير وسلوك لادارة التربية والتعليم. نحنا ما ظلمناك ..انتي ظلمتي نفسك. اديناك فرصة عشان نصلح الغلط مع بعض وعشان ولي امرك يكون عارف نحنا مراقبين البنات وبنوريهم الصح من الغلط ..نحنا عندنا بنات زيك ..وبنخاف عليك زيهم. لكن انتي يا لينا زدتي الطينة بلة. عشان كدة انتي مفصولة من المدرسة . لينا طلعت من مكتب المديرة ودخلت الفصل شالت شنطتها وطلعت. فاطمة لحقتها جمب الباب. مالك يا لينا في شنو؟ لي راجعة. لينا قالت ليها المديرة فصلتني من المدرسة. وطوالي جرت طلعت وخلت فاطمة واقفه متجمدة مكانها. مشت البيت لقت امها قاعدة ومعاها نسوان. شكلو عندهم لمة قهوة ..والبخور والفشار وحاجات عجيبة ..اها عيونها لمن اتورمت من البكاء. دخلت سلمت علي النسوان ودخلت غرفتها. امها جات.داخلة عليها لقتها بتبكي. قالت ليها مالك في شنو؟ قالت ليها الحصل كلو في المدرسة وما كذبت في كلمة. امها قالت ليها ولا تشيلي هم يا لينا. ويعني شنو لو لاقيتي ولد وناديتيهو يدخل معاك علي اساس انو ولي امرك. ويعني شنو لو رسلتي جواب. اول ولا اخر بنت. والله مديرتكم دي شكلها خرفت علي الاخر. مرة متعقدة ومسلطة. الله يريحنا منها. ((والله صح امهات اخر زمن. البنت تغلط بدل يوروها غلط ويحذروها وتتعاقب ولو عقاب بسيط عشان ما تكرر الغلط تاني وتبقي نتيجة اغلاطها خصما علي حساب اهلها وسمعتهم. ما صح الام تقيف مع البنت او الولد في الغلط. التنبيه والتحذير واجب كل ام. لانها بتكون 24ساعه مع اولادها ولصيقة بيهن وفاهماهم جدا. لكن في امهات الواحدة خبر اولادها م بتكون جايباهو. وغير الحوامة من بيت لي بيت ما عندها شغلة. غايتو الله يصلح الحال) ). المهم والدة لينا قالت ليها ما تخافي. انا بكرة دي برجعك المدرسة وحتشوفي. وكان ما رجعتك ما ابقي امك. قومي ادخلي اخدي ليك دوش وتعالي اكلي ليك حاجة واحضري مسلسلك البتحبيهو واخدي راحتك علي الاخر. والصباح عندي كلام تاني مع مديرتك الفقرية دي. قالت ليها الكلام ده وطلعت لي النسوان في الصالون. الصباح بي خيرو بي شرو. اصبح ..انتي يا والدة لينا الفحي توبك وسوقي لينا ووين علي المدرسة ..وفي الطريق كانت بتحذر فيها. قالت ليها اي حاجة اقولها ليك تقولي نعم وحاضر فاهمة وتعايني بي عينك وما تخافي انا معاك. اها وصلت المدرسة ودخلت للمديرة وسلمت عليها. قالت ليها والله يا استاذة انا اول شي اسفة جدا علي التصرف الاتصرفتو لينا. غلط كبير لمن ترسل جواب لي ولد. وانا لمن جاتني البيت وقالت فصلتيها عشان عملت كدة. ضربتها ضرب وما قصرت لانو دي قلة ادب زايده عن حدها ..لكن يا استاذة في حتة انو جابت ولد دي برضو غلطت. اوريك غلطت لشنو؟ لينا الولد الجابتو ده بكون ود عمها اخو ابوها طوالي. وكان عايز يتزوجها وانا رفضت لانو دي اسرة مشاكل واعمام لينا ديل زمان اكلو حقها في الميراث بعد ابوها مات وشاكلوني وطردوني من البيت ..وهي من غباءها لاقتو ف الشارع وجابتو ..وهو ما صدق عشان ينتقم منها ضربها كف قدامكم وطلع ونكرها. ودة رد فعل عادي ليهو وانا عارفاهم عايزين يدمرو مستقبل بنتي ..وكبت ليها دمعتين تلاتة كدة
يتبع.....
