للحب كلمة

١

يااااا يا امي قلت ليك بمشي وبرجع سريع مافي داعي للقلق دا كله ....
يابتي انا خايفه عليك انتي ح ترجعي متاخر وتاني شي انتي ما قاعده تسمعي للبحصل للبنات الأيام دي ...
بحصل شنو يااااا امي ما تسمعي كلام حبوبه حبوبه دي النهار كله تقعد تقرا في جريده الدار وتجي تملي ليك رأسك وانتي تصديقها وثانيا انتي عارفه أني ماشه عشان مقابله الشغل ...
المقابله دي ما ممكن تبقي بالنهار ....
امي هدي صحبتي قالت انه الدكتور شغال في المستشفي الصباح عشان بكون عنده عمليات وفي المساء بشتغل في العياده وهو قال ليها خليها تجي العياده ...
طيب طيب خلاص انا ح امشي معاكي ...
طيب يا امي اذا دا بريحك أرح امشي البسي عشان ما نتأخر علي المواعيد ....
لا لا لا لا سريع الفح توبي ونطلع
وجرت محاسن تلبس توبها عبد الواحد وهنا بقت البت تكمل لبسها كانت جميله سمراويه وعيونها كبار ورموشها سودا وطويله وشعرها اسود وزي الحرير متوسطه الطول وجسمها حلو وناعم وهي بتخت الروج جات حبوبتها السره داخله عليها وبحلقت السره في بت بتها
وب علي دا شنو البتعمليهو في خشمك يا قليله الأدب ...
حبوبه دا روج وعادي البنات بختو وين قله الأدب في دي ....
والله نحنا زمان كنّا نجلبط بزيت السمسم ونطلع ومع الشمس تلقي الوحده فينا تلمع من بعيد ....
ههههههه زيت سمسم عاد بالغتي بوليغ ...
ما انتو بنات الزمن دا لا بعجبكم العجب ولا الصيام في رجب ...
اها انا لبست ...
اتلفت السره علي بتها الكانت لابسه توبها وقالت ليها انتي ماشه معاها ...
اي يا امي ما بخليها تمشي براها وعشان اطمن كمان ح تشتغل وين ...
غايتو انا ما عارفه لازوم الشغل دا شنو ....
يا حبوبه انتي عارفه ظروفنا واخوي عرسو كمان شهر يعني هو هسي ما مقصر وشايلنا بعد ما ابوي مات الله يرحمه بس بعد عرسه ما عارفين مرته ح ترضي بصرفه علينا ولا عشان كدا لازم يكون عندنا دخل تاني ....
قلتي شنو مرته تقول لا خليها بس تعمل حاجه والله اقعد فيها وافطسها ليكم ....
هههههه طيب يا حبوبه يلا يا امي ....
وطلعت سماح مع امها وقبل ما تفتح الباب الام اتلفت علي امها وقالت ليها يمه اوعك تخلي ساره تطلع ...
تطلع وين انا قاعده ليها في الحوش وعكازي معاي خليها تقرب بس من خشم الباب بكسرها ليك رجلينها الممكعوجات ...
ابتسمت الام وطلعت مع بتها وهي بتدعي لي بتها يقبلوها في الشغل عشان كلام بتها صاح ما بعرفو مره الولد الجايه ح تكون كويسه ولا ح تتعبهم وخاصه انو ولدها بعد ما كان مقرر انه يسكن برا امس غير كلامه وقال ح يسكن معاهم عشان يوفر حق الايجار خاصه بعد ما لقي الاجارات غاليه ومشو علي الظلط يركبو المواصلات ... هنا لبست ساره عبايتها وبقت تتسحب عشان تمرق بس الحبوبه قاعده ليها زي شوكه الحوت رجعت الصاله وطلعت تلفونها عشان تتصل ....
