للحب كلمة

١٥

جات الحبوبه وامها داخلين عليها ودموعهم نازله وقفت الحبوبه ومسكت يدها ... ساره يا بتي فتحي عيونك ما تسيبنا برانا البيت مسيخ من دونك يلا قومي يا ساره ..... ديل امي وحبوبه يااااااا مالها حبوبه بتبكي لحظه لحظه دي بتنادي علي ومالها بتقول لي فتحي عيونك وانا عيوني فاتحه والله حبوبه دي غايتو بتقول حاجات تضحك .... وبقت تضحك بس تخت يدها في خشمها وبقت تقول لو سمعو ضحكتي ح يعرفو انا هنا لالالالا اخير اسكت وما اعمل حركه بس انا تعبانه خليني ارتاح شويه ..... وقبل ما تغمض عيونها تجي داخله سماح بعد ما امها وحبوبتها طلعو .... ساره ساره .... ساره تتلفت دا صوت سماح ايوه سماح لالالالا يا سماح ما تزعلي مني انا مشيت منكم خلاص ما ح اطلع من البئر انتي امشي عرسي حسام وعيشو .... وسماح ختت يدها في رأسها وبقت تقول يا روحي انتي انا اسفه عشان زعلتك مني بس انا غلطانه وأنانيه ما فكرت الا في نفسي ونسيت انه كل شي قسمه ونصيب وانتي نصيبك حسام يلا قومي عشان نعمل ليك عرس ما أتعمل قبل كدا لوحده وانا ح اقيف معاك واخت يدك في يد حسام ..... سماح انتي بتقولي كدا مستحيل انتي بتحبيهو اكتر مني .... ساره فتحي عيونك وشوفي منو الجاء وكان ح يموت بخوفه عليك....منو منو انا ما شايفه حاجه ما شايفه بس دي ريحته ايوه ريحه حسام .... اه مافي تحسن والله مافي شي جديد بس انت تعال اقيف قريب منها يمكن تحس فيك وقف حسام جنبها ومسك يدها وبأسها وقال يا عمري انتي ان شاءالله فيني ولا فيك يا قلب حسام انتي .... وسماح دموعها نازله كان همها كله ساره تبقي كويسه وتعرس حسام اسمع يا حسام انت مَش قلت عاوز ساره ان شاءالله اول ما تقوم بالسلامه تعملو العرس طوالي ....اكيد اكيد بس هي ترجع لي تاني وانا بكره اعقد عليها .... اه اه سماح حسام انتو بالجد عاوزني ارجع ليكم يااااااااا سلام طيب انا هنا تعالوووو طلعوني يا هووووووي يا ناس انا هنا ..... ليه ما قاعدين يسمعوني انا هنا يا سماح تعالي ساعديني عشان امرق ....
😭😭😭😭😭😭
يا جماعه امشو والله وقفتكم مافي داعي ليها امشو البيت نومو شويه وبعدين للعصر كدا ارجعو ان شاءالله تكون فاقت .... وفعلا الناس كلها تعبانه وكان لازم تمشي تنام عشان تقدر تواصل مشو وفضلت سماح وحسام وقعدو في الكافتيريا وكل واحد اخد ليهو تكيه وغفي شويه ما حسو قدر شنو نامو بس حسام قام مخلوع بعد ما حلم حلم مزعج شديد كان الضهر باْذن مشي طوالي اتوضأ ومشي صلي وقعد يبكي بكاء شديد ودعي لساره وشويه تلفونه ضرب طلع التلفون من جيبو ورد من غير حتي ما يشوف المتصل واول ما سمع صوت امه كأنه ما صدق بقي يبكي ويقول امي محتاج ليك شديد ...سجمي مالك يا ولدي فيك شنو وقعد يحكي ليها وهي تواسيهو وأصرت انه يجيبها هنا ووعدته انه تعمل المستحيل وتجهز ليها ورقها بس لازم ترسل لي التقرير بالفاكس وكل اوراقها ....طيب يا امي ح أرسل ليك بس انتي ادعي ليها ...الله يرفعها ويقومها بالسلامه ..... امين يارب ... وقفل منها وطوالي قام مشي لدكتور يشوف عمل التحاليل ولا يلقي سماح سبقته ومن شكلها عرف الكارثه المنتظرهو وقف وما قدر حتي يسأل ...بس الدكتور اول ما شافه هز راْسه وقال للأسف النتيجه ايجابيه سرطان في الدم .... قعد بكل قوه في اقرب كرس وخت يدينو في وشه وبقي يقول اللهم لا أسألك رد القضاء ولكن أسألك اللطف فيه .... 💧💧💧💧💧
