للحب كلمة

٩

واول ما وصل دخل علي طول لان الباب فاتح وشفع الحله عاملين هيصه في الصيوان وفي كم راجل قاعدين وجنبهم صينية شاي وناس خالد جوا وكل شوي خالد يجي يقعد جنب رجال الحله شويه وشويه مع الشباب عاوز يرضي علي الكل وفي بتين داخلين علي البيت وشال نفسه ورجعه ودخل طوالي يلقي ليك خالد في وشه ....اول ما شافه خالد قال اووووووو ابو نسب ازيك مد يده بخجل اخو لبني وهو بقول ليهو الله يسلمك يا خالد ....والله فيك الخير جاي وتاعب نفسك عشان تقيف معاي تعال شباب العيله جوا تعال أعرفك بي بالدكتور حسام ولد عمي وهنا جاء حسام علي السيره .... حسام سلم علي مصعب اخو لبني ...ااااااهلا يا مصعب .... اهلًا بيك .... اتفضل اتفضل مافي زول غريب .... وهنا صوت الزغاريد ملت البيت حسي مصعب بي قصه في حلقه كان نفسه. يفتح عين ويغمض. عين يلقي المهنه الجاي عشانها خلصت بس الله ياخدك يا لبني انتي السبب خليتيني اقيف في الموقف دا .... لاحظ خالد وحسام وعاينو لبعض انه مصعب ما طبيعي .... خير يا مصعب في شنو .... بلع ريقه وقال ليهو ممكن نتكلم برانا ... جدا بس حسام ما غريب ....لالالالا ما قصدي العفو طبعا .... لا يا خالد انا بمشي لنزار اصلا قاعدين براهم يلا استأذن ....لا يا جماعه ما قصدي عادي ممكن اتكلم قدامك مافيها شي .... لا والله انا معاي ضيوف وبالجد ما فاضي ومشي حسام وخالد دخل مصعب صالته وقفل الباب عليهم اتفضل اتفضل بالمناسبه الكنب دا ما خليت زول من البيت يقعد عليهو قلت لبني هي يلي ح تقعد عليهو اول وحده ما علق مصعب وقعد ونزل راْسه خالد قعد قصاده وهو مستغرب مصعب ما طبيعي خير يا مصعب في شنو مالك .... والله ما عارف ابدا ليك كيف ..هههههه ابدا يا ابو نسب في حاجه ناقصه في ترتيبات العرس وبالمناسبة نحنا حجزنا صاله مارينا ولد عمي حجزها لينا ودي كنت عاملها مفاجاه لي لبني ..... مافي داعي يا خالد للمفآجاه .... لشنو بتقول كدا خير في شنو .... والله يا خالد انا ما عارف أقول ليك شنو الحاجه الوحيده العاوز اقولها ليك انو كل شي قسمه ونصيب .... خالد حسي انه الدنيا بتلف بيهو ياربي دا حلم ولا علم بلع ريقه بصعوبة شديده وهو بفرك في يده الكانت زي التلج مصعب انت انت انت بتقول شنو دا كلام شنو .... والله يا خالد انا ما عارف أفسر ليك الحصل دا كيف .... وقف خالد علي حيله وهو برجف انت جاي تقول لي وبكره حنتي انه كل شي قسمه ونصيب ... خالد افهمني ....افهم شنو افهم شنو انت بتقول كلام ما بدخل عقل .... خالد بصراحه لبني كانت مخطوبه لولد خالتي من زمان يعني خطوبه اهل امي وخالتي متفقين علي كدا ولمن ولد خالتي رجع من سفره بصراحه لبني لبني غيرت رائها وقالت ما عاوزاك .... خالد ما قادر يصدق لالالالا دا اكيد فيلم عربي قديم يحضره لالالالا يا مصعب لالالالا انت جاي تكذب علي كذبه ابريل زي ما كذبت هناء صحبه ساره اختي عليها هههههههه لا يا شيخ والله وقدرت تعملها فيني لبني عارفاها بتحب المقالب ....