للحب كلمة

١١

يا جماعه دا كلام شنو يعني تكلموني بانه في عريس وجايب الشيله وهسي بتقولو العقد الخميس وكيف انا اخر من يعلم انا عمها ومن حقي تكلموني من بدري حتي ما حضرتوني يوم ما جو اتقدمو انا كلام زي دا ما بنفع معاي والعرس دا ما بتم ...عمي دا كلام شنو قلنا ليك ظروف العريس مافي داعي تعمل لينا موضوع ...انت يا ولد كيف تتجرأ وترد علي رد زي دا علي الطلاق وقبل ما يتم كلامه قاطعتو ام رشا وقالت ليهو اسمع هنا من يوم ابوهم ما مات انت ما جايب خبرنا وعمرك ما عوضتهم عن ابوهم باي حق جاي تقول لينا لا ...اسمعي يا وليه هنا انتي ما تتدخلي بيني وبين عيال اخوي ...عيال اخوك بي وين هو بالكلام ولا بالفعل انت متين جيت واديتهم قرش عشان يساعدهم في حياتهم ولا متين جيت شفتهم وهم عيانين ولا تعبانين انا ربيتهم وانا بس من حقي اقرر مصير عيالي ... وما فكرتي في كلام الناس لمن يعرفو انه بتك عرست واحد خطيبته سابتو قبل العقد بكم يوم .... وانا مالي بكلام الناس الناس قاعده تاكلنا ولا تشربنا وطول الناس بتتكلم في الفارغه وفي المليان والبت بتي انا ومافي زول كدا من حقه يتكلم نص كلمه طول ما انا عايشه ....
.😱😱😱😱 واي يا ريم عمك ح بوظ لي العرس ... ما تشتغلي بيهو دا جعجاع ساي يعني هو بصرف علينا ولا ح يقطع علينا المصروف البديهو لينا و تلقي مرت عمك السوسه حرشتو عشان بناتها البايرات وطبعا كيف وكيف انتي تعرسي قبل بناتها .... ما عارفه بس انتي ما سامعه👂👂👂 صوته بكورك كيف ...خليهو يكورك وامي بتقدر توقفه عند حده انتي المهم قومي قيسي الهدوم حقت الشيله يمكن ما تطلع قدرك قومي يلا وأرمي وراء ضهرك كلام عمك دا ... ابتسمت رشا وقامت علي حيلها بقت تقيس الهدوم ولقت الهدوم قدرها بس في كم اسكيرت طلعو ضيقين وقفت محتاره طوالي قامت اختها وطلعت ليها كم بلوزه واسكيرت كانت اشترتهم بقروش شغلها وناولتها ليها ...دا شنو يا بت ...ديل حقوتي شيليهم وعلي فكره جداد ...بس ديل حقوتك وانتي جايبهم للشغل ... لا ما لشغل ديل جبتهم للطلعات وغير كدا انا اشتريتم مِن واحده بالاقصاد بتجي الوزاره تبيعهم لينا وبتجيب بضاعتها من دبي وانا كلمتها تشوف ليك كم حاجه يعني قمصان نوم حلوه كدا وقالت بتجينا بكره وتجيب معاها البضاعة وانتي نقي علي كيفك وانا بجدع ليها .... الله يخليك لي وما يحرمني منك ...يابت نحن اخوات انتي بس عرسي واتخارجي ....ههههههه يا حليلك يا ريم منو البقول انا بعد يومين عرسي ...شفتي كيف القسمه عشان كدا ما مفروض اي بت تزعل لو أتأخر نصيبها لانه ربنا ما بنسي عبده بس اهم شي الزول يظن بالله خيرا .... عقبالك يا ريم وان شاءالله بعدي بأسبوع .... ان شاءالله هييييي الجماعه سكتو شكله عمك طلع ... اي والله مافي صوت ااااااه امي جات ... اه يا بنات بتعملو شنو .... بقيس في الحاجات .... طيب كويس ... بس يا امي خايفه عمي يعمل لينا مشكله .... ما تشتغلي بيهو هو اصلو كدا حق مشاكل وقال ما بحضر العرس .... وب علي منو البكون وكيلي طيب ... يا بت اخوانك مافي يعقدو ليك زي ما حصلت حاجه سيبك هسي من كلام عمك واقعدي كدا جنبي .... وقَعَدت رشا وكمان ريم وطوالي طلعت من تحت اباطها علبه وفتحتها وطلعت ليها غويشتين ومدتهم ليها ... دا شنو يا امي ...ديل غوايشي انتي اتنين وريم لمن يجي عدلها اتنين كمان ...بس يا امي دا دهبك ...وانا اعمل بيهو شنو ماهو في النهايه حيكون ليكم ...بعد الشر عليك ربنا يخليك لينا أمسكي يا ريم امشي بكره السوق الشعبي خليهم يلمعوهم ...حاضر .... اه المهر ح نعمل ليك منو الكفايه يوم العقد انا أديت اخوانك عشان يمشو يجيبو حاجات الكفايه والباقي تاخديهو ....لا يا امي خليهو معاك انا ما محتاجه ليهم بس ح اشيل مليون عشان رشا تمشي تجيب لي حاجا داخليه .... طيب مافي مشكله الله يتمم علي خير ..
