للحب كلمة

١٤

لا حول ولا قوة الا بالله شيلو يا شباب والله انا ضربت بوري شديد بس هي هي ما عارف مالها ما زحت ....دا ما وقته يا ود الحلال افتح لينا بس باب العربيه وجرا صاحب العربيه وهو بتمتم ويقول ربنا يستر ربنا يستر واتشالت ساره ومشو بيها علي العربيه وواحد من الشباب الكان جنب المكتبه شال حاجاتها ومسك تلفونها واتصل علي اخر رقم متصل عليها وكان مكتوب فيه اختي حبيبتي ..تييييييت تيييييييت تيييييت طلعت سماح تلفونها من الشنطه واول ما شافت رقم ساره ضغطت علي مشغول ودخلت التلفون في الشنطه وهي بتبكي لِسَّه وتاني الشاب اتصل عليها والمره. دي ردت عليها وهي معصبه نعم في شنو تاني وهنا تسمع صوت الشاب وهو بقول ليها أسف يا اخت بس صاحبه الرقم دا صدمتها عربيه ودا اخر رقم متصل عليها وهي حالتها خطره ....شنو انت بتقول شنو اختي اختي انا صدمتها عربيه وهي وين وبقت تبكي وتصرخ ...اهدي اهدي اهدي يا اخت نحنا ماشين علي مستشفي الخرطوم ....طيب طيب وقفلت التلفون وبقت تأشر لأي عربيه ماره وهنا وقفت ليها عربيه ملاكي نزل صاحب العربيه القزاز وقبل ما يتكلم بقت تبكي وتقول ليهو عليك الله وصلني اختي عملت حادث عليك الله وصلني ....اركبي اركبي ركبت وهي بتبكي ...معليش بس اهدي وقولي لي في مستشفي ...الخرطوم الخرطوم ...طيب انشاءالله مافي عوجه انتي قولي يارب .....يارب يارب ودموعها نازله وبقت تخبط في نفسها وتقول انا السبب انا السبب ما كان مفروض أقول الكلام القلتو انا السبب يارب تشيل من عمري وتعطيها لو حصلت ليها حاجه عمري ما ح أسامح نفسي ...الشاب بقي متوتر بسبب حالتها وبقي سايق باقصي سرعه لحد عشان يوصلها واول ما وصل المستشفي وهنا تفتح الباب وتنزل من غير ما تشيل شنطتها وجرت علي الاستقبال تسأل وهي نفسها قايم لووووو سمحتوووو في في بت جابوها عامله حادث هي كويسه ووينها قول لي الله يخليك .... دقيقه لو سمحتي وشويه ورد عليها وقال ايوه بس دي ماتت .... وهنا تقع من طولها سماح وهنا يدخلو كم شاب ومعاهم وحده غرقانه في دمها والمستشفي بقت في حاله ارتباك ممرضات بفوقو في البت الواقع وممرضين دخلو الجاتهم غرقانه في دمها علي غرفه العمليات وشويه وعلا صوت الميكرفون بنادو علي الدكتور وجاء داخل الشاب الوصل سماح بعد ما انتبه انه شنطتها في عربيته واول ما يشوفها يجري عليها كانت فاقت وهي بتبكي وتقول اختي ماتت اختي ماتت نزل عليها الشاب وقال ليها انتي متأكده لانه هسي دخلو واحده برضو و عامله حادث كمان يمكن تكون دي اختك .... ما عارفه بس لمن سألت قالو لي انها ماتت ....دقيقه كدا اهدي وقولي لي انتي اختك اسمها منو ...ساره اسمها ساره وقف علي حيلو ومشي علي الموظف الكان واقف في الاستقبال وقال ليهو لو سمحت الزوله دي كانت بتسأل عن اختها وقالو ليها انها ماتت بس ممكن تشوف لينا اسم الماتت منو .... دقيقه وطلع الدفتر وبقي يشوف وهنا رفع راْسه وقال ليهو الماتت اسمها سعاد .... اه الحمدلله وأتلفت عليها وبقي يقول ليها ماهي اطمني دي اسمها سعاد ... بقت سماح تقول الحمدلله الحمدلله طيب اختي وين وهنا جاء عليها شاب كان سمع الحوار الحاصل وقال ليها انتي إلانا كلمتك قبل شويه وقلت ليك انه اختك عملت حادث ...ايوه انا هي وين اختي ودووها وين رد علي عليك الله طمني ... دخلوها علي العمليات وهنا قبل ما يتم كلامه سابتو وجرت ومعاها الشاب وهو شايل شنطتها في يده واول ما وصلو قال ليها دي شنطتك وان شاءالله ربنا يطمئنكم عليها ...ان شاءالله وشالت شنطتها وفتحتها ويدها بترجف وطلعت تلفونها واتصلت علي رشا عشان تكلم ناس البيت وقفلت منها ورشا بقت ما عارفه تعمل شنو ولا تتصرف كيف دخلت علي حسام وهي بترجف وقالت ليهو حسام في موضوع كدا عاوزه اكلمك بيهو .... رد عليها وقال معليش يا رشا اقعدي دقيقه بس بتصل علي ساره وما بترد كدا ارجع ليها تاني ...مافي داعي ترجع ليها لانها ما ح ترد عليك ...نزل التلفون من يده ورفع راْسه ليها وقال ليه مالها ما ح ترد علي .... لانه لانه ...وقف علي حيله وهو معصب وقال ليها في شنو يا شا لو سمحتي اتكلمي .. بصراحه .ساره عملت حادث وحالتها خطره وهي في العمليات هسي ...