#هروب-الى-الجحيم

الجزء 2

#هروب_الى_الجحيم
بقلمى فردوس عبد اللطيف
الجزء   2
كعدت الصبح عضامى مكسرة نايمه عالارض محد بحالى كلمن ملتهى بجهاله الا انى لا ام ولا اب ومن ابجى واكلهم اريد امى يضحكون هسه امج بحالج ملتهيه بابوج الجديد منو ابوى الجديد هم عبالى الاب من يتغير مثل مانغير لعابتنه ممكن الاب يتغير بقيت اتأمل شوفه ابوى الجديد
اتصلو بابوى الحقيقي كلوله تعال اخذ فاطمه تعبتنه
انى ماحجيتلكم عن منطقتنه نسكن باحد الاقضيه التابعه لمحافظه الناصريه منطقه زراعيه ويمر بيهه نهر وطبيعه عشائريه وتمر سكه القطار الرايح لبغداد على منطقتنه
ابوى هم اجه العصر اخذنى مبين عليه ضايج ومراغب بوجودى
رجعت لزوجه ابوى ومسويه نفسهه تعبانه عود حامل وكوة تحجى
بس طلع ابوى استلمتنى
ها امج تزوجت متكدر تكعد تدير بالهه عليج تربيج ذبتج بسرعه نسوان
وهذا الحجى انى ما اعرف شتقصد بقيت تحت رحمتهه اشتغل شغل مال بنات كبار مو بعمرى بس ما اكدر احجى تحرمنى من الاكل كانت عقوبتهه قاسيه تبقينى انام جوعانه واخاف احجى لابوى اخاف تجوينى
فد يوم شكيت لابوى منهه كتله نمت بدون عشا
بس طلع للشغل حمت السكين عالطباخ وتجوينى منهه بعد اخاف احجى لابوى ولكل احد
ولدت بنت سموها ايمان
زين انت عندج ايمان بكلبج حتى تسمين ايمان
وصارت ايمان الكل بالكل
صار عمرى 6 سنوات وانى بين بيت ابوى وقليل اروح يم امى
بس امى تاخرت بالحمل وصايرة اعصاب تريد تجيبله طفل حتى لا يعوفهه
عود سجلونى بالمدرسه
البنات كلهن اشترن ملابس جديده للمدرسه وشنط
الا انى زوجه ابوى جابتلى ملابس مستعمله من اقاربهه حتى البسهم واشترالى ابوى عود شنطه
اجاهم طفل ثانى ولد بعد زوجه ابوى استقوت ومحد يحاجيهه
ارجع من الدوام ميته جوع وتخلينى ركض للشغل وكنت اخاف منهه من تعصب لا تجوينى
اعوف الدراسه واكضى شغل البيت
حبلت امى وكانت فرحانه وما مصدكه عبالك اول حمل
من اروح يمهه واشوفهه فرحانه بالحمل احسهه ماتحبنى وتحب الطفل الجديد
بقيت بين البيتين غريبه اذا بيت ابوى زوجته تشغلنى اكثر من طاقتى
واذا بيت امى فزوجهه يباوع عاللكمه الاكلهه واخاف الزم شي فى بيتهم  شعور بالغربه وانت بين اهلك شعور بالوحده وحولينك امك ابوك لكن محد منهم حضنى وضمنى لصدرة كان ودى واحد منهم يحسسنى بحنانه بعطفه
ولدت امى ولد سمته ليث
كانو فرحانين بي هي وزوجهه ومحضريهه ملاعيب ومن اروح يمهم لازم ما المس اى لعبه من العاب ليث
زوجه ابوى صارت تتبلى على باى طريقه تريد تتخلص منى انى شويه كبرت صار عمرى 8 سنه واخوى ليث سنه واحده
اخر شي اخذتنى لبيت امى وشمرتنى عليهه
هاى بنتج انت احتارى بيهه مو انت تخلفين واحنا نبتلى
كانت جايبه بقجه بيهه ملابسي
دخلت لبيت امى منكوسه الراس وكانى مرض معدى والكل يتجنبنى
للحكايه بقيه   f