للحب كلمة

٣

ابتسمت ساره بخبث وهي بتسلم علي هناء الكانت مصدومه اول ما شافت ساره وهي بتسلم عليها قالت ليها سبحان الله دستيهو مني وطلع ولد خالو لولد عمتي هههههههه .... اتغاظت هناء بس ما حاولت تظهر غيظها لي ساره واستغربت في الصدفه الغريبه دي اي انا كنت ما عاوزه وحده من صحباتي يعرفو حبيبي وخاصه ساره والبوجع انها اول وحده من صحباتي تشوفو كمان والله غريبه ... قالت هناء كلمه غريبه بدون ما تحس بصوت مسموع اتلفتت عليها ساره وهي بتقول صحي الدنيا دي غريبه وغمزتها بعينها وقالت بس الشباب الفيها مزززززز ههههههه انتي مالك يعني زعلانه دا كله عشان شفت حبيبك يعني .... انا لالالالا منو القال ليك اني زعلانه بس بقول صدفه غريبه وتعالي هنا انتي ما برضو دسيتي علي حبيبك ....دسيت شنو يختي انا واضحه زي الشمس اولا دا ما حبيبي دا ولد عمي ..... ههههه عاوزه تقنعيني انه بس ولد عمك يعني مافي شي كدا ولا كدا ....وقبل ما تجاوب ساره جو الشباب ومعاهم الايسكريم
😘😘😘
تاني يوم جاء العفش البيت ومحاسن استغربت وخاصه انه من الليل بتها طلعت الكنب القديم برا وقدر ما سألتها ليه طلعتيو تقول ليها خالد قال بنجده ... ولمن جاء العفش الجديد ما رضت الخاله وقالت لي حسام حرام يا ولدي تضيع قروشك انت العملتو ما عملو زول كفايه انت ما قصرت ... ليه يا خالتي بتقولي كدا ودا بيت العيله لازم يكون احسن بيت في الحي كله وغير كدا انا من جيت ودخلت بيتك انت بتعامليني زي خالد ويمكن احسن منه ودا ما شي سهل عندي وما حسستيني اني غريب عنكم رغم انه دي اول مره اشوفكم فيها ومشي باس ليها علي رأسها .... تسلم يا ولدي ودا بيتك كمان وانا ما عملت الا الواجب ....الحبوبه جات تتقدل وقالت عاد حسام ما كله زوق ....تسلمي يا حبوبه ....جات سماح لابسه وعاوزه تطلع وشافت العفش وأبدت إعجابها الشديد وقالت ليهو زوقك حلو والله يا حسام ....لا والله يا سماح دا زوق ساره ... والله كأنه رشاها بجردل مويه بارد ساره واقفه ولاحظت لي اختها والتغير الحصل ليها ودا ما ريحها ياربي مالها سماح زعلت .... طلعت طوالي مشت علي الترحيل وقبل ما تطلع قال ليها حسام علي فكره يا سماح دا اخر شهر ليك في الشغل ... التفتت عليهو وهي مخلوعه وقبل ما تسالو عن السبب امها طوالي قامت سالته ليه يا ولدي في حاجه سمعت شي كعب يا ولدي عن شغلها ...وقبل ما يجاوب حسام قالت الحبوبه غايتو يا محاسن بقيتي مخك تخين جنس تخن يعني انتي ما عارفه بالعياده البفتحها حسام اكيد عاوز سماح تشتغل معاه ....