للحب كلمة

٥

هناء يا حسام هناء بت خالتها اتصلت علي وقالت انه هناء اتوفت في حادث ... لا حولا ولا قوة الا بالله استهدي بالله يا ساره الله يرحمها ادعي ليها .... جاء لؤي زي الشيطان زحاها من حسام بكل قوه وهنا حسام عاوز يتكلم ويسأله ليه بتعامل كدا بس الجو غير مناسب .... الحبوبه وصلت نفسها مقطوع فييييي شنو يا بت امّك حصلت ليها حاجه ... رد حسام وقال ليها لا يا حبوبه خالتو محاسن كويسه ...طيب في شنو اخوانك حصل عليهم شي ...لا يا حبوبه دي هناء صحبه ساره اتوفت ...شنو لا حولا ولا قوة الا بالله كَر علي البت لِسَّه صغيره وجاء نزار والبنات طالعين يشوفو الحاصل شنو وبس نزار يسمع وبالحاصل يتصدم وبقي ما قادر يتصرف ولا قادر يبكي ولا عارف يعمل شنو الكل طلع ونزار اصر يمشي مع ساره الكانت منهاره عاوز يمشي يودع حبيبته والكل أتحرك ومشو علي الصحافه يلقو البيت مافيهو ولا اي شي الحله هاديه وبيتهم هادي .... اتلفتت الحبوبه علي ساره وقالت ليها البيت مافيهو صوت انتي منو الكلمك ... بت خالتها يا حبوبه .... بس اه البيت مافيهو اي صوت بكاء ..... ما عارفه يا حبوبه كدا خليني انزل وأشوف ... نزلت ساره وبهناك نزل نزار ونزلت اخته وبت خالتو عشان ما ظريفه يمشي هو براه وكلهم بقو واقفين برا ساره تعاين لي حسام ...حسام هز راْسه وقال ليها اتصلي عليها اول شي .... وين تلفوني انا خليتو في الفندق الحبوبه طلعت رأسها برا العربيه وقالت ليها أهو معاي أمسكي مسكّت التلفون وهي بترجف مسكت بيدها التلفون وبيدها التانيه بقت تُمسح دموعها وبقت تدق عليها بس تلفونها مقفول .... حسام تلفونها مقفول يمكن اَهلها ما وصل ليهم الخبر وانا بصراحه بقيت ما قادره اتحمل ومشت علي الباب وعاوزه تدق بس يجي أخو هناء واقف بعربيته واول ما شاف الجماعه ديل اتخلع ونزل طوالي واول ما شاف ساره مشي عليها وقال ليها مالك يا ساره خير شنو الجابك في الوقت المتأخر دا وديل منو ... والله يا احمد ما عارفه أقول ليك شنو وهنا الحبوبه نادته احمد احمد تعال لي هنا ....حبوبه اهلًا بيك مالكم ان شاءالله مافي عوجه ... والله يا ولدي العوجه دي ما عارفه عندكم ولا عندنا المهم نحنا كنّا في فندق السلام روتانا بتعرفو داك الما بدخلو الا الناس الهاي هاي ... ضحك احمد وقال اي بعرفه ... اه بس كنّا بنتعشي في امان الله اصلو ولد بتي ما كان عازمنا هناك ... اه وبعدين ... جاء تلفون لي سارمن بت خالتك قالت قالت .... قالت شنو يا حبوبه .... والله ما عارفه أقول ليك شنو. صراحه قالو انه هناء ماتت ... شنو ماتت دا كلام شنو هناء هسي انا وصلتها عند خالتي لانه بكره سمايه بت خالتي ومشيت أودي اخواتي عندها يبيتو ... بس دقيقه اتصل عليها وطلع تلفونه واتصل علي هناء وفتح السماعه الخارجيه ... هناء وجاء صوت هناء اهلًا يا احمد اه وصلت البيت ... دا شنو الهظار السخيف العملتو في ساره .... تمتمت هناء وقالت ليهو انا ما عملت شي والله بس قلت أهظر معاها و اكذب عليها كذبت ابريل لانه اليوم يوم واحد اربعه .... طوالي جات ساره وشالت التلفون من يده وقالت ليها نهاي ما كنت بتخيل انك تتصرفي تصرف طائش زي دا ...ساره والله كنت بهظر معاك ..دا ما هظار انتي ما عارفه انك عملتي فيني شنو بس آلله يسامحك وتاني لا بيني ولا بينك ...ساره استني أفهمك وطوالي قفلت ساره في وشها السماعه وناولت التلفون لي احمد وقالت ليهو نحن اسفين للإزعاج بس ربنا ستر انك جيت وما دقينا لي عمو الباب كان جاته صدمه وخاصه انه هناء مافي البيت ...اي والله الحمدلله ابوي عنده السكري بس كله من هناء وانا ما ح اخليها علي عملتها دي لا هي ولا بت خالتي الهبله بس انتو سامحونا يا جماعه ديل بنات مراهقات ... ونزار كان نفسه يدخل التلفون ويلطشها كف مظبوط وحسام قال ليهو مافي داعي تتأسف اهم حاجه انها طلعت بخير ونحن نستأذن ... تسلم يا ...