بعد مرور يومين فاقت ساره وعدت مرحله الخطر بس لِسَّه الخطر الكامن بنهش في جسمها .... الكل قاعد وهناء جنبها من ما عرفت من رشاء كانت كل يوم بتجي مع ناس بيتها وكلهم حوليها مبسوط بقومتها بالسلامه وخاصه الحبوبه ما عاوزه تبعد منها ومفروض تبدأ العلاج بس هي لِسَّه ما عرفت والدكتور مصر انها تعرف عشان اي تاخير مافي صالحها وقعد حسام يفكر كيف يوصل ليها الخبر اكيد ما ح تستحمل وفي يوم كلهم قاعدين معاها في العنبر وقبل ما حسام يجي داخل عليهم جات داخله عليهم ممرضه وقالت ليها يلا لانه عندك جرعه ...جرعه شنو .... جرعه الكيماوي انتي عندك سرطان في الدم اهلك ما كلموك يعني ....انتي متأكده انه لي انا ...طوالي اتلافتها الحبوبه وقالت ليها ان شاءالله صاروخ كيماوي يفرتك .... هاجت الممرضه فيهم عشان شتيمه الحبوبه وهنا دخل حسام وعرف بالمصيبة الحصلت وام ساره اول ما شافتو بقت تقول ليهو شفت الممرضه الما عندها قلب جايه تقول بتي عندها سرطان سلامه بتي من المرض دا ... دنقر حسام راْسه لتحت وسكت ...حسام مالك ما بترد انا بتكلم معاك ... للأسف يا خاله الممرضه بتتكلم صاح ...نزل الخبر زي الصاعقه علي الكل الام بقت ماسكه بتها وبتبكي والحبوبه تبكي كانو ببكو عليها قبل ما تموت بس الخلا كل القاعدين يتصبرو كلام ساره وهي في حضن امها وهي بتقول الحمدلله يا امي مافي زول بموت ناقص عمر وانا مؤمنه بالله ولازم ارضي بقدره ودا امتحان من رب العالمين عاوز يعرف صبرنا ح يكون قدر شنو جات عليها سماح وقَعَدت جنبها ومسكت يدها وقالت ليها ياريت الفيك في اختك سماح ...قفلت خشمها بيدها وهي بتقول ليها بعد الشر عليك من اي مرض 😭😭😭😭😭
مرت الأيام وأخدت اول جرعه وطلعت من المستشفي وكان عندها كسر في يدها الشمال من الحادثه ورأسها مربوط من جرح الحادث والكل بقي معاها ما بقارقها وهنا وصلت الاوراق وكلمهم حسام انه امه جهزت ليها كل شي عشان تسافر تتعالج في لندن بس الخاله تفاجأ الكل وتقول قبل ما تسافر لندن وانا وقدام الكل بطلب يدها لي ولدي وتعرس وتسافر وهو يكون معاها رائك شنو يا محاسن يا اختي ...وانا وين ألقي زي لؤي بس ساره توافق وانا ما عندي اي مانع اه يا ساره رائك شنو في طلب خالتك .... انا انا مووووو وبس تقطع كلامها سماح وتقول لا ساره ما ح تعرس لؤي .... كلهم اتلفتو عليها واولهم ساره الكانت اصلا ح توافق عليهو عشان تخلي حسام لي سماح اختها ...سماح انتي بتقولي شنو ...بقول لا يا خالتو ساره ما ح تعرس لؤي ....ولدي انا مالو عشان تقولي عليهو لا .... يا بت كيف تقولي علي ولد اختي لا ونحنا عارفين من زمان انه لؤي عاوز ساره ...الحبوبه قاعده تسمع وتشوف ساي وعينها كانت علي ساره ولاحظت انه عيونها في اتجاه حسام وحسام البشوفو بعرف قدر شنو هو بحب ساره .... لانه يا امي حسام كلمني وقال عاوز ساره وساره موافقه عليهو وقبل ما يتكلّمو ولا يعلقو ردت الحبوبه وقالت صاح كلام سماح انا زاتي حسام كلمني وقال لي انه عاوز يتقدم ليها وغمزت ساره بعينها ..... والخاله هاجت وكوركت وأختها تهدي فيها بس الذاد الطين بله كلام خالد القال انه موافق علي حسام ودا ولد عمها وهو أولي وهو التكلم الاول اي لؤي دايرها بس مافي زول فيكم أتقدم رسمي ...