#هروب-الى-الجحيم

الجزء 7

#هروب_الى_الجحيم
بقلمي فردوس عبد اللطيف
الجزء 7
مر اسبوع وانى اتحجج واعتذر عن الزواج لكن نبيله كالت لازم تتزوجين واحنا نبقى اهلج وما نتخلى عنج
كلامهه ريحنى وخلانى اشعر بالامان وعندى ظهر يحميني لان بصراحه صحيح كنت كالخادمه بيتهه لكن كنت مرتاحه يعاملونى بعطف واحترام
اضطريت اوافق على محمود ولو انى مشايفته ولا هو شايفنى بس اسمه رجال احتمى بي ولا ارجع للملجأ لان الى بعمرى ينقلوهم لملجأ اخر كلهم بنات كبار وبي مشاكل اكبر لذلك يمكن الزواج احسن طريق حتى فكرت بالرجوع لاهلى لكن اهلى عشاير وراح يحاسبونى عالسنين الى كظيتهه بالملجأ وتعرفون الكلام الى راح يصير
جتى ساهره وابنهه وبناتهه اميره ولبيبه جايبين وياهم حلقه وعبايه ودشداشه ولبسنى الحلقه اشو هو جاى عود يشوفنى اشو راسا لبست الحلقه يظهر مايهمه
انى رتبتنى نبيله ولبستنى فستان من عدهه زغرته وسوته بقياسي وسرحت شعرى طلعت مرتبه وتغير شكلى فرحت بنفسي راح اتزوج واعيش مثل العالم واخلص من العذاب والبهذله
حددو العرس بعد شهر
انطونى مبلغ جدا بسيط اشتريت بي ملابس داخليه وكم دشداشه
واشترو غرفه مستعمله وحضرو ليوم العرس
انى بين فرحانه وبين مقهورة راح افارك ست نبيله وعائلتهه الى اعتبرتهم اهلى وناسي
حتى للصالون ما رحت جابو بنت معلمه ويه نبيله تعرف تمكيج مكيجتنى وسوتلى تسريحه والفستان طلبو من صديقتهم كان شويه عريض زغرته نبيله وصار على قياسي
فرحت فستان ابيض ومكياج والناس مهتمه بي اول مرة اشوف ناس تهتم بي حسيت بفرحه بس تذكرت امى وابوى دمعت عيونى تمنيتهم وياي بذيج اللحظه يزفونى بايدهم لكن هذا قدري ونصيبي
جتى سيارات الزفه جايبين كوستر وسيارة للعروس سلمت على عمى زوج نبيله ونزلت دموعى من طلعت من بيتهم
صعدت بالسيارة والناس تباوع عالعروس بس انى كلبي معصور ما اعرف ليش تذكرت اخوى ليث من وكع بالشط واشلون انهزمت مر مثل شريط سينمائي معقوله هالسنين مرت بهالسرعه بحلوهه وبمرارتهه ...وشنو الى ينتظرنى بيت محمود واهله
احنا بالسيارة محمود ماتكلم اى كلمه وياي بس يغنى ويركص ويه الموسيقى
رحنا لبيت ساهرة من ورة خشمهه مسويه العرس عازمه ناس قليله والعشا تمن ومرق محد اكله وبس يركصن هى وبناتهه
كانت وياي نبيله سلمت على وبوستنى وصت محمود وامه على وخلت بايدي ظرف بي فلوس اعتقد جتى ام محمود واخذته منى
صارت الزفه ودونى للغرفه ظلمه ضوة واحد واصفر ياذى العيون
اجه العريس وهلاهل وخبصه
محمود ماكلمنى ولا كلمه بس اخذ شغلته واخذ العلامه لامه وطلع
اشتغلت الهلاهل
الحمد لله حسيت بالفخر لانى حافظت على نفسي وانى وحيده ومشردة
نمت تعبانه ماحسيت الا جتنى دفرة كومى فاطمه
ها محمود تعبانه
كعدى امى وخواتى يردوج تسوين ريوك
عفيه تعبانه بعدنى عروس
ما اشوف الا ..ضربنى تكرمون بالنعال لج كومى
انى هم طفرت من الفراش عبالى عروس واتدلل
نزلت واسمع البنات
يوووم هاى اللقيطه ماكعدت...كعدوهه خلى تسويلنه ريوك
من سمعت كلامهه انشلت رجلى اريد اوصل للمطبخ اسحل روحى سحل...انى صرت لقيطه وبنت حرام
وانى بنت حلال واهلى عشاير هيج تاليتى
دخلت المطبخ كلشي ما اندل جتى ساهرة دلتنى
شوفى فاطمه اليوم ادليج على مكانات الاغراض وبعد انت لازم تعرفين مكاناتهم
يالى حضرى الريوك بسرعه
سويتلهم ريوك وديت الصينيه الهم بالهول
ردت اكعد وياهم
عاطت بي اخته اميرة
كومى وين كاعده روحى بالمطبخ اكلى متاكلين ويانا...
بوقتها حسيت انهم محتقرينى ويستنكفون ياكلون وياي
رحت للمطبخ ما عجبنى اكل لوحدى
صاحو على تعالى شيلي الصينيه وصبيلنه شاى
عرفت مقامى وقدرى عند بيت ساهره من اول يومحتى الاكل يخلونى اكل الفضايل مالتهم واكول ميخالف اكعد من الصبح اخبز واسويلهم ريوك وبعدين ابلش بالغدا والتنظيف وغسل ملابسهم كلهم حتى البنات وراها العصر لازم التهى بالعشا وترتيب البيت لحد ما يصير الليل
محمود ما معتبرنى زوجه بس بالليل من يجي سكران يتطوطح لازم ابقى انتظرة وافتحله الباب واذا تاخرت يضربنى كانى مو بشر
فلوس مينطينى حسرة على اشترى دشداشه  اصلا هو ياخذ مصرفه من امه خواته وامه كلسع يسمعونى كلام انى بنت حرام وجايتهم من الملجأ كأنى من عالم غير عالمهم
من اكمل شغلى اصعد لغرفتى واكعد ابجى واصلى واقرى قران واكول يارب لو غركانه ويه ليث مو كان احسن من هالعيشه انى عايشه بجحيم من اسمع كلمه لقيطه اندم لانى هربت من اهلى وصرت بيد ناس ماترحم
فد يوم اجه خال محمود يتباركلهم بزواج محمود كان شيخ عشيرتهم ومثقف ومحترم بنفس الوقت من شافنى حسيت بعيونه نظرة حنان وامان انطانى فلوس هديه زواجى بس رحت للغرفه اجانى محمود واخذهن منى
ها ولج تردين تبوكيهن هاى من خالى هديه
كتله بس هو انطانياهن
ولج انت شتسوين بالفلوس وين تصرفيهن
محتاجه ملابس
امى عدهه وخواتى اخذى منهن
شنو اخذ مستعمل
ولج زايد عليج موزين ملفيج بين اربع حيطان وشايله اسمى وعصب على وموتنى ضرب لان شويه لاسنته
ورة شهر حملت وبدين اتوحم اشتهيت عنب
عفيه محمود جيبلي عنب مشتهيه
انجبي ولج تشهين براسي
ظلت حسر
ه بكلبي كبرت بطني وانى هذا حالى يوم اتعس من يوم ماشفت يوم راحه بيت عيالى
للحكايه بقيه   f