شنووووو ساره وين ومتين وفي مستشفي شنو ....الخرطوم في مستشفي الخرطوم .... شال مفتاح العربيه وجرا علي العربيه زي المجنون ودموعه نازله جاء دكتور الفاتح علي رشا وهو شايف حسام طالع وهو بجري ... ماله دكتور حسام ... بت عمه عملت حادث .... لا حولا ولا قوة الا بالله طيب مَش مفروض نحصله ...ايوه بس انا لازم اصل البيت أكلم خالد اخوها وامها ....طيب أرح أوصلك ومن هناك نمشي معاهم ...كتر خيرك وطلعت شالت حاجاتها ومرقت معاه واول ما وصلت البيت وقابلتهم حكت ليهم بالحصل والكل بقي ببكي وركبو مع دكتور الفاتح ومشو علي المستشفي وهنام وصل حسام وسأل في الاستقبال واول ما عرف طلع فوق يلقي سماح والشاب يا حليلو لِسَّه واقف معاها اول ما شأفته جرت عليهو وهي بتقول ليهو الحق ساره ساره بتموت يا حسام ما قال ولا كلمه وجرا وقف جنب باب غرفه العمليات كان زي المضروب علي رأسه ما عارف يعمل شنو ولا يتصرف كيف يصرخ ولا يبكي ولا ولا ولا وشويه وجاء خالد وأمه وحبوبته ورشا ودكتور الفاتح وبقو واقفين وحسام قاعد في الارض ومنزل راْسه بين ركببته ومرت أكتر من ساعتين والام بتبكي واكتر زول كان متجرس الحبوبه وجات الخاله وراجلها ولؤي وأخو رشا وأمه بعد ما كلمتهم رشا بالتلفون وووورين حتي أتفتح الباب وطلع الدكتور واول ما شافو جرو عليهو يسألوه ساره كيف هنا حسام رفع راْسه واول ما شاف الدكتور قام علي حيله وجرا عليهو وهنا الدكتور قال ليهم نحنا عملنا العلينا بس الباقي علي ربنا ...كيف يا دكتور يعني بتي ح تعيش ولا .... والله هي نزفت كتير لحد ما جاتنا وكله بيد الله انتو ادعو ليها بس وسأبهم ومشي
..
😭😭😭😭😭😭
الكل قاعد جنب العنايه ويدعي والماسك كتاب القران يقرا والوقت بعدي والصباح قرب يصبح حسام بقي ما قادر يستحمل طوالي نزل لدكتور عشان يعرف الحاله بالضبط خاصه انه مشي ليهو ولقاه في العمليات وهنا لمن نزل المره التانيه مشت وراه سماح بس هو ما شعر بيها ودخل عليهو لقاهو ماسك ورق تحاليل واول ما شافه قال ليهو انتو تبع المريضه ساره ...ايوه ايوه انا الدكتور حسام خطيبها بس ياريت يا دكتور تطمنا وهنا وقفت سماح جنب الباب بي برا وهنا الدكتور قال ليهو دي تحاليل المريضه انا شكيت في شي في ألاول وطلبت اعمل تحاليل تانيه وللاسف لقيت ...لقيت شنو اتكلم يا دكتور .... للأسف سرطان في الدم ....شهقت سماح وختت يدها في خشمها من الصدمه وهنا حسام ضحك ويضحك لمن قلب ببكاء وهنا الدكتور قال ليهو اهدا اهدا يا ولدي بس معقول انتو ما لاحظتو عليها اي تغير في الفتره الفاتت أتمالك حسام نفسه ومسح دموعه بيده وقال ليهو قبل كم شهر تعبت وودينها المستشفي بس قال انه عندها انميا ....غريبه مع انه هنا ظاهر في التحاليل بس الصباح ح نعيد التحاليل تاني وان شاءالله تطلع النتيجه سلبيه ... ان شاءالله كدا بس يا دكتور ممكن تديني اشوف نتيجه التحاليل ...طبعا طبعا وحسام مد يده وهي بترجف وشال النتيجه وبقي يقرا فيها ودموعه نازله وبعدها قال لي الدكتور لازم نعيد التحاليل ... اكيد اكيد ما تشيل هم وطوالي وقفو وشكره وطلع يلقي سماح في وشه اتخلع وخاف انها تكون سمعت ...انتي انتي من متين واقفه ... من اول ما قال ليك الدكتور بنتيجه التحاليل وبقت تبكي بحرقه وهنا حسام قال ليها اسكتي ما لازم زول يعرف علي الاقل لحد ما نشوف نتيجه التحاليل التانيه ...ما ح يكون عندها صاح يا حسام ما ح يكون في سرطان ....ان شاءالله ان شاءالله انتي ادعي بس وقولي يارب ... يارب يارب طمنا علي اختي وما تخليني اشوف فيها حاجه كعبه والله ساره طيبه وتستاهل كل شي حلو يارب ... ومشو هم الاتنين وبقو يبعدو يبعدو وساره في غيبوبه تامه حاسه كأنها في بير غريق وقدر ما تصرخ مافي زول بسمعها يا الله وين انا معقول انا مت والبير دي قبري طيب انا واقفه علي حيلي وكأني عايشه بس منو الرماني في البير دي وليه مافي زول بساعدني عشان اطلع حساااااام اه سماح بتحبو وانا واقفه بيناتهم احسن شي ما اطلع صوت عشان مافي زول يطلعني من البير دي عشان حسام يبقي لسماح ايوه انا ما مفروض امرق من هنا خليني احسن اقعد هنا بس ...