حسام انا حسام ولد عّم ساره ...مد يده احمد وقال ليهو وانا احمد سلمو علي بعض .وقال لي احمد اتشرفت بيك والله.... وانا كمان ....طيب يلا مع السلامه ومشي حسام لي نزار وقال ليهو خلاص انت امشي انا البيت قريب ...وطيب عربيتك العندنا ... ياخ بكره بجي بسوقها ... تمام يلا نزار وحمدلله علي سلامه هناء يا صاحبي ...هناء وتاني انا بعاين ليها بعد عملتها دي ...ياخ خلاص انسي ...انسي والله ما ح اخليها بس خليني ارجع البيت ...حسام حسام ... اتلفت علي ساره الكانت بتنادي عليهو تعال اركب معانا ...لالالالا انا ماشي البقاله اشتري لي سجاير امشو انتو وانا برجع بعد شويه وطوالي لؤي ما صدق حكي فرامل ومشي وهنا الحبوبه قالت ليها الله لا كسبك ولا كسب صحبتك فوتت علي العشاء ... حبوبه انتي إكلتي ما قصرتي عشاء شنو الفاتك ... يفوت فيك قطر ان شاءالله انتي وصحبتك الهبله اه دي نهايه مبارياتك للبنات المعولاقات والقليلات الأدب ... حصل خير ان شاءالله بعوضها ليكم ... تعوض شنو بس نزلني انت كمان ما الوقت كله قارط خلقتك اتقول ما راضي علي العزومه ... ونزلت الحبوبه وساره وجاء لؤي داخل معاهم اي الوقت متاخر بس لو لقي يبيت معاهم بعد ما عرف انه حسام بايت هنا ولقو خالد وسماح وأمهم قاعدين .... اه العشاء كيف كان ... اه اه اه بس من الحصل وقَعَدت الحبوبه بعد ما قلعت التوب وناولته لي سماح وقالت ليها طبقيهو كويس التوب جديد ...حاضر يا حبوبه يحضرك الخير انتي يا تقيله يا راسيه وقَعَدت ومددت كرعينها وقالت ليهم اه انحكي ليكم بالحصل وقَعَدت تحكي وتحكي والكل مخلوع وساره دي اتخارجت دخلت جوا ولؤي كان واقف اتلفت خالد وقال ليهو مالك يا لؤي ما تقعد ... وقبل ما يجاوب جاء داخل عليهم حسام وجرت محاسن عليهو وقالت ليهو وين يا ولدي اتاخرت كدا ...اتغاظ لؤي من تصرف خالتو الما عملتو معاه وهو واقف من قبيل وهنا الحبوبه قالت ليهو ماهو كان معانا هناك وشاف الحصل .... بالجد كان معاكم ...اي يا خالد جاء هو و اولاد اهله داخلين في نفس المكان الكنا فيهو .... طيب كويس والله ....ضحك حسام وقال ليهم كان يوم تحفه بس انا بستاذن يا جماعه عاوز امشي انوم تصبحو علي خير ... ...اتلفتت عليهو محاسن وقالت ليهو انت من اهله يا ولدي وخالد قال ليهو ما تقفل الباب جاي انوم معاك .... طيب يا ولد العم ودخل حسام في شقتها الكانت في الحوش التاني وهنا لؤي قال انا زاتي ح امشي ... ردت عليهو خالتو وقالت ليهو ما تقعد معانا شويه ..لا يا خالتي عاوز امشي عندي شغل كتير بكره ...طيب يا ولدي خلي بالك من الطريق وسوق براحه ...ابتسم لؤي ليها وقال ان شاءالله وقام خالد معاه يقدمو لبرا ... وبعد ما قدمو جاء راجع خالد لجوا ....ساره غيرت هدومها ومشت علي سريرها ما صدقت رقدت فيهو بعد ما قضت اللحظات الفاتت في توتر وطوالي غمضت عيونها واستسلمت للنوم جات سماح داخله لقتها نامت وقفت تعاين ليها مسافه وبعدها مشت عليها وغطتها كويس ورجعت رقدت في سريرها وحاولت تنوم بس غلبها النوم وقَعَدت تتقلب في السرير لحد ما راحت في النوم وما صحت الا علي صوت اذان الفجر قامت طوالي ومشت علي الحمام واتوضت وجات تصلي وهنا الام قامت للصلاة وشافت نور اوضه البنات مولع جات عليهم لقت سماح واقفه في المصلايه تصلي وساره بتشخر مشت عليها ساره ساره ساره انتي يا قاشره ....اوووووو اوووو مالك يا امي مالك بتصحيني خليني انوم ..قومي الصلاة الفجر إذن ...طيب طيب ح أقوم وشالت البطانية منها عشان تقوم وطلعت الام ومشت اتوضت وصلت وجات علي الاوضه تلقي سماح بتقرا قران وساره نايمه ... البت دي ما قامت ساره انتي يا ذفته قومي ...وقامت ساره المره دي بالجد ومشت اتوضت وصلت ومن المصلايه علي السرير والحبوبه بتها دخلتها الحمام واتوضت وجات قعدت في الكرسي تصلي .... وخالد اصلا قام من بدري ومعاه حسام ومشو صلو في المسجد وجو يرقدو شويه ....
