"Hiling"
Ilang daang lampara pa ba ang kailangan niyang kiskisin?
Ilang libong bulong pa ba sa mga nagbabagsakang mga bituin?
Ilang barya pa ba ang ihuhulog sa ilalim ng balon?
Ilang natanggal na pilik-mata pa ba ang maitatapon?
Ilang beses niya ba dapat sigawan ang buwan?
Ilang kilometro pa ang kailangan niyang lakaran?
Ilang dasal pa ba bago marinig ng may kapal?
Ilang luha pa ba ang ilalabas ng taong napapagal?
Ilang beses ba siyang dapat tumawag bago may sumagot?
Ilang beses ba muna dapat madurog bago sa piraso niya ay may dumampot?
Simpleng mga bagay lang ang nais niya.
Isang simpleng hiling lang naman talaga.
Pero bakit ang mga imposibleng hiling ng iba ay mas madaling maibigay kaysa sa simpleng kahilingan niya?
Sana sa pagkakataong ito ay mapakinggan mo ang kaniyang hiling. Sana sa pagkakataong ito, siya naman ay dinggin.
Dahil nakakapagod din.
Nakakapagod na.
