للحب كلمة

١٠

كيفن الكلام دا يعني انا اخر من اعلم دا كله يحصل ويرجعو الشيله وتمشو تتقدمو للبت وترجعو من غير ما تشاوروني اه أقول ليكم حاجه عرسكم دا ذاتو ما بحضرو ومن الليله ما بقعد ليك في بيت يا محاسن .... يا امي دا كلام شنو انتي كنتي عاوزه نقول ليك يعني قدام الناس انتي ما شايفه البيت كيف كان مليان ....سلمي امي معاها حق يعني مفروض نشاورها قبل ما نمشي .... محاسن انتي اسكتي دقيقه امي ذاتها لو فهمت الموضوع براحه ح يكون رائها زينا .. طيب فهميني يا فهيمة .... شوفي امي انتي اكتر واحده عارفه ظروف محاسن اختي وخالد دا شغال ليل نهار عشان يوفر مصاريف أخواته وكمان ما عنده مقدره تجهيز عرس تاني كان المره دي لقي زول يساعده زي ولد عمه المره الجايه الله اعلم حسام ح يكون في ولا سافر لي امه والخسائر الخسرها اه انتي براك شايفه الضبايح والطباخين القاعدين يجهزو برا دا كله يجيبو من وين تاني ولا الصاله الحجزها ليوم العرس وحتي حسام حجز ليهو صاله مارينا كبيره وجميله عشان حفله اوفر التايم والجرتق دا كله ح يروح وانتي يرضيك يحصل كدا ليهو ....لا والله ما يرضيني طبعا ...طيب عشان كدا نحنا قلنا ننقذ الموقف وساره هي الفكرت وفكرتها عجبت الكل .... شنو ساره هي صاحبه الفكره ...اي يا امي رغم صغرها بس بت تفكيرها اكبر منها ....اه شفتو عشان ساره دي انا ما ح ارضي .... جات ساره رمت نفسها في صدرها وقالت ليها وووين عاوزه تمشي وتخلينا وبتقدري تقعدي في حته انا ما فيها ح داعي منو تاني ..... ضحكت الحبوبه وقالت برسل ليك دعوه او دعوتين في الواتس .... هههههه وبقت تنقزها وهي بتضحك وهي بتكورك وبتضحك يا بت ما ضحكيني .... وهدت الحبوبه ورقدت جنبها ساره وختت رأسها في حجرها وبقت الحبوبه تفلي فيها وتقول يمكن نلقي لينا قمله وبقو يضحكو ولسه بتفليها وقالت ليهم وأهل رشا الخفه الفيهم دي شنو طوالي وافقو ....امي انتي ناسيه اني ولدت لؤي دا في بيتهم لانه كنت بصين البيت والعمال كانو فيهو وجاني الطلق وحتي ابو لؤي ما كان في اذكر كان في بورتسودان عنده شغل والله ام رشا دي هي الجابت الدايه ولحد ما انتي جيتي ومحاسن كنت انا ولدت يعني عشرتنا ما كانت هينه بس الدنيا فرقتنا بعد ما رحلت من جنبهم يااااا كانت عشره حلوه والله .... ااه طيب يا بنات انتو ح تودو الشيله متين الوقت ضاق .... بكره العصر ح نمشي كلنا وانتي أولنا طبعا .... علي خيره الله بس تعرفو يا بنات الحصل لخالد دا ذكرتني قصه زمان حصلت كانت البت جارتنا المهم البت دي يوم العقد اهل العريس اتشاكلو جنس شكله كان العقد بعد الغدا وجو اهل العريس وفجاءه قامت حريقه قال انه اهل العروس ما استقبلو ام العريس كويس لانه العقد كان في البيت لان جد البت كان مأذون الحله وكلمه من هنا وكلمه من هناك العريس حلف ما يعقد وقدر ما رجال الحله حاولو معاهم بس رفض وساق اهله ومشي وطبعا اهل العريس كأنه ساكنين معانا في نفس الحله والنَّاس دي كلها واقفه تعاين ما عارفين يعملو شنو ولا يقولو شنو وام العروس تبكي وخالاتها في أللحظه دي كان واقف ابوي طوالي قال ليهم يا جماعه انا بطلب يد البت لي ولدي الكل فرح واولهم ابو البت ومسك ابوي بالاحضان وقعدو ليهم طوالي شفتو كيف يعني قسمه زول ما بشيلها زول تاني نهاي ورشا دي قسمه خالد ....حبوبه ...اي يا قاشره .... والبت وافقت طوالي .... اي كانت خفيفه زي رشا ما صدقت ما كانت بايره وطبعا الكل وافق لأننا كن جيران وعارفين عن بعض كل شي ...طيب والشيله متين اخوك اشتراها ... بعد العقد تاني يوم أبوي ساق اخوي وأشتري ليهو من كل شي تلاته تلاته وزمان لا كان في صاله ولا يحزنون العرس بكون جنب الباب والكفايه حقتهم اصلا كانت يوم العقد وبعد خمستاشر يوم عملنا كفايتنا ودخلو علي بعض وأبوي فرش ليهم اوضه في البيت وقعدو معانا ... غريبه اول مره نسمع الحكايه دي رغم انه خالي .... اي ابوي حلف علينا ما نحكي او نجيب سيره عن الموضوع دا تاني لانه البت بقت مننا وفينا .... طيب وخالي وافق يا امي طوالي كدا ما اعترض نهاي ..... ااااااه يا سلمي يا بتي اخوي كأن زول طيب وافق وما كسر لي ابوي كلمه والله خالد دا بذكرني بي خالكم طالع زيهو في طيبته وأخلاقه الله يتمم ليهو علي خير .... امين يارب بس والله الحاجات دي بقت بتحصل عادي وكل يوم بنسمع بيها ...