😍😍بيت العروس 😍😍
لبني افهميني عليك الله ... افهم شنو يا خالد انا مع اهلك مستحيل اسكن انت وعدتني انو ح يكون عندي بيت برأي ... يا لبني انتي عارفه ظروفي نسكن مؤقتا عند ناس امي وبعدها ربك بدبرها وقعد يحاول معاها لحد ما اقنعها .... قامت الحبوبه تدخل الحمام وهنا ساره انتهزت الفرصه وجرت علي الباب فتحته وطلعت تجري لمن نفسها قام السره طلعت من الحمام لقت الباب مفتوح وووووب علي البت خلتني دخلت الحمام وجرت طلعت تطلع روحك يا ساره السجم هسي أقول لي امها شنو الله لا كسبك يا ساره دخلت عليها جارتهم تهاني صحبه بتها وهي بتضحك مالك يا حجه بتكوركي صوتك سمعتو وانا في بيتنا ... مخير الله وطبعا اول ما سمعتي صوتي جيتي جاريه تتشمشري يا شمشاره ما اليوم كله حايمه من بيت لي بيت ومن جبنه لي جبنه تلقطي الاخبار بقيتي زي ناس الدار ....
ههههه حرام عليك يا خالتي انا اصلا كنت جايه عليكم الانبوبه قطعت و قلت لحد ما يجي راجلي يعبيها اجي اعمل الشاي حق المغرب راسي واجعني ...
وطبعا جايه تعملي شايك هنا الغاز دا ما غالي وكمان معدوم وأبشرك الانبوبه حقتنا فاضيه امشي ولعي فحم في بيتكم واعملي الشاي وناوليني كبايه ....
بالجد يا حجه غازكم قاطع ...
شوف المره يعني انا بكدب عليك ...
لا والله حاشاك بس مافي مشكله بولع لي فحم واكيد عندكم ...
يا بت ما تمشي بيتك تولعي فحمك ...
وسابتها تهاني بتتكلم ومشت علي المطبخ عشان تشوف ليها فحم ....
الحجه نهاي ما عجبها التصرف وقالت ان شاءالله ما تلقي حته فحم ....
وهنا جاها صوت تهاني وهي بتقول خلاص يا خالتي لقيت الهيتر مافي داعي للفحم ...
وب علي الكهرباء ان شاءالله كهرباء تطقك يا بعيده ....
بتقولي حاجه يا خالتي ....
يخلخل ضروسك ويطول شطورك ....
وتهاني سامعه وميته ضحك اي ام محاسن كلامها كدا بس قلبها طيب ....
وقَعَدت حجه السره تفرك في يدها ....
يا خالتي اعمل ليك معاي كبايه ...
شاي احمر ولا باللبن ...
باللبن طبعا ...
بس خساره لبنا انتهي ....
مافي مشكله انا جايبه معاي شويه لبن ...
وجايبه السكر معاك كمان ....
اي جايبه اه أعمل ليك احمر ولا باللبن ....
وقت جايبه حاجاتك اعملي لي بس بالكبايه الكبيره وكتري اللبن والسكر ....
حاضر يا خالتي ....
يحضر ليك شيطان يلفحك قولي امين ....
بتقولي حاجه ....
لا بقول ليك تحضري ما تغيبي يا بتي ....
وشويه وطلعت تهاني بالصينية وجرت ليها بنبر وختت الشاي جنب حجه السره اتناولت السره كبايه الشاي وشفطت ليها شفطه ....
اه مظبوط ...
مظبوط يختي يلا كدا ادينا شمار الحله ....
وب علي يا خالتي ما شفتي سعاد عاد والخير الجاها ....
سعاد وخير كمان الجمله ما جايه ابدا الحجه مثقفه طبعا وعامله نفسها مشخصاتيه ...
قالو جاها عريس لي بتها وجاب الخير كله ...
عريس ودا حصل متين الما سمعنا لينا زغروده ولا شفنا لينا حلاوه بتتقسم ....
ما قالو مكتمين علي الموضوع خايفين من العين ...
وقت مكتمين علي الخبر انتي يا نشره تسعه عرفتي كيف ....
انتي ناسيه يا خالتي السره سعاد قريبتي من بعيد ....
عارفين يا ستي حسستيني انك قريبه الوزير اه كملي العريس قريبكم يعني ....
لالالالا دا غريب ومغترب في لندن ...
لندن عديل كدا والله ولقتها بتها العورا...
يا خالتي البت ما عورا عندها حور في عينها بس وكمان سمحه وصغيره بس ما قلتي لي وين محاسن ....
محاسن مشت مع بتها عشان الشغل ...
الله يوفقها ويديها عريس زي عريس بت سعاد يريحها ...
