للحب كلمة

٨

اتغدو وبعد كدا قامو البنات رشا وسماح وساره وهناء يرتبو وينضفو في البيت وبعد ما خلصو جات محاسن لي سماح ...سموحه اخوك وحسام جو امشي سوي ليهم الغدا ....طيب يا امي وعاينت لي رشا وهي مبتسمه ورشا عارفه الحب ألفي قلب سماح لي حسام بس ساره واقفه بيناتهم .... ساره ساقت هناء عشان قالت انها ح تمشي وإذا ابوها وافق ح تجي تبيت معاهم قدمتها لحد الباب وجات راجعه .... لقت حسام في وشها ... سحس ازيك ...تمام يا عسل تعالي معاي عاوز اوريك شي .... وجراها من يدها وهي بتقول مالك في شنو .... واول ما بقت في الحوش التاني .... قال ليها انتظريني دقيقه ... في شنو يا حسام ... قلت ليك دقيقه ....طيب دقيقتين بدل واحده .... ودخل حسام جاب ليهو شي واول ما وصل ليها مد ليها الكيس طوالي وقال أمسكي .... دا شنو .... دا امشي اوضتك وشوفيهم برواقه كدا وبعدين قولي لي رائك وبالمناسبة دا ما مني ... من منو ...من امي دايما بحكي ليها عنك وكيف انتي انسانه عسل معاي وانا طبعا كلمتها عشان تجيب بدله لخالد ولقيتيها مرسله ديل ليك .... لالالالا ما تقول ديل فساتين ...ما بعرف .... حسام قول عليك الله ...ايون فساتين .... وعرفت مقاسي كيف ... تزكري الصوره الكان اتصورناها في روتانا لمن عملنا عزومه لخالد انا رسلت ليها الصوره كانت نفسها تشوفكم .... لكن خالتو ما زوق الله يخليها ... أمين يارب بس انتي الزوق وانتي الحلا كله يلا امشي من قدامي خليني امشي اخد لي حمام عشان العمال جاين يركبو الصيوان وكمان الزينه لازم أكون واقف معاهم .... واي يا حسام الحمدلله انك ظهرت في حياتنا في الوقت المناسب ووقفت مع خالد خاصه وانه خالد ما عنده اخوان بقيت ليهو اخو ...خالد دا اخوي وصاحبي وكل شي كفايه طيبته ودي بالدنيا انا لو عندي اخت ما كنت خليتو يعرس غيرها ...اي والله خالد طيب وبحبك يا حسام دائماً كان بقول انه ربنا عوضو بيك وانه عمره ما ح ينسي وقفتك معاه .... يابت نحنا كم اصلا ما يانا انا هو في العيله ولازم نقيف مع بعض وتاني شي هو بستاهل كل شي حلو وغير كدا ابوي دائماً بقول لو ما ابوك باع قطعه الارض الوحيده الكانت عنده عشان يقري ابوي ما كان ابوي بقي مهندس ولا قدر يسافر برا ويعمل قرش وعلي فكره في موضوع مهم ح افتحو قدام الكل بعد ما ننتهي من موضوع الحنه دا ....امانه شنو الموضوع قول ...لا ما بقول ويلا امشي عاوز اخد حمام ...ثقيل لكن .... ضحك حسام ضحكه غيظ وهو شايف كيف وشها حمر من الغيظ ومشي وسابها وهي جرت الاوضه وشافت الحبوبه ساره داخله بالكيس وتكورك ليها عاوزه تعرف الشايلهو ساره يابت دا شنو الدخلتي بيهو لجوا ... وساره من جوا ردت وقالت ليها دي قنبله 😜😜😜 وفجاه تمتها ليها الحبوبه وقالت ليها سماحه الزول في الطول والعلا دي قنبله ان شاءالله قنبله تفرقع فيك ما تبقي فيك حاجه يا وسخه جاها خالد داخل عليها .....ايووووووي ايوووووي ايوووووي مبروك عليك يا ولدي ان شاءالله بيت مال وعيال .... ان شاءالله يا حبوبه .... وجات داخله رشا .... اول ما شافها خالد جسمه كله عرق لمن بقي يرجف ما عارف ليه بس البت حلوه طوالي نزل عينه في الارض ..... هي لاحظت توتره بس هو عريس اكيد بكون متوتر خجلت منه وسلمت عليهو وقالت ليهو الغدا جاهز ....تسلمي .... دي رشا صحبه سماح بت عاقله وظريفه وتتخيل طلعت منو ...تتذكر ناس صالح الحلفاويين الكانو جيران خالتك زمان بس دي بتهم ....بالله فرصه سعيده يا رشا ...انا الأسعد وطوالي سأبتهم ودخلت علي ساره ..... ساره كانت بتقيس في الفستان الخطير ولا الجزمه طيب الفستان وعرفت مقاسي من الصوره بس عرفت كيف مقاس جزمتي دا اكيد حسام .... قالت ليها رشا دي منو دي ... اه رشا تعالي وريني رائك في الفستان دا ...خطير والله ....مَش كدا دا طبعا جابتو لي خالتو ام حسام ولد عمي هديه مع بدله خالد حقت العرس ما عرفت رشا انها تضحك ولا تبكي عشان سماح بس ابتسمت وقالت ليها حلو شديد تتهني بيهو ان شاءالله ...تسلمي يا عسل وبقت تفتش في الكيس تلقي عطر واكسسوار وساعه ووووووب تعالي شوفي يا سماح الكانت داخله يادوب الاوضه وبقت تتفرج وهي ساكته .....
