للحب كلمة

١٧

حمدلله علي السلام يا عمري ...اه اه يا حسام انا راسي تقيل شديد انا وين .... انتي دختي في الحفله ووقعتي بس الحمدلله مافي حاجه خطيره يلا قومي آكلي ليك لقمه ...انا مالي نفس وخشمي مسيخ وعندي طمأم ...دا عادي من اثر العلاج بس بروح بعد شويه انتي اتشجعي عشان بكره تقدري تتحملي السفر .... ليه نحنا خلاص مسافرين بكره ... ايوه حبيبتي عشان كدا آكلي وعشان نطلع من المستشفي دي ونمشي لي ناس البيت نقضي باقي اليوم دا معاهم وَيَا ستي حبوبه مصره انها تعمل الجرتق لينا ....طيب حبيبي وشربت ساره ملعتين من الشوربة وما قدرت تاكل اكتر من كدا وبعدها جاهم خالد ومشو معاه علي البيت وهناك يلقو البيت مليان وبعملو في الغدا واول ما شافوها جرو عليها يحمدو ليها بالسلامه ومسكتها سماح ودخلتها جوا
ارقدي شويه او نومي ليك حبه عشان وشك ينور للمساء بس دقيقه اعمل ليك خلطه لوشك وطلعت سماح وبعد مسافه جات وشايله صحن في يدها قعدت جنبها في السرير وبقت تُمسح ليها وشها ورقبتها .... سماح سامحيني ...أسامحك في شنو وانتي عملتني لي شنو وإذا في حد ممكن يسامح فيبقي انتي لاني انا غلطت في حقك وسمعتك فارغ ....لا يا سموحه انتي عمرك ما سمعتيني فارغ بالعكس اي زول في محلك كان ح يعمل كدا بس والله انا ...وسكتتها سماح وقالت ليها خلاص يا ستي تعال ننسي الفات وخلّينا في المصيبه الحلت علي ...شنو فيك شنو ...اطمني مافي حاجه بس انتي ح تسافري وح تخلي حبوبه لي انا وخلاص شكلها استلمتني من قبيل عامله لي نقه .....هههههههه يا حليلها والله اكتر زول ح يفقدني ....يخسي عليك يا ساره ونحنا يعني ما ح نفتقدك الله يعلم بكره دا ح يقضي علي كيف وقت تسافري ....عارفه والله بس حبوبه رغم شتمها لي عمال علي بطال بس بعرف انها بتحبني وانا بموت فيها ....حبوبه لا بعجبها العجب ولا الصيام في رجب قبيل لمن ودو فطور العريس عملت نقه شديده الأكل دا كتير ما تودو ليهم خروف محشي تتخيلي قالت شنو ...شنو يا سماح ....هههه قالت يحشو ليهم سخله الخروف كتير عليهم .....ههههههه عاد حبوبه بالغت بس يا سماح انتي ما قصرتي يوم العقد وهسي كمان الفطور رفعتي راسي جنب نسابتي وأنتي براك شفتي امس خالاته وبنات اهله بعاينو لي كيف ....ما تشتغلي بيهم كفايه عليك حسام وأمه وبالجد انا ما عملت الفطور دا الا عشان خاطر مره عمي لانها تستاهل وتاني شي كفايه انها عزتك وقيمتك ولازم كنت اقيمها انا كمان ...الله يخليك لي يا احن اخت ....امين يارب يلا نومي شويه انا ح أقفل عليك الاوضه والنور يلا حبيبتي وغطتها وفتحت المكيف وقفلت النور وطلعت بس تجي امها عاوزه تخش وتعرف من سماح انها ح تنوم شويه إطمنت محاسن ورجعت لي جارتها وحبيايبها الجو يقومو معاها بالواجب .....
����������������
وجاء وقت الجرتق وعملو في البيت ودا كان طلب ساره كانت عاوزه تقعد في البيت كتير قبل السفر وجرتقتها الحبوبه هي وحبوبه حسام وبعدها مسكت الدلوكه وغنت لساره وزغردت لمن نفسها أتقطع وعلي الساعه تسعه الكل اتفرق وفضلو ناس البيت بس وقامت ساره قلعت ولبست بجامه وجات حضنت حبوبتها شديد وقَعَدت جنبها في السرير والحبوبه لأول مره تبكي وهي بتدعي ليها بالشفاء وطوله العمر ... والكل بكي بس ساره حست انها قلبتها غم وصرخت فيهم وهي بتقول انا عاوزه شيه يا جماعه جعانه عاوزه اكل أكلوني ولا اعمل ليكم فضيحه هنا وكلهم بعد البكاء قلبو ضحك رغم انها ما عندها نفس عشان تاكل اي شي بس ساره كانت عندها المقدّره تحول الحزن لفرح وقام حسام وقال يلا يا خالد نجيب لحمه وقفت الام وقالت ليهم لا مافي داعي التلاجه مليانه لحم ...