امين يختي ....
😘😘😘
ساره تعالي نطلع فوق عاوزه اوريك ...شي .... لالالا انا اتاخرت انا بس جيت أُرجع ليكي الروايه واشيل وحده تانيه .... ياخ تعالي ما بأخرك ...طيب أرح وطلعو السطوح وهناك ... مشت علي ركن في السطوح وزحت السرير ودنقرت رفعت حاجه من الارض ... دا شنو ... ههههه دي هديه جابها لي ... حبيبي ... الله حلوه بس انتي ما كنتي تختيها في دولابك ما خايفه انها تضيع وانتي ختاها هنا ... لالالالا ما بقدر اختها جوا ما انتي عارفه. اختي بتجي تفتش لي في الدولاب وخفت انها تشوفها وتكلم ابوي ... طيب اديني ليها ادسها ليك عندي ... والله فكره بس انتبهي عليها دي دهب ... يختي بنتبه بنتبه ... ومسكت الخاتم تعاين ليهو وهي عينها عاوزه تطلع عليهو ... وهي من زمان نفسها تشوف حبيبها دا لكن صحِبتها ما عاوزه تعرفها عليهو ... ونزلت ساره من فوق ومشت علي الباب وهي عاوزه تطلع ... تلقي ليك اخو صحِبتها داخل .... سلم عليها وهو اصلا كان معجب بيها شديد بس هي ما جايبه ليهو خبر كان طموحها اكبر من انو تحب واحد وتعرسه ويسكنها في نفس الحله طلعت ساره ومشت علي البيت .... واول ما وصلت تلقي ليك الحبوبه وتهاني قاعدين .... واول ما لمحتها الحبوبه صرخت فيها وقالت ليها انتي يكسر ركبك ان شاءالله يا بتاعه الشوارع يا صايعه مشيتي وين ...يا حبوبه مالك بتدعي علي انا مشيت لي هناء صحبتي وديت ليها كتاب ... يكتبك فكي قولي امين ... اجي يا حبوبه فكي عديل كدا اعوز بالله ... الله يكسرك قولي امين وقامت بعكازها عليها وساره فكت الجريه وتهاني تمسك فيها والحبوبه حالفه تضربها ...يا خالتي استهدي بالله انتي عندك السكر احسن ما يرتفع عليك ...السكر اليجيها البت بقت طوالي حايمه في الشوارع اتقول عاديتيها انتي ...لا حولا ولا قوة الا بالله ليه هي الحوامه نزله عشان تتعادي كدا اقعدي واهدي .... وهنا جات داخله محاسن براها ...في شنو مالك يمه بتكوركي ... بتك يختي خلتني دخلت الحمام وجرت مرقت ... خليها لمن يجي اخوها يادبها ... اه وأنتو عملتو شنو ووين سماح ... سماح الحمدلله الدكتور وافق واستلمت الشغل كمان ... الحمدلله يا محاسن مبروك ... تهاني ما سلمت عليك مع كوراك امي ازيك .... اهلًا محاسن ... اه المرتب كم ... نطت الحبوبه وقالت ليها ٧٠٠جنيه بس .... ابتسمت محاسن وعرفت انه امها ما عاوزها تقول ليها ... ...٧٠٠بس بسيطه والله ....نعمل شنو يمكن لقدام يزيدها ... الله يوفقها ...امين .... وسماح مبسوطه بشغلها وخاصه انه المرتب حلو ومغري .... بس الساعه حداشر تخلص وكيف ترجع .... وهنا جات داخله عليها بت سنها تقريبا في التلاتين وسلمت عليها وقالت ليها اخيرا الدكتور لقي موظفه علي فكره انا رشا شغاله في العياده الجنبكم مع دكتوره إقبال للنساء والتوليد انتي منو ... انا سماح ...عاشت الأسامي يا عسل .... وقَعَدت جنبها وقالت ليها انتي ساكنه وين ...في الصحافه ... طيب حلو جنبنا ...انتي ساكنه في الصحافه ... لا انا في الامتداد الدرجه التالته .... انتي طولتي في الشغل ...اي لي كم سنه ... طيب كويس ...ان شاءالله تنبسطي في الشغل ...