لا يا خالد دي ما كذبه ابريل ولا شي دي للأسف الحقيقه وفجاءه قعد خالد في الكرسي بقوه وخت يدينو في وشه وبقي يقول لا لا لا لا يا لبني انا عملت فيك شنو عشان تعملي فيني كدا عشان كدا ليها يومين بتصل عليها مره ترد وعشره لا وحتي في المره الكانت بترد فيها كلام مسيخ وانا الحمار فكرت عشان قربت تفارقكم نفسيتها تعبانه اتاريها باعتني عشان الاغتراب والقروش وبقي يبكي زي الشافع .... خالد كل شي قسمه ونصيب الله يرزقك بالأحسن منها و هي مَش اختي والله ما تستاهل ضفر رجلك انا وأبوي لينا يومين بنحاول نقنع فيها وفي امي بس مافي فائده .... مسح دموعه خالد بيده وقال ليهو مافي داعي تقنعوها انا الما عاوزني انا زاتي ما عاوزه .... سكت مصعب ونزل الكيس وقال ليهو دا المهر والدهب والشنط برا ..... طلع مصعب وحسي انه عاوز يجري عشان يطّلع ما قادر خالد وجع قلبه ..... ومشي نزل الشنط وختاها جنب الباب وطلع جات الام طالعه لقت الشنط مختوته وووووب علي دا منو الجانا من السفر ما انتبهت للشنط المشت اشترتها بنفسها عشان تخت شيله خالد فيها بس ما لقت اجابه علي سؤالها مشت علي ناس حسام تشوف منو الجاء لقت حسام ونزار وولد خالتهم قاعدين بس خالد مافي .... ولدي حسام ...نعم خالتي ...دي شنط منو البرا ... شنط وين دي ...مختوته برا جنب الباب وووين خالد ... خالد معاه اخو لبني جاه هسي .... قلب الام نقزها رجعت تعاين للشنط وتقول يارب تطلع ما ياها واول ما وصلت لقتها ياها نفس الشنط حقت الشيله مدت يدها وهي بترجف وجاء حسام وراه يشوف حكايه الشنط دي واول ما فتحتها وشافت هدوم الشيله شهقت وختت يدها في خشمها ....خالتي في شنو دي شنط منو .... قامت علي حيلها ومسكت يد حسام وهي بترجف ...خاف حسام وبقي يقول ليها مالك فيك شنو دي شنط منو وفيها شنو يخليك ترجفي كدا ... ودموعها نزلت زي المطر وهي بتآشر لي الشنط وبتقول دي دي شيله لبني رجعوها ...شنو بتقولي شنو يمكن جاين يختوها في الدولاب دي مَش برضو عوايدنا....لالالالا يا ولدي مفروض يجيبوها يوم بكره ومعاها ام العروس وخالاتها بس يجيبوها بالطريقه دي تبقي فيها انا وجرت علي خالد وراها حسام واول ما دخلو عليهو يلقوه قاعد وخاتي يدينو في وشه والكيس جنبو ....ولدي خالد في شنو حصل شنو .... وحسام قعد ليهو في الارض وفك يدينو كان وشه مليان بالدموع .... وب علي ولدي عمره ما بكي .... في شنو اخو لبني قال ليك شنو ...سكت خالد وبعد مسافه قال تصدقو خطيب لبني القديم رجع وقال عاوزها وهي وافقت عشان معاه قرش وانا للأسف ما عندي حاجه .... عندك يا ولدي عندك الما عند زول قلبك الطيب دا والكلبه الحقيره دي الله لا يوفقها دَنيا ولا اخره ....لا يا امي ما تدعي عليها ....وبعد العملتو ولسه بدافع عنها ... لا يا امي ما بدافع بس زي ما قال اخوها كل شي قسمه ونصيب وانا رضيت بنصيبي وعسي ان تكرهو شيئا فهو خير لكم ودا كلام ربنا وانا زول مؤمن ... ونعم بالله بس ياااا ... خالتي خلاص خالد اخوي قوي وبطلع من محنته دي قوي وضربه في كتفه وقال ليهو مش كدا يا ولد العم وجات داخله ساره وتعرف بالحاصل وساره بقت تقول ليهو ولا يهمك بتعرس ست ستها هي ذاتها كانت طويله وزي النخله علي قول حبوبه وبقو يضحكو وحسام يهز فيهو ويقول ليهو انا معاك وما بسيبك والا وانت ناسيها وناسي النخله البتشبها .... بس حسبي الله ونعم الوكيل غير ما خسرونا ما عملو حاجه جات سماح بتقول امي حريم الحله جو .... وقفت الام وقالت أقول ليهم شنو ولا اعمل شنو ...