وزعلت الخاله وطلعت وسابت البيت ومحاسن بقت في موقف زي الذفت اختها ولا بتها العيانه هي همها كله انه بتها تعيش باقي أيامها سعيده مافي وقت للمجاملات المافي داعي ليها ..... ولؤي عرف بالحصل وزعل شديد وساب الخرطوم ومشي جوبا اصلا عنده مكتب هناك وشغل ومرت الأيام والخاله زعلانه وما بترد علي اتصالات اختها وفي يوم اختها تقرر تمشي ليها عشان تنهي الزعل البينهم وعارفه اختها قلبها ابيض ما ح تردها وفعلا مشت ليها واستقبلتها سلمي ببرود بس محاسن مقدره موقف اختها وما زعلت بس بقت تقول ليها يا سلمي يا اختي انا اكتر واحده اتمنيت لؤي لوحده من بناتي بس لو كان عندي شك واحد في الميه انه ساره بتحب لؤي وما بتحب حسام انا كنت جبتها ليك لحد عندك بس ساره عاوزه حسام وانتي عارفه بتي لو عاشت سنه ما ح تعيش التانيه نحنا عارفين المرض دا نهايته شنو وانا عاوزه بتي تعيش الأيام الفاضله ليها وهي مبسوطه وانتي مستحيل ترضي لبتي غير كدا وبقت تبكي محاسن وسلمي صعبت عليها اختها لانه كل كلامها كان صاح وباركت ليها وقالت ليها ربنا يتمم علي خير بس ح تعقدو ليها متين ....امه جايه اليومين الجايين واول ما تصل ح نعقد ونعمل كل شي وح تسافر علي طول عشان تكمل علاجها هناك ....الله يسهل عليها ...يعني خلاص انتي ما زعلانه ....ما اكدب عليك في الاول زعلت بس لمن سمعت كلامك لقيتو عين العقل وزي ما لؤي ولدي ساره زاتها بتي ومسكو بعض وبقو يبكو .... وبعد تلاته ايام جات ام حسام ومشي استقبلها ولدها وخالد ونزلت عند ناس امها الفرحو بجيتها بس زعلت ندي شديد بعد ما عرفت انه عمتها جايه عشان تعرس لحسام بت عمه وبهناك الكل قاعد يحضر للعرس وسماح بتخدم ساره بعيونها وكل تجهيزات العرس قايمه بيها براها وهناء ما فارقت ساره نهاي وتهاني جارتهم قعدتها عندها عشان العريس ما يشوفها قبل الدخله والحبوبه معظم الوقت قاعدهو مع ساره وموقفه تهاني زي الألف تخدمها مره شاي و مره قهوه ومره اكل بس هي مبسوطه لانها بتزكرها بي امها ..... وهنا قاعدين الحبوبه وساره يتونسو وفجاءه ساره قالت ليها تفتكري يا حبوبه ح اعيش لحد ما اتزوج وأجيب عيال واربيهم ....نزلت دمعه الحبوبه وهي بتقول ليها تفي من خشمك دا كلام شنو ان شاءالله تعرسي وتجيبي عيال وتحضري جديدهم وبقت تبكي ....طيب انتي ليه بتبكي طالما انا ح اعيش ان شاءالله زي ما قلتي ....ببكي عشان تاني ما عارفه اتشاكل مع منو ... وتجي سماح داخله وهي شايله توب الجرتق مشت عملتو عند وحده مصممه تياب وهنا ضحكت ساره وقالت ليها بس اوعك بعد ما اسافر تتلفتي علي اختي وتقعدي تداعي عليها ...دعاء تاني توبه خشمي دا ما ح يقول الا الكلام الحلو بس فجاءه سماح بعد ما توريهم التوب ويعجب ساره تقوم ومن غير ما تشعر تكشح كبايه إلقهوه القدام حبوبه وفجاءه الحبوبه قالت تتكشحي بالتراب يا سماح ان شاءالله ووووين الفيهو داء عمره ما ببطلو وكلهم بقو يضحكو حتي الحبوبه بعد ما انتبهت لذله لسانها هي قالت ما ح تدعي تاني بس صدق من قال ادعي علي ولدي وأكره البقول امين بس ياريت نفهم ونتعظ انه الدعاوي حتي اذا كانت من غير قصد وبعفويه ممكن تصادف انه باب السماء يكون مفتوح علي قول اهلنا الكبار وتستجاب .....