ان شاءالله بس المشكله في مواعيد الطلوع ... اي صح الساعه حداشر متاخر بس نعمل شنو اكل العيش مر علي قول المصريين ... انتي بترجعي بالمواصلات ... لا لالالا موصلات شنو بالليل دا نحنا مأجرين لينا امجاد انا ومعاي بت تانيه لو حابه ممكن تشتركي معانا ...والله كويس بس ما يكون الايجار غالي عشان ظروفي ما بتسمح .... واتعدلت رشا في قعدتها وقالت ليها عايني حبيبتي الزول حق الامجاد زول طيب وغير كدا البت المعاي ساكنه في الصحافه ودا من حظك .يعني ما ح تدفعي كتير لانه المشوار واحد وانا بكلمه ليم ...طيب الحمدلله الله عالم بحالتي ...يلا خلاص أخليك تشتغلي وبعدين بجي بسوقك معاي لمن تجي الامجاد وشكرتها سماح ومشت ارتاحت سماح عشان موضوع الرجعه اتحل وبدت في شغلها وبدت تدخل المرضي لدكتور وتنظم المواعيد بعد ما خلصت والدكتور طلع دخلت نضفت العياده وقفلتها وشالت شنطتها وجات مارقه لقت رشا ومعاها وحده عرفتهم علي بعض وطلعو طوالي وقفت رشا مع حق الامجاد واتفقت معاه علي سماح وهو وافق علي طول وخاصه انه المشوار ح يبقي واحد ورعاها في الايجار وركبت معاهم ومشو نزلو رشا في الامتداد وبعدها هي وهاله مشو وطلع بيت هاله قبل بيت سماح بي اربعه شوارع وبقت سماح براها في الامجاد وأتحرك بيها وصفت ليهو البيت ومشي وصلها ونزلت وقال ليها علي مواعيد المشيه في العصر وشكرته ودخلت البيت لقت الام وأخوها وحبوبتها قاعدين منتظرين واول ما شافتها الام حمدت ربها ان بتها رجعت كويسه وبقت سماح تحكي ليهم عن الشغل وكانت مبسوطه وحكت ليهم عن رشا والأمجاد ...والله دي دعوه امّك الله يجازيها بالخير رشا دي .... اي والله يا حبوبه كنت شايله هم علي الرجعه ....ليه يا سماح تشتغلي انا مقصر معاكم يعني ....لا يا اخوي والله انت ما مقصر بس انت داخل علي عرس لازم نساعد بعض ...اطمن يا خالد انا مشيت معاها قبيل والدكتور باين ليهوعليعا ولد حلال والمرتب كبير أهو نتساعد مع بعض انت احكي لي خطيبتك وافقت علي سكنتها معانا ...شنو وهي ترفض لشنو هي وين تلقي بيت زي دا وناس زينا خليها بس ترفض والله بكره اشوف ليهو عروس تانيه .... الحق حبوبتك دي ح تكون سبب في خراب بيتك قبل ما تدخل ...قلتي شنو يا مفعوصه ....لالالالا ما قلت اي حاجه وغيرت الموضوع طوالي وقالت لي امها اه تعشيتو ولا لِسَّه ... لا يا بتي كنّا منتظرينك هسي بختو ...خلاص انا بغير هدومي وبجي بساعدك ....لا يا سماح انتي جايه من الشغل وتعبانه نادي الست الراقده جوا تساعدني .... مشت سماح عشان تغير وهنا تدخل علي اختها اول شي ساره قومي ختي العشاء مع امي .... انا تعبانه ما قادره ...تعبانه في شنو الجامعه وأجازه واليوم كله من التلفزيون لي التلفون ...اه خلاص سليتي لسانك عشان اشتغلتي وح تصرفي ...ساره كيف بتفكري فيني كدا يعني لمن أقول ليك قومي ختي العشاء معناه اني عشان اشتغلت بقيت اعمل كدا ....اوف خلاص قايمه وقامت وهي بتنقنق ومشت المطبخ ولقت امها بتظبط الفول .... فتحت التلاجه وطلعت البيض وبقت تعمل فيهو جاء خالد وقال امي عليك الله اعملي لي سلطه دكوه بالطماطم ...طيب يا ولدي .... ومشي خالد ياخد ليهو حمام لحد ما يعملو العشاء ولقي المويه قاطعه وبقي ينادي ياااااا ساره ياااا ساره افتحي كدا الموتور المويه مافي ... اوف اوف اوف مافي غير ساره في البيت دا ومشت فتحت الموتور وجات تكمل باقي العشاء