ليه في شنو يا امي ...ساره الملقوفه طوالي ردت و قالت لبني الحيوانه رجعت الشيله وقالت كل شي قسمه ونصيب ....ليه في شنو وانت عملت ليها شنو عشان تتصرف كدا ...انتي لِسَّه ح تساألي خلينا نشوف حل للمصيبه دي وللخسائر الخسرناها دي .... وهي خسائر بجد والحل يا عيال ....سرحت ساره مسافه وهنا صرخت لمن امها اتهجمت وقالت ليهم لقيت الحل بس حلي دا بقيف علي موافقه خالد .... رفع راْسه خالد وقال ليها وتتخيلي في حل للمصيبه إلانا فيها ....طبعا في حل طالما ساره اختك وحبيبتك في ح يكون في حل .. حسام بدا مهتم للكلام البتقولو ساره وهنا ساره قالت العرس ح يتم وانت ح تلبس البدله وتقعد جنب عروستك .... لالالالا البت دي مخها فوت يا امي ...استني يا سماح انا لِسَّه ما كملت كلامي ...... كملي يا ام العُريف .... خالد رائك شنو في رشا صحبه سماح بت كويسه وتمام وغير كدا طلعت معرفه وانت شفتها خالد بقي يتمتم وما قادر يرد بس جرحه لِسَّه مفتوح بس ساره فكرت في الجرح السببتو ليهو لبني لازم وحده تانيه تظهر في حياة خالد عشان تكوي الجرح قبل ما يلتهب وخالد. مسكين واكيد ح يدخل في دوامه الاكتئاب وتجيهو حاله نفسيه هي عارفه خالد بفكر كيف ولازم تدق علي الحديد وهو مولع .... سماح والام مخلوعين بس حسام أتكيف شديد لانه تفكير ساره صاح وعشان ينسي لبني لازم تبقي في وحده تانيه وسريع لانه الوضع الفيهو خالد وألحنه البكره والخسائر الحاصله والحجوزات دا كله خالد ما بقدر يعملو تاني وخاصه وهو عارف وضعه والحب بجي بعد الزواج بالعشره .... بس رشا اكبر من خالد وما مناسبه ليهو ....انتي اطلعي منها يا سماح .... خالد عمره ٣٦ وهي اكيد ما اكبر منه بكتير يعني ونحنا فيها البت قاعده بهناك انا بمشي بقس النبض بس انت رائك شنو يا خالد.... خالد كان مدبوح والمدبوح بمشي علي حسب ما يوديهو أصحاب الضبيحه ....اي ولدي وافق نحنا ما حمل مصاريف عرس من اول وجديد والحمدلله رشا مقاسها تقريبا زي ذفته الطين .... ساكت خالد بس لا وافق ولا اعترض ساره قالت السكوت علامه الرضا وقبل ما يرد واحد فيهم كانت وصلت لي رشا وجرتها معاها جوا وقفلت الباب بالمفتاح وقالت ليها اقعدي عاوزه اتكلم معاك في موضوع ...في شنو يا ساره خلعتيني .... اولا جاوبي علي سؤالي اولا عشان علي اساسه ح أقول الموضوع ....خير .... رائك شنو في خالد .... من ياتو ناحيه .... من كل شي ... والله زول كويس وكفايه انه اخو سماح حبيبتي واختي .... بس تمام و رائك شنو طيب لو طلب انه يعرسك .... هههههههه انتي يا ساره نصيحه يا بت بكره حنته .... انا بسالك مجرد سؤال يعني لو ما هو خاطب وجاء أتقدم ليك كنتي ح توافقي .... سرحت مسافه وقالت ليها والله خالد شاب ما بترفض خلقه واخلاق بس للأسف عرسه بعد يومين وانا هنا بايته عشان حنته ... وإذا قلت ليك انه مافي عرس ولبني وخالد سابو بعض .... ارتبكت رشا وقالت ليها شنو سابو بعض كيف وليه .... وبقت تحكي ليها وتزيد شويه من عندها وبعد ما خلصت ....