😁😁😁
صبح الصباح الكل صحي بس ما يلقو ليك الحبوبه وبقو يفتشو فيها ما لقوها نهاي وخافو انها تكون زعلانه لِسَّه ونفذت تهديدها وسابت البيت بس يلقو هدومها زي ما ياها في الدولاب حتي الموبايل في الشاحن قاعد ومشو سألو عند جارتهم حاجه نفيسه لانها صحبتها الوحيده وعرفو من بتها ان حاجه السره جات من الدقش و ساقتها وطلعو ...طيب ما قالو ليكم ماشين وين ... بري يا محاسن ما قالو لينا شي ...ياربي مشيتي وين يا امي ....
😁😁😁😁😁😁
طيب ما قالو ليكم ماشين وين ... بري يا محاسن ما قالو لينا شي ...ياربي مشيتي وين يا امي ....
😨😨بيت ناس لبنى😨😨
الكل قام مخلوع من دق الباب ... السره براحه ما كده ... اسكتي يا نفيسه خليني افش حرقتي وبقت تدق بشده والجماعه بقو يجرو علي باب الشارع واول ما فتحو يلقو ليك الحبوبه بدق الباب بعكازها .... حاجه السره ...اي حاجه السره يا معفنين ... اتقدمت ام لبني وقالت ليها اتفضلي يا حاجه مافي داعي للفضائح ... انتو بتهمكم الفضائح انتو الفضائح ذاتها ... يا حاجه استهدي بالله كل شي قسمه ونصيب ...انت عليك الله اسكت راجل ما عندك كلمه في بيتك ... نزل ابو لبني راْسه لتحت ما كلامها صاح .... جات لبني وقالت ليها اسمعي يا حجه ...تسمعي سمع السؤ قولي امين انتي ترفضي ولد بتي يا معصعصه ... انتي جايه تشتمينا في بيتنا .... وأشرت بعكازها للبيت وقالت ليها ودا بيت من اصلو انتي بتسمي الوسخ دا بيت بس الحق ما عليك الحق علي ولد بتي الفكر فيك وعملك زول وعبرك يا بومه ... ورفعت يدها لبني في وشها وقالت مَش رجعنا ليكم حاجاتكم جايه تعملي عندنا شنو تاني رفعت الحبوبه عكازها وادتها ضربه في يدها لمن لبني صرخت وام لبني بقت تكورك في الحبوبه وتقول ليها تطلعي برا ولا اتصل علي البوليس يجي يخمك ... تخمك عربيه الوساخه ان شاءالله ومع الكوراك الناس اتلمت ووهجمت الحبوبه وأدت لبني جنس علقه و الجيران بالقوه فكوها منها .... وقبل ما تمرق اتلفت عليها وقالت ليها اوعك تتخيلي انك قدرتي تكسري نفس خالد العرس قايم وح يعرس وحده تليق بيهو وبينا وطلعت الحبوبه بس اتذكرت حاجه مهمه رجعت وفتحت الباب بقوه الكل بقي يعاين ويقول دا رجعت تاني ومشت طوالي علي لبني ومسكت يدها وقالت ليها ألفي يدك دا حقك عشان لابساه لحد هسي وجرت الخاتم من يدها بقوه لمن جرحت لبني بضفرها وجات مارقه .....
وركبو العربيه ومشو علي البيت واول ما وصلت البيت ودخلت جو البنات جرو عليها امي كنتي وين ... آلت ترد ومشت قعدت في الكرسي وشالت نفس وبعدها فتحت يدها وقالت ليها مشيت جبت دا واديت لبني علقه عمرها ما ح تنساها والله عضيتها عضه لمن طقم سنوي كان ح يقع من خشمي وكلهم بقو يضحكو واصلا الحبوبه لمن شافت علبه الدهب الرجعوها و ما لقت الخاتم الكان جابو ليها ابوها يوم عرسها وهي ادتو لخالد عشان يقدمو لمرته لانها حلفت تديهو لأول حفيد من أحفادها يعرس ....
💃💃💃💃الحفلة  💃💃💃💃
الحنه شغاله وخالد قاعد في وسط سريره والحبوبه وحاجه نفيسه بحننو فيهو وبعد ما العريس اتحنن الشباب قالو الا يتحننو طوالي تهاني قامت وحننت حسام ونزار وولد خالتهم ولؤي
وساره وهناء داخلين مارقين واخر انبساط و بعد ما طلع العريس الحنه ابتدت الحفله وساره لبست وقشرت وهناء زيها .... وسماح طلعت زي القمر الكل انبهر بيها وجاء حسام عليها وهو مبسوط وقال ليها وين كنتي داسه الحلا دي كلها بالجد طالعه حلوه شديد ... ابتسمت وقالت ليهو دي عيونك الحلوه .... لا والله لا عيوني ولا شي بس اليوم فيك شي غير من جيت ما شفتو فيك بس امانه عليك خليك كدا علي طول .... انت تأمر .... طيب يلا نطلع ومسكها من يدها وجاء مارق كانت حاسه كأنها طالعه للكوشه يااااا علي مسكه يدك يا حسام واتمنت انها ما تفكها نهائ واول ما طلعو لقتهم ساره وهم كدا طوالي صرخت وقالت خليكم كدا دقيقه عليكم الله وطلعت تلفونها وادتهم صوره وجرت ورتها لسماح وقالت ليها شوفي شوفي كيف حلويين وشافتها سماح وقالت ليها اي حلوه شديد ...وسابتهم ساره وجرت ترقص وهنا جاء لؤي يرقص جنبها واصر انه ياخد صوره سيلفي معاها واتصورو بس فجاءه يلقو ليك الحبوبه ظاهره وراهم وعامله يدها كدا ✌✌