😘😘😘😘😘بيت العروس 😘😘😘
ابوي ما تتكلم مع امي دي نازله تزن لي لبني في رأسها ولبني رأسها خفيف ... يا ولدي انا من امبارح بتكلم معاها بس مافي فايده نعمل شنو .... طيب والعقدالفضل ليهو يومين دا ح نقول للناس شو .يعني ولد اختها ما لقي يجي الا في الأيام دي ليهو سنين في السعوديه ولا حس ولا خبر جاي هسي يقول انه امّك وأمه قالو من زمان انه لبني لي عصام وعصام لي لبني ...دا كلام ساي لمن كانو عيال لكن لا جاء أتقدم ولا قال لينا انه عاوزها بس هسي امي مستحيل تغير رائها وخاصه العريس مغترب وجاي بشي وشويات .... جات داخله ام لبني عليهم وقالت اي جاي شايل وانا مستحيل ارمي بتي لخالد السجم دا الما عنده تعريفه وح يسكن بتي مع اهله انا اصلي من الاول ما كنت موافقه وهسي مستحيل ازعل اختي عشان خالد دا ...يا امي خالد ولد ممتاز والله مافي زيهو ولا تقولي عصام ولا غيره بتك المدلعه دي دايره زول زي خالد عشان يكسر ليها نخرتها الرافعاها فينا ....ريحو نفسكم لبني قالت ما عاوزه خالد ...وقف اخو لبني علي حيله وقال كيف يعني بكره حنه خالد جايه هسي تقول ما عاوزه ... وجري طلع مشي لي لبني .... انتي يا ذفت صحي الكلام السمعتو دا ... اي ما عاوزهو ياخي هو العرس بالعافيه ...وجايه هسي تقولي كدا ... أقول وليه ما أقول .... جاء الإبو داخل عليهم وقال ليها يا بتي اسمعي كلام اخوك زي خالد ما بتلقي دا زول كويس ما تسمعي كلام امّك عصام دا زول تافه .... ابوي انا خلاص قررت ما عاوزه خالد والله والله تغصبوني عليهو الا اسيب ليكم البيت واطفش والإبو زول مسكين مرته مسيطره عليهو وطوالي أخوها أدها كف والبيت ولع حريقه .....
العشاء إذن ولسه البت مصره ...طوالي الإبو قال لي ولده اسمع يا ولدي شيل الحاجات دي ورجعها لخالد اختك وأمك مستحيل يغيرو رائهم ....... لا حولا ولا قوة الا بالله والله صعبه علي بس بتك دي عندي تصرف تاني معاها وعصام دا نهاي ما ح اخليهو يمسك يد اختي .... امشي يا ولد امشي ودي ليهم حاجاتهم دي البقي بقي نعمل شنو قول ليهم كل شي قسمه ونصيب ... وشال اخو لبني الحاجات وختاها في العربيه وبعدها دور عربيته ومشي وطوالي ام لبني اتصلت بي عصام عشان تبشره هو وأمه ....
😗😗😗😗بيت العريس 😗😗😗😗
الصيوان اتركب والزينة والبيت مليان وخالد ونزار وحسام في الحوش التاني قاعدين يشربو في الشاي
وقف اخو لبني والحاجات في العربيه واول ما شاف الصيوان دمعته نزلت بس يعمل شنو ما باليد حيله نزل وخلي شنط الشيله في العربيه وشال بس الدهب والمهر ومشي رجل وراء ورجل قدام