ضحك حسام وقال ليها كلام حبوبه صاح ابقي انا موجود وانتي تمشي تشتغلي عند الغريب ... ولأول مره تبتسم سماح وحست انه حسام بفكر فيها وبغير عليها وطوالي قالت ليهو البتشوفو يا ولد عمي انا موافقه عليهم جرت ساره عليها وقالت ليها مبروك يا سماح فرحت ليك الشغل مع سحس ح يكون غير .... ردت عليها ببرود سماح وقالت ليها شكرًا وطوالي طلعت ساره ما اشتغلت بالموضوع كتير وجرت علي حسام وجرتو وقالت ليهو يلا نرتب العفش وحسام بقي معاها يرتب والام مشت علي المطبخ فرحانه يااااا اخيرا البيت بقي بيت بعد الطقم الحلو دا وحتي المطبخ بعد ما ضربو ليها بقي نضيف قعدت تعاين لدولاب المطبخ وقالت دا لازم ليهو تغير انا أبيع الطقم القديم واشيل من سماح أتم عليهو وأجيب واحد جديد
جاء خالد من شغله وشاف الصالون بقي يقول دا شنو يا ربي أكون دخلت بيت تاني ولا شنو وهنا جات ساره وقالت ليهو لا وحياتك دا بيتنا ....دا من وين ومنو الجابو ....يا حليلو حسام لمن اشتري لشقته الفرش قال الا يجيب لي امي طقم وساقني معاه عشان انقي معاه ...لا ياخ والله دا كتير وانتي كيف وافقتي الولد وراه مصاريف عيادته يعني مافي داعي نكلف عليهو ... والله قدر ما رفضت هو كان مصر ...الله يقدرنا علي جازه بس ... المهم انت عملت شنو في طقمك ... ياخ انا كنت عامل حسابي علي غرفه نوم بسيطه والباقي افرش بيهو الصاله بس
لبني اختارت لي غرفه نوم غاليه شديد شالت كل المعاي وغير المكيفات الركبتها في الصاله والغرفة ... طيب والعمل يعني انت ما معاك ولا شي .... لا والله يا ساره المعاي يادوب ليوم العرس والنادي والفنان ... كانت امه واقفه قريب منهم وسمعته طوالي دخلت جوا وقَعَدت في الاوضه تفكر تعمل شنو وووين لمن جاتها فكره طوالي قامت لبست توبها وشالت محفظتها ومشت لي اختها واول ما وصلت سلمت عليها اختها ودخلتها .... سلمي انا جايه وكلي عشم فيك بعد الله سبحانه وتعالي .... خير يا محاسن مالك فيك شنو .... وحكت ليها محاسن عن ظروفها وطلبت منها سلفه تجيب الطقم لي ولدها وبعدين من مرتب سماح كل شهر بتديها حاجه ... يخسي عليك يا محاسن في بينا سلف انتي ما عارفه خالد مكانته شنو في قلبي ...اي عارفه والله بس دا حقك ولازم تاخديهو. ...انتي اسكتي بس وطقم خالد علي بكره بكون عندك ... وبكت محاسن وحضنت اختها وبقت تشكر فيها وسلمي بتقول ليها عيب عليك ما بينا شكر أنتي اطمني بس وانا لو كانت عندي بت ما كنت فوت خالد من يدي بس ملحوقه ان شاءالله يكون ولدي نصيبه عندك .... عارفه محاسن انه اختها ما عندها غير ولدها لؤي وحيدها .... ان شاءالله الله يجيب الفيهو الخير و هو كيف لؤي ...كويس والله أهو شغال مع ابوه في المصنع .... خساره الولد دا ما كمل قرايته ... نقول شنو راْسه مافي القرايه عاوز يختي يلم في القروش زي ابوه ....ههههههه الله يديهو ويراضيهو ...امين يختي .... اه انقوم نسوي لينا شاي باللبن مظبوط ....لالالالا مافي داعي انا ماشه ... تمشي وين والله ما بتمشي الا تشربي الشاي معاي وبعد شويه لؤي بجي البيت منو تشوفيهو ويوصلك .... وقَعَدت معاها محاسن بعد ما اختها مسكت فيها ....