🎵🎵🎵 العرس 🎵🎵🎵
رشا وساره في الكوافير وريم مشت لكوافير تاني ورشا قاعده منتظره دورها لانه ساميه عندها زحمه شديد وهنا جات داخله سماح ... اول ما شافتها رشا جرت عليها وهي بتلوم فيها وبتبكي ليه يا سماح اشوفك اخر واحده زي الما فرحانه لي ....سلمت عليها وقالت ليها ما تبكي عشان عيونك ما تتورم وانا والله مشغوله مع خالد واه ان جيتك انا عندي منو غيرك .... وحضنتها وباركت ليها وقعدو واتفاجات ساره بان سماح حاجزه عند ساميه كمان وبعد شويه قعدو يتمكيجو وطلعت رشا خطيره وساره بالفستان حق لندن طلعت حاجه كدا ولا سماح كانت برضو رهيبه وجو ناس خالد وحسام ونزار ولؤي والخاله وريم واول ما طلعت رشا وقابلها خالد حسي انه بالجد ربنا عوضه وأتقدم عليها وهي كانت بترجف مد يده ومسك يدها الكانت زي التلج حسي بيها عاين ليها وقال ليها انا بحمد ربنا انه اختارك لي شريكه مبروك علينا ... ردت بتمتمه وقالت الله يبارك فيك وطلعو ركبو مع حسام وساره عاوزه تركب بقدام طوالي رشا قالت لي سماح اركبي معانا ... وجرت سماح وزحت ساره الكانت ماده يدها عشان تفتح باب العربيه بس سماح فتحتو وركبت حست ساره بإحراج وطوالي رجعت لي وراء وهنا نزار جاء عليها وقال تعالي يا ساره معاي بس لؤي مسك يدها وقال ليهو ح تركب معاي ... اوكي اوكي مافي مشكله ... ورجع علي عربيتو وهنا حست ام لؤي بتعامل ولدها الما حلو وطوالي قالت لي نزار انا وريم ح نركب معاك .... يلا طيب وركبو والكل أتحرك وحسام بعاين لي ساره ساي كان عاوزها تكون معاه دا الإحساس الجاه في أللحظه دي عاينت ليهو سماح لقتو بعاين علي ساره وهي في عربيه لؤي وساره لأول مره حست انه هي المفروض تركب معاه وبقت تقول لنفسها انا مالي الليله بحسام مالي حسّيت بالإحساس دا أكون بُح وقطعتها حتي قبل ما تتمها لالالالا ما أظن انا ما اتعودت علي اني احب بس في احساس في نفسي بقول عكس كدا وما انتبهت لي لؤي الكان بتكلم معاها وبتغزل فيها وهي بالها في حته تانيه خالص ووصلو الاستديو واتصورو وبعدها مشو علي صاله نادي الضباط ودخلو علي الصاله والزفه اشتغلت بس الجيران كلهم اتخلعو دي ما ياها العروس وكل اتنين قاعدين جنب بعض بقو يقطعو أهي انا اسمعت انه العروس رجعت ليهم الشيله قالو انه العروس لقت في جوال العريس صور بنات وكلام ما كويس معاهم .... لا يا خي انا سمعت انه ام العروس وام العريس اتشاكلو مع بِعض .... وطبعا كلام الناس كتير والبمشي وراء كلام الناس عمرو ما ح يرتاح ومر العرس بسلام وبعدها مشو علي الجرتق في صاله مارينا وكانت حفله اوفر التايم بي نزار المهندس وعمل عمايل في الحفله والعروس بالتوب الأحمر تجنن ....