بس يا امي بتكون مجمده لحد ما تفك تكون ساره أكلتنا من جوعها يعني ما عارفين سرسر ....علي قولك دي عاوزه ليها وقت يلا خلاص امشو .... وطلعو وجات رشا من جوا وهي شايله عده الجبنه وختتها وقالت ليهم دي جبنه وداع ساره تمشي وتجينا بالسلامه ...ان شاءالله يا رشا وتسلمي حبيبتي بالجد محتاجه لي قهوه ...قالت الام لسماح كوركي لتهاني تجي تعملها وتشربها معانا ...طيب يا امي ومشت تكورك لتهاني بالحيطه وهنا الحبوبه قالت ليها مالك ناديتيها هسي تجي تقعد وتشوف اللحم والله ما ح تطلع الا ومعاها اخر قطعه منها .... ههههههه يا حبوبه خليها تاكل فيها شنو ...بس عشانك يا ساره بقبل انتي الغاليه .... وجات سماح وقالت ليها قالت عندها ضيوف ...اه الحمدلله يعني ما جايه أهو جات من الله بس خلاص يا رشا انتي اعمليها ...بس يا حبوبه هي قالت الضيوف رجال ح تعمل ليهم العصير وتلبس توبها وتجي .....تجيها شوطه تأخذها ....وقعدو يضحكو وماهي الا دقايق الا وكانت تهاني واقفه وسطهم بتسلم عليهم وقَعَدت تعمل في إلقهوه وسماح ولعت الكانون الكبير وشالتو بعيد عشان يولع مع الهواء ... انتي مالك مولعه فحم قدر كدا عاوزه تشوي ولا شنو ...مخير الله تقولي كديسه بتشمي الحاجه قبل ما تتعمل ... ورشا وساره ميتين بالضحك من كلام الحبوبه وهنا محاسن قالت ليها ساره نفسها في شيه وناس خالد مشو يجيبو اللحم ... تماااام يعني العشاء الليله كمان عندكم ...ردت الحبوبه وقالت وانتي من قالو يا عرس فطورك وغداك وعشاك عندنا طفيتي نارك وقعدتي للملح والله الملح دا ح يجيب ليك ضغط ...هههههه عاد الملح دا ما حلو .... ما تزعلي من كلام امي بتهزر معاك ...لا يا محاسن البزعلني شنو يعني عادي والله كلامها علي قلبي زي العسل .... وفجاءه الباب دق مشت سماح فتحت تلقي ليك خالتها جايه واول ما شافتها جرت عليها اختها ومسكتها وبكت واخيرا رجعو الأخوات احسن من اول اي الخاله جات العرس بس كانت متحفظه لكن بجيتها الليله نهت كل الخلافات الكانت موجوده في القلوب وقالت ليهم انها ح تبيت عشان تمشي معاهم المطار وقعدو يتونسو وجاء خالد وحسام باللحم وقامت محاسن وسلمي قطعو اللحم وتبلو ومافي زي نص ساعه قعدت رشا تشوي والكل بتونس ويضحك وشويه وخالد بقي يغني ليهم وكان صوته جميل ومر الليل عليهم وكلهم صاحين لحد الفجر ما جاء قامو جهزو حسام وساره وجات مارقه ولأول مره تطلع ساره وهي لافه طرحتها فأجت الكل بحجابها الغير متوقع مع شخصيتها وجات لحظه الوداع وبكو كلهم وهم بودعوهم وطارت الطياره شايله امال ودعاوي كل حبايب ساره انه ترجع ليهم مشفيه باْذن الله ومرت الأيام وساره بدأت العلاج والدكتور طمنهم وقال ليهم
انه سرطان الدم، يتفاقم في بعض الأحيان، على الرغم من العلاج. ويتحسن الوضع في بعض الأحيان، أو يحدث تراجع. ويكمن ان يعاود المرض أحيانًا. حتى عندما يحصل كدا ، فإن هناك العديد من العلاجات التي قد تساعد في علاج سرطان الدم، أو تساعد على العيش لفترة أطول.وانا دائما بطلب من المرضى المصابين بسرطان الدم الليمفاوي المزمن (CLL)، فحصهم بشكل منتظم عشان اعرف اذا ما كان هناك أنواع تانيه من السرطان. عشان الناس البجيهم
يكون معرضين لخطر اكبر بـ CLL الإصابة بنوع آخر من السرطان