الساعه تمنيه صحي خالد ولبس ومشي علي امه شرب الشاي ومرق لشغله وساره ما قامت الا الساعه عشره وسماح قامت من تمنيه مع خالد وبدت تنضف وترتب محل ما امها وحبوبتها كانو نايمين وعلي الساعه تسعه ونص صحي حسام واخد حمام ولبس وجاء مارق لقي سماح واقفه برا ...صباح الخير ..صباح النور ... مالك واقفه كدا ...لا ابدا بس كنت عاوزه اشوف اذا صحيت عشان انضف ليك الشقه ...بس مافي داعي تتعبي حالك البيت نضيف ... واصلا هي ما انتظرت يكمل كلامه وطوالي دخلت تلم في الملابس وترتب ...ابتسم ليها وطلع مشي علي خالتو محاسن الاول ما شافتو صبحت عليهو وجرت تسوي ليهو الشاي وهنا جاء داخل عليها المطبخ وقال ليها خالتو محاسن ...يا عيون خالتك ...عاوز لي شغاله ... شغاله لشنو في حاجه ناقصه عليك ...لا والله بس سماح حرام تشتغل جوا وبرا يعني نجيب وحده تساعدكم ...يا ولدي سماح متعوده علي كدا وانت زيك زي خالد البتعملو لي خالد تعملو ليك ....لا يا خالتو الشغاله ضروريه ...نطت الحبوبه وقالت ليهو خلي الشغاله علي انا بكلم تهاني تشوف لينا اخت شغالتها ولا قريبتها ...امي دا كلام شنو شغاله ليه ... ما تشتغل بكلام بتي دي من يومها بتحب الشقا.... خلاص يا حبوبه الموضوع دا عليك ... تمام يلا اقعد عشان تشرب شايك ...جات ساره بكسل داخله وقالت ليهم صباح الخير ... تصبحي قرده ان شاءالله عندك عين تصبحي ورد حسام وقال ليها صباح الأنوار يا سرو ... امي امي سوي لي شاي ... شفت يا حسام بجاحه زي دي اه تعالي قابليني لو ما راجلك رجعك لينا تاني يوم ...بري علي ليه يرجعني ...يرجعك زي ما حصلت حاجه عشان كسلك دا اختك قامت من الصباح تنضف وترتب وانتي مخموده نايمه ... وانا لو ما جاب لي شغاله ذاتي ما بقعد معاه ..... حسام دا ميت من الضحك علي نقاشهم .... شغاله وانتي شبهه شغالات ...مالي عورا ولا شينه ... ولا عوره ولا شينه بس مكنسه شوارع ...امي ماتشوفي امّك دي ياخ طوالي بتداعي فيني ... يابت عيب دي حبوبتك اتكلمي معاها كويس ...تحبها القراده ودي بتعرف العيب دي خليها لقله الأدب ....... وقعدو يشربو الشاي وجابت محاسن لي امها شاي احمر هي متعوده تشربه بعد شاي الحليب
😘😘😘😘
والله امبارح اليوم كان حلو لو ما عمله صحبه قاشره دي .... شكلك حبيبتي المكان .... طبعا حبيتو بس خساره ما اتهنيت ... ولا يهمك يا حبوبه انا الليله بوديك .... بالجد يا سحس ... هييييي انتي ناطه مالك في زول كلمك .... ح امشي معاكم .... تمشي بطنك ان شاءالله .... ماله يا حبوبه خليها تمشي .... تمشي الترب قولي امين ... جات سماح داخله عليهم .... اه انا عاوزه سماح تمشي معانا