ومن الصاله طلعو قريب الساعه اربعه وطوالي جاهم لؤي وقال لي خالد يلا عشان تمشو تشيلو شنطكم وتمشو علي المطار ... مطار شنو يا لؤي ... دي هديتي ليكم اسبوع في شرم الشيخ وحاجز الفندق وكل شي تمام ....عاين لي امه وخالته كأنه بسألهم متين قدر لؤي يعمل دا كله وهنا الخاله قالت ليهو عاوز تعرف صاح جوازك وجواز رشا انا الشلتهم علي فكره حتي رشا ما بتعرف ريم جابت لي الجواز .... والله يا جماعه دا كتير علي ... تستاهل يا ولد الخاله .... والله ما قصرتو كلكم وربنا يقدرني وارد جمايلكم ... يا زول جمايل شنو مافي بينا الكلام دا انت زول طيب وتستاهل كل خير .... وطلعو علي البيت وطول الحفله ساره كانت ما بطبيعتها وسماح هي الكانت مستلمه الجو كله ولمن جو يركبو العربات مشت ساره ركبت مع هناء وأخوها احمد وكانت هي اول وحده تمشي البيت وطول الطريق احمد يعاين ليها ساي بالمرايه هي عارفه انه احمد بموت فيها كم مره رسل ليها في الواتس بس هي ما عبرته .... وحسام بقي يسال وين ساره ...ساره يا ولدي ركبت مع هناء صحِبتها حسي بضيق ومشي طوالي ركب عربيته كان نفسه يحصلها لانه حسي بيها طول الحفله ما كانت بطبيعتها .... دخلت ساره البيت وبدلت هدومها وشالت العلبه حقت الاكسسوار الجابتو ليها ام حسام وقلعت الاكسسوار وعاوزه تختو و العلبه وقعت من يدها دنقرت وهي مضايقه وبتقول في نفسها انا انا فعلا بحبو ما قادره اطلعو من راسي ليه وبس ترفع العلبه تنتبه للورقه الكانت مطبقه صغيره خالص زي ورقه قطعه اللبان .... فتحتها واول ما شافتها لقت مكتوب فيها بحبك يا ساره وجنبها توقيع صغير باسم حسام جسمها كله بقي يرجف حست انها عاوزه تقع لالالالا مستحيل حسام بحبني زي ما انا بحبه ايوه بحبه والله بحبه وحست بدوخه دا شنو الفيني معقول ورقه زي دي ح تخليني ادوخ ولا انا مالي ختت الحاجات وقفلت العلبه وجات مارقه حست برأسها تقيل شديد قالت دا اكيد من صوت الساونات بس تمشي خطوه تلقي نفسها جسمها تلج شديد ورأسها بقت لافه وشويه وبقت ما شايفه قدّامها ورب جات واقعه من طولها جنب عتبه باب الاوضه في أللحظه دي حسام كان في شارع جاي علي البيت وفجاءه حك فرامل من غير ما يشعر لمن الكل صرخ وهنا سماح قالت ليهو مالك فيك شنو يا سحس هو اول ما سمع كلمه سحس اتذكر ساره لانها اول وحده قالتها ليهو وخالد بقي يقول ليهو حسام مالك عاوز تطلعني من الدنيا وانا لِسَّه ما دخلتها ....انتبه حسام انه موقف العربيه في نص الشارع والعربات الكانت وراه تضرب البوري ....انا أسف بجد أسف وأتحرك وهو بقول في نفسه انا مالي ودا شنو الحصل لي وبقي ماشي وسرحان في ساره ... وصلت الحبوبه وبتها محاسن وسلمي وجات الحبوبه داخله اي جوا قلعت توبها ورمته في السرير وعاوزه تقعد تنتبه لي ساره الكانت مرميه في الارض وبقت تصرخ وتكورك جات سلمي ومحاسن يجرو خافو انها تكون وقعت يلقو الحبوبه مدنقره علي ساره وتبكي وتضرب فيها والام بقت تكورك جاء حسام ونزلو من العربيه يسمعو الكورك يجرو جري وحسام خلا باب العربيه فاتح وجرا يحصلهم بس يسمع الكل بقول ساره يقيف في مكانه مصدوم ما قادر يتحرك وهنا يشوف خالد شايل ساره وطالع بيها علي برا وكلهم طلعو الا واقف ما قادر يمشي أتمالك نفسه وجرّأ طلع لقي خالد ختاها في عربيه خالتو ومعاه محاسن وسلمي وجات الحبوبه بقميصها تتسند واي يا ولدي أمسك بيدي خلينا نمشي وراهم وسندها حسام وعينه علي العربيه الماشه وركبو وساق حسام باقصي سرعه وسماح دخلت رشا جوا .... بس يا سماح مفروض نمشي معاهم ...اسكتي اسكتي دي بتتدلع ساي هسي ح تقوم زي القرده ما تخافي عليها .....