زملائي اعزائي
صيادله اصحاب صيدليات وموظفين ومساعدين.. (وطلابنا صيادله المستقبل)
كل عام وانتم بألف خير ..
موضوع الموظف اللي بيترك او صاحب الصيدلية اللي بينهي عمل موظف عنده :
قبل انتهاء اول ٣ أشهر بيحق لصاحب الصيدليه ينهي عمل الموظف.. وهذا ما بيكون فصل تعسفي .. اذا بعد ال٣ اشهر بيوم واحد بيصير فصل تعسفي .. سواء بينهما عقد أو لأ ..(نفس الشي الموظف خلال اول ثلاث اشهر اي وقت بيحب يترك شغله مش مطلوب منه يقدم شهر انذار ..وله ان يأخذ راتبه حسب عدد الايام اللي داومها). .هذه قضيه عماليه .. يعني بيشكي عند وزاره العمل والعمال .. ومع هيك .. النقابه موجوده .. لانه هذه مشكله بين اعضاءها .. منحب نصلح بين الطرفين من غير ما توصل القصص محاكم .. ورفع قضايا .. يعني مش عيب نستدعي الطرفين نسمع منهما ونحاول نحل المشكله ودياً والحقوق ترجع لاصحابها .. .. النقابة لا تنحاز الا للحق ولا تقبل بالظلم بين الزملاء من صيدلي ومسؤول.. شروط التعاقد من اولها تفاهموا عليها ..
حقك بالعطل ، ساعات الدوام ، الإضافي حسب عطل الحكومه اللي بالجريده الساعه بساعه ونص.. الضمان اجباري.. الراتب بيتحدد .. اللي اوله شرط اخره رضى.. ما حد بيغصب حد على شغل ..
كل فرد يعرف حقوقه ويعرف واجباته ..الله يرضى عليكم .. كلها نفس المشاكل والقصص.. مش مرتاح بشغلك دوّر على غيره.. صاحب الصيدليه بعد اول ثلاث أشهر من حقه تعطيه شهر انذار اذا بدك تترك شغلك.. شهر الانذار بيكون ٣٠ يوم وإنما لو صاحب الصيدلية بده ينهي عقدك لازم تداوم ٢١ يوم بتاخذ فيه معاش شهر كامل..(بالاضافه لمبلغ الفصل التعسفي).. عشان تعطيه فرصه يشوف حد بدالك ..
اللي بدي اقوله .. انه الصيدلي سواء صاحب الصيدليه او الموظف سمعته بالدنيا .. تعامله اذا بما يرضي الله .. الكل رح يعرف.. واذا تعامله سيء رح ينعرف.. اذا صاحب صيدليه رح يتغلب لما يلاقي حد .. لانه الكل رح يقول عنه : اوعك تشتغل عنده !! والموظف اذا ما بيشتغل مزبوط ما رح حد يشغله ..
ما في شك انه الناس مختلفه الطباع ومش كل حد بيزبط مع الكل .. بس في حدود للتعامل المحترم بين الزملاء.. اي تجاوز من أي طرف .. عادي مش قصه.. كل شي له حل ..
ملاحظه اخيره حابه أضيفها .. انه عقود العمل جاهزه بالنقابه وأول ما تتفعل لجنه الموظفين ممكن التواصل معها لتوقيع العقود وضمان الحقوق ..
ويعطيكم الف عافيه 🌹🌹🌹🌹
#فنجان_القهوه_بيجيب_نتيجه💐
#لا_نصدر_احكام_قبل_سماع_كل_الاطراف💐
#باب_النقابه_مفتووووووح_للجميع💐