وطلع خالد من الحمام وهو بنقنق وبقول يعني قصه المويه دي ما ح تنتهي بالجد حاجه تحرق الدم ومشي قعد معاهم والعشاء كله سماح تحكي ليهم عن العياده والشغل وبعد ما خلصو كل واحد مشي علي سريره
..... وفي صباح يوم الجمعه الكل نايم وفجاه الباب بقي يدق بصوره مزعجه الكل قام مخلوع وجرا خالد علي الباب واول ما فتح الباب يلقي ليك شاب وسيم واقف شكلو جاي من السفر ودا من الشنطه الكانت معاه ...استغرب خالد وخاصه انه ما بعرفه بس سلم عليهو وقال خير يا اخوي عاوز منو .... ابتسم الشاب وقال ليهو دا بيت حسن عابدين ...هز خالد راْسه وقال ليهو ايوه بس انت منو ... ابتسم الشاب مره تانيه وقال ليهو انا حسام محمد عابدين ولد عمك ... ولد عمي محمد وكان عمو محمد دا بسمعو بيهو سمع ساي من ابوهم الله يرحمه وانه عايش في لندن من زمان وليهو اكتر من خمسه وعشرين سنه ما رجع السودان أخده خالد بالاحضان وقال ليهو مرحب بولد العم انا خالد ولد عمك حسن سلم عليه حسام وهنا يسمع صوت امه بتقول دا منو يا خالد ... رفع الشنطه خالد وقال ليهو اتفضل وشويه كان في وسط الحوش وحولينهو الحبوبه والام والبنات الكل بقي يعين لتاني وفي عيونهم الف سوْال دا منو الجاي بشنطتو من وش الصبح ابتسم خالد بعد ما عرف من نظراتهم انهم عاوزين يعرفو دا منو قال ليهو يا جماعه دا حسام ولد عمي محمد ... ابتسمت محاسن ومشت عليهو تسلم اهلًا ياولدي. حمدلله علي السلامه ... الله يسلمك خالتو ... وسلم علي الكل ودخلو جوا وقعد وسطهم وهنا السره بدون مقدمات بقت تسأل فيهو و قالت ليهو شنو الجابك السودان بعد الغيبه دي كلها وعرفت دربنا كيفن ... والله الحاج دايما كان بحكي لينا عن السودان وعنا بيت جدي وانا من زمان نفسي ارجع بس الوالد ما كان راضي .... وكيفن رضا هسي .... الحاج اتوفي الله يرحمه ... لا حولا ولا قوه الا بالله البركه فيك يا ولدي والكل عز حسام. وقال حسام وانا لمن لقيت نفسي بقيت برأي قلت اجي اشوف اهلي وأكون وسطهم ... مسكه خالد من يده وقال ليهم اهلًا بيك بين اهلك ونورت بيت جدك ... الله ينور عليك يا خالد .... وبقي يعرف خالد حسام علي أخواته وقال ليهو دي سماح ودي ساره بنات عمك ... اهلًا بيكم ابتسمت سماح بخجل وحست بي احساس جميل اتجاه اما ساره فرحت بولد العم الظهر فجاءه و وخاصه انه مزززززز وجاي من لندن وقامو علي المطبخ يجهزو الفطور لولد العم ومحاسن مبسوطه بي حسام خاصه انه يتيم ومن اهل راجلها وكيف كانت بتسمع راجلها وهو بتمني يشوف اخوه بس مات وما لحق يشوفو بس ياربي امه وين ومالها ما جات معاه اصلها من يومها شايفه نفسها وياربي ليه حسام ما نزل عند اهل امه خاصه وهم ناس مروقين.
بس يا خبر اليوم بقروش بكره يبقي ببلاش ... وحسام وخالد داقين الونسه وشكلهم انسجمو مع بعض وحسام بحكي ليهو كيف وصل ليهم هو كان عارف الحله ومربع كم بس البيت وين ما كان بعرفو وكيف بدا يسال لحد ما وصل ليهم ....