😍😍😍😍
حبوبه امي مشت وين ... بري ما بعرف قالت ماشه مشوار .... طيب انا ماشه عند هناء صحبتي ... تمشي بطنك قولي امين انتي ما بتتهدي اربعه وعشرين ساعه لافه زي المكوك كراعينك دي ما بتتعب .... حبوبه يا عسل بمشي دقايق وبجي ... بلا دقايق بلا ذفت خليك قاعده في البيت احسن والله أقوم ليك بعكازي دا ..... وعلي شنو خليني مرزوعه جنبك ....اي اترزعي رزعه تاخدك ... غايتو يا حبوبه جنك دعاوي .... قلتي شنو يا مقصوفه .... ما قلت ولا شي .... وقَعَدت الحبوبه وعينها علي ساره الكانت بتقلب في التلفون وهنا فجاءه حبوبتها سألتها قالت ليها البت الكانت عندها مشكله في القروب البتقولي عليهو داك عملت شنو في مشكلتها .... بري ما بعرف شايفه البنات بدوها نصائح ... اسمعي ما دخلوني معاكم في القروب دا .....هههههههه بالغتي يا حبوبه دا قروب شباب وانتي كبيره في السن ما بتقدري تجاري البنات ديل ....سنك يتكسر يا كريهة وتاني شي انا بيني وبين امّك بس عشره سنين قائله اني كبيره ..... صغيره وعديتها ليك بس اكبر من امي بعشره سنوات دي كبيره صراحه يعني علي أساس انك عرستي وعمرك تسعه سنوات .... شنو شنو وانتي البعرفك شنو يا قليله الأدب انتي اصلا ما عارفه نحنا زمان بنعرس صغار ما زيكم دخلتو العشرين ولسه بايرات ومجهجهات كان يا ساره ما تقولي لي صحباتك البايرات زيك في القروب .... هههههه بايرات عديل كدا الله يسامحك اه عاوزه أقول ليهم شنو .... خليهم يعملو قروب ويسمو بايرات ومجهجهات وفي وش حبوباتنا مصنقرات .... وساره دي بالضحك لمن بكت وما سكتت الا لمن جات امها داخله ومعاها لؤي .... مالك يا بت. صوت ضحكك سامعهو برا في الشارع ... لالالالا يا امي بس حبوبه قالت لي نكته ... بري ولا قلت ليها نكته ولا حاجه انتي ما عارفه بتك ولا شنو واول ما دخل لؤي ساره جرت عليهو وبقت تقول اهلًا يا لؤي وينك كدا مختفي .... اهلًا يا ساره قاعد والله بس الشغل والدرش انسي بس حبوبه ازيك ....تحبك القراده ....ليه بس يا حبوبه مالك علي ... لا تقول حبوبتي دي امشي اسلم عليها ولا حتي أسوقها افسحها خليها تشم هواء ربنا دا شويه بس شابك تخمخم في القروش زي ابوك .... هههههه حرام عليك يا حبوبه ولا تزعلي نفسك نحنا فيها يلا هسي امشي معاي افسحك رايك شنو يا حبوبه ...سمح بس علي شرط تعشيني في المحل دا البقولو عليهو ناس ساره ألفي الرياض .... ضحك وقال ليها ابشري رايك شنو يا خاله تمشي معانا انتي وساره ،...لا يا ولدي امشو انتو انا عندي الف شغله عاوزه اعملها ما تنسي العرس قرب ....الله يتمم علي خير ... عقبالك ان شاءالله يا ولدي .... عاين لي ساره وابتسم وقال امين انت بس ادعي لي الله يقرب البعيد ..... وساره عينها في قروبها والبحصل في القروبات والشكلات المدوره بين البنات ...ساره ساره ...اي يا لؤي اه تمشي معانا .... وين ...نفسح حبوبه ونعشيها ... جدا يا باسطه ثانيه بس اقشر واجيكم .... وجرت ساره تشوف ليها حاجه تلبسها ومحاسن مشت تجيب لي امها توب وشبشب للطلعه وهنا اتلفتت عليهو الحبوبه وقالت ليهو شفتها جرت كيف جنها شوارع البت دي يا حليل سماح هسي لو ما كانت في الشغل كانت مشت معانا بت عاقله ومحترمه ما زي مكنسه الشوارع دي ...... مره تانيه مره تانيه