اما انواع العلاج ح تكون كالآتي

زرع خلايا جزعيه

وعلاج بيولوجي

وعلاج إشعاعي

اطمن حسام لكلام الدكتور واطمنت ساره وزرع فيها آلامل ووكلت امرها لله سبحانه وتعالي
���السودان ���
قاعده سلمي بتحضر التلفزيون وفجاءه جاء داخل عليها لؤي كان ليهو زمن اكتر من تلاته شهور واول ما شأفته صرخت وجرت عليهو وحضنته وهي في حضنه عينها علي البت الكانت واقفه برا جنب باب الهول
والبت كانت حاسه انها ح تكون مرفوضه بينهم عشان كدا وقفت وما قدرت تدخل من غير لؤي ما يدخلها زحت من ولدها وقالت ليهو انت جبت معاك شغاله لي اتلفت علي البت وهو بقول لا يا امي دي كرستينا مرتي ...شنو عرست جنوبية وووووب علي وووووب علي وووووب علي الحقني يا راجل الحق شوف ولدك عمل شنو وبقت تبكي وجاء ابوه جاري واول ما شافها كانت كرستينا خدوريه وخدرتها ناعمه زي الحرير وملامحها جميله وكانت في منتهي الاناقة والعطر فايح منها زي ريحه الياسمين كانت جميله بكل معني الكلمه بلع الإبو ريقه وقال ليها اهلًا يا بتي اتفضلي وكان رده فعله غير متوقعه وهنا هبت فيهو سلمي وبقت تقول تدخل وين ابدا ما تدخل بيتي ... يا امي كرستينا مرتي وإذا طلعت انا بطلع معاها و هو عارف معزته عند امه مستحيل تقبل انه يطّلع وحست سلمي انه مسكها من يدها البتوجعها وسكتت ومشت قعدت وهي لاويه خشمها دخلت كرستينا وقَعَدت جنب لؤي وهنا لؤي قال ليهم طبعا يا جماعه كرستينا عايشه حياتها كلها في أمريكا وعندها الجنسيه كمان واول ما اتخرجت وبقت دكتوره حبت تجي تشتغل في بلدها وتخدم ناسها ... مشاءالله يا ولدي يعني عرست دكتوره ...اي يا ابوي كريستينا احلا وأحسن دكتوره في جوبا كلها .... وشويه وقام الإبو ساق مرته ودخلو جوا ....يعني انت موافق علي العملو ولدك ... اسمعي يا سلمي ولدك كبير وواعي يعني مسؤال عن تصرفاته وياخ انتي تحمدي ربك انه هي قبلت بولدك الجاهل وهي دكتوره قدر الدنيا وما تنسي انها سودانيه زيها زيك وكلنا واحد ...بس يا راجل دي ما علي دينا ...عادي قال الله وتعالي لكم دينكم ولي دين ويمكن ولدك يخليها تسلم ويكون ليهو اجر كبير وإذا علي اللون مؤذن الرسول صلي الله عليه وسلم كان اسود والبت سمحه ومافيها شي يعيبها بطلي الكلام الفارغ واتمني ليهم انه ربنا يسعدهم ..... ومرت الأيام وكل يوم بمر كانت كريستينا بتثبت ليهم انها الأفضل ولحد الان ما قدرت سلمي توري امها ولا اختها وفي يوم مافي زول في البيت ويرتفع السكري عند سلمي وتجي داخله كريستينا البيت وتلقاها مرميه وتساعدها وتعالجها ولمن بقت كويسه عرفت انه مرت ولدها عالجتها وبقت المعامله غير وبقت تدخل قلب سلمي ومره في ساعه عصريه جاتها وقالت ليها حبيبتي اذا ما عندك شي المغرب حابه اسوقك لي امي واختي عشان أعرفك عليهم ....حتي ولو عندي شي يا ماما اجله عشان خاطرك انتي تآمري بس ...وحضنتها عليها لأول مره وقالت ليها الف مبروك وربنا يسعدكم يارب ....امين امين امين يا ماما