اه رائك شنو نحنا رشحناك ليهو وهو طار من الفرح .... بس انا انا ...انتي شنو قولي عشان الساعه داخله علي عشره نلحق نمشي لي اهلك ... ابتسمت وهزت رأسها حضنتها عليها وجرت جري ولمن وصلت لقت الام والخاله جات وعرفت . وحسام وسماح واول ما شافوها ....اه يا بت قولي وافقت ....كشرت ساره وشها وقالت للأسف .... قاطعتها سماح وقالت كنت عارفه انها ما ح توافق وهنا صرخت ساره وقالت للأسف انها وافقت وبقت تضحك والكل وقف وحضن خالد وسماح واقفه مخلوعه ما قادره تصدق ..... اه خلاص يا جماعه يلا نمشي لي اَهلها يلا يا حسام كلم نزار ولد خالتك عشان نمشي بس لازم في الاول رشا تمشي لي اهلهم وتديهم خبر انه في ناس جايين صاح يا امي .... وجرت طيران ساره لي رشا عشان تخليها تتصل بي امها وعشان ابوها متوفي تكلم اخوانها وطوالي رشا طلعت تلفونها وبقت تدق لي امها وشرحت ليها الحاصل .... الام طارت من الفرح وخاصه بتها عمرها وصل لي ٣٤ سنه ومافي زول دق بابهم وأتقدم ليها وقالت ليها حبابهم عشره والحريم برا قاعدين مع الحبوبه ينضفو الخضار الطباخين علي وصول وجات محاسن استأذنت منهم انها تمرق تقضي ليها شغله وطلعت هناء مع ساره ورشا ركبو عربيه الخاله خاصه انه الخاله كانت جارتهم زمان وربت اخوانها مع لؤي ولدها وفعلا طلعو ووصلو قبلهم ولمن الام عرفت انه خاله خالد ياها جارتها زمان وعشره سنين إطمنت اكتر والأولاد شافو الخاله وانبسطو بشوفتها وقَعَدت معاهم ادتهم فكره علي الموضوع والاخوان قالو طالما انتي خالته نحنا نوديها ليهو لحد باب بيتو .... والله وطمرت التربيه فيهم ورشا معقول انا ح اعرس يوم الجمعه وب علي اليوم الاتنين ح الحق اعمل حاجاتي كلها متين .... اسمعي يا بتي انا بوديك عند ساميه حمدتو تظبطك وتطلعك نجفه ...... وب علي يا خالتي ساميه حمدتو عديل كدا .... وانا عندي أغلي من خالد ولا منك .....خالتو امانه وديني اتمكيج مع رشا .....ام رشا ميته ضحك علي ساره وخفه دمها ....من عيوني يا سرو ...... الجماعه من هناك اتحركو في عربيه حسام وبالصدفة جاء خال حسام عشان يجامل خالد طوالي ساقو معاهم وسماح تحججت بالناس ألفي البيت وانه مافي زول ح يكون قاعد معاهم ......

وصلو الجماعه ودخلو وسلمو علي الموجودين وشويه وخال حسام فتح الموضوع وبهناك ام خالد فتحت الموضوع والكل رحب والزغاريد بقت تجلجل ساره وام رشا وخاله حسام وأمه وبهناك وقفو الشباب وبقو يباركو وخاصه انه خالد ما محتاج انه يسألو عنه كفايه انه ولد اختها لي ام لؤي ..... وطلعو الشباب واتفقو بكره ام رشا تعزم حبايبها واهلها عشان العصر ح يجو عشان يجيبو المهر والشيله بس ام رشا قالت ليهم ما ح نلحق نعمل ليها ريحتها ...الام طوالي قالت ليها مافي داعي الريحه موجوده وجاهزه انا ح اجيبها ليك في شنطه براها وانتي مافي داعي توريها للناس ....علي خيره الله ... ومشو كلهم ورشا اتصلت علي هاله وعلي صحباتها انه عقدها الخميس والدخله الجمعه بس مافي زول صدقها كلهم فاكرين انها كدبه ابريل .....