#هروب-الى-الجحيم

الجزء 3

#هروب_الى_الجحيم
بقلمي فردوس عبد اللطيف
الجزء  3
دخلت لبيت امى صحيح هنا احسن من ظلم زوجه ابوى لكن اكو شي اكبر من هذا امى حبهه كله لاخوى ليث ماخلت بكلبهه ذرة محبه الى كانت كلماتهه ودلعهه لاخوى تنزل سكين فى قلبي تخليني اتمنى الموت ولا اعيش منبوذه يم اقرب الناس الى هما امى وابوى يحسون بثقل بوجودى بحياتهم ابوى ينحرج من زوجته خصوصا بعد وفاة بيبيتي وامى عود تدارى مشاعر زوجهه العزيز ابو ليث
استلمتنى امى اول شي بطلتنى من المدرسه وصرت اشتغل بالبيت اكثر من الخدامه هم يمكن الخدامه عدهه يوم عطله يمكن ترتاح كم ساعه لكن انى واجباتى 24 ساعه حتى لو نايمه هم يكعدونى ولازم انجز الواجب
اخوى ليث طفل احبه من كل كلبي
بس امى دائما تصيح على وعصبيه وكل حاجه تخرب لو يكسرهه ليث توكع براسي دكول انت السبب شكد ما احلف واحجى ماتسمع منى بس البوس والحضن لليث وانى من تباوع على راسا تكلب وجهه وتعصب وكانهه تشوف القهر الى شافته من ابوى بوجهى وتعاقبنى بذنب ابوى
فد يوم اخوى ليث جاى العبه ووكع من الدرج شويه طلع من كصته دم لو انكلبت الدنيا ضربتنى موتتنى كتل انت متقصده تأذين اخوج
كل هذا الالم من اقرب الناس والى هى امى طيب اين المفر زوجه ابوى اكثر منهه ظالمه ماعندى غير اصبر واتحمل مرات اكول ليش خلفونى لو ما مخلفينى مو احسن الى والهم
اجه العيد راحت اشترت لليث قاط للطلعه وتراك للبيت وتكرمون حذاء وانى خيطتلى دشداشه عند الخياطه هم فرحت بيهه عبالى كل البنات يشترولهم دشداشه
من اجه العيد وطلعت يم البيت واشوف البنات كل وحده تفتخر بفستانهه مال العيد وانى فرحانه بالدشداشه
مرت الايام وانى هذا حالى والد ملتهى بحياته مع زوجته واطفاله وناسي عنده بنيه محتاجه منه ولو كلمه عطف وحنان ابوى
وامى ملتهيه بزوجهه ومعتبرتنى خدامه تعاملنى بقسوة وعصبيه وتفرق بينى وبين اخوى ليث
صار عمرى 9 سنه
فاطمه سبحى اخوج
حاضر
اخذته سبحته ظل يبجى ويصرخ بدلتله بعده يبجى
فاطمه اخذى ليث مشي عالشط خلى يشوف البط
هو ليث يحب يتفرج على البط مال جيرانه يسبحون بالشط مسافه عن بيتنه بس كلما يضوج ناخذه يباوع عليهم ويسكت
اخذته تمشينه ولعبنه انى وياه كنت اشعر بالطفوله من العب ويه اخوى لانى ما حسيت بطفولتى
كنا ماخذين خبز يابس نشمر للبطات حتى ياكلون وليث يضحك
كانت لحظات سعيده
لكن مادامت انزلقت رجل ليث بالطين ووكع بالشط
مديت ايدى واصرخ
ليث ليث انطيني ايدك فدوة حبيبي
انى ما اعرف اسبح ارتبكت اخاف انزل اخاف اغطس وياه هو غطس بعد ماطلع
جمدت عقلي توقف عن التفكير ماكدرت اسوى شئ كله عمرى 9 سنه تفكيرى ما يستوعب الحلول
بقيت كاعده عالجرف اكول هسه يطلع يمكن الملائكه تطلعه انتظرت  انتظرت تقريبا ربع ساعه واخوى ماكو
هنا بعد وين اروح ارجع للبيت شكله لامى اكلهه ابنج غرك راح تتهمنى انى غركته وراح يعاقبونى عقوبه شديده هو وكع من الدرج موتتنى ضرب زين اختفى بالماى شسوى بقيت خايفه لا اكدر اصرخ لا اكدر ابجى
صارت الدنيا ظلمه مشيت ما اعرف وين اروح بس اريد اهج لاى مكان ارحم من امى وزوجه ابوى
مشيت ويه سكه القطار
بقيت وحدى والدنيا ظلمه كلت خلى ادخل بالمحطه يمكن اأمن من الشارع ...دخلت محطه القطار نمت عالمصطبه غفيت اخذتنى النومه
للحكايه بقيه   f