جانت نظراتنه تحجي بدون ماننطق بحرف من نحصل شي
بصعوبه وبعد طول معاناة نشعر باانو الكلمات هربت منا ونشعر باانوً الكلام اصبح اقل من انو يعبر عن مشاعرنا
كانت كلماتنه اني وسيف قليله ومختصرة والخجل كان شعورنا
وجتي ماما كالت
.....ها حجيتو
.....اي مرت عمي حجينه واتفقنا
....اي الحمدلله
....ها ريمان خلص ماكو بعد عناد وكبر راس
....لا
...هههه شوف شلون خدودها وردت
باوع عليه سيف وجان يبتسم
وكال
....يله اني راح اروح
...الله وياك ابني
وطلع سيف وطلعت وياة داوصله للباب ولمن وصل لحد الباب
ندار عليه كلي
...اريد اكمشج اشوفج حقيقيه بس مراح اكمشج ولا راح اكلجً شي بي حب لان انتي هسه على ذمة رجال
بعدين عود نسولف لان ورانا هوايه سوالف بنت عمي
..... اي تدلل ابن عمي
وضحكلي وطلع
ودخلت جوة وكعدنا اني وماما نفكر شنسوي ويا سامي وبابا
ولمن اجى بابا كتله
......بابا ممكن احجي وياك
...لا
...الله يخليك
...احجي شتريدين
ظليت ساكته ومترددة احجي
...بابا الله يخليك اذا تحبني وتريد سعادتي وتريد راحتي اسمعني للاخير وبعدين احجي
كعدعلى الميز وخله يدة كدامه وكلي
...يله احجي داسمعج
......بابا والله اني ماتقصدت فديوم أذيك او اخلي احد يحجي عليك بابا تعرف شكد احبك وعمري مافكرت اخلي احد يجيب طاريك وفد يوم احد حجه عليه حجايه زايدة ناقصه
احد كلك بنتك موخوش بنيه
بس الي صار موبيدي احنا بشر الله خلقنه ضعفين ومنتحكم بكلوبنا وبعواطفنه
اني صحيح من البدايه مجنت اعامل سيف زين بس
اني دائما جنت احبه يمكن سيف جنت اشوفه اخويه او ابن عمي
اكثر من مااشوف بي خطيبي
ولمن بدة سيف يتغير عليه حسيت بقيمته وجودة بحياتي
ومكدرت اسيطر على الوضع وطلع من يدي وسافر سيف بس
مشاعري اتجاة سيف كامت يوم عن يوم تكبر
اني اسفه بابا داكلك هذا الكلام بس متاكدة انت راح تشعر بيه
وراح تفهمني
ولمن بعد سيف ورجع كمت اشعر اكثر واريدة اكثر وكنت اشوف نفس الاحساس عندة وصلنه لعدت مرات لمفترق طرق بس كل مرة نرجع لنفس المكان وترجع نفس الصفحه الي طويناها تنفتح وبديت احس نفسي داغلط ولمن شفت سامي كدامي كلت خلي انخطب لسامي على امل انو اشوف شي بي
بس اني ماشفت بي الانسان الي ممكن يكون زوجي واني هسه
اريد اتركه حتى لااظلمه واظلم نفسي اني غلطت بس والله
يابابا صارلي سنتين واكثر اني ادفع الثمن
ومااريد ادفع الثمن طول عمري
انت زرعت سيف بداخلي ليش هسه اجاي تبعدني عنه
من بعد ماالحواجز كلها نشالت بينا خليني اعيش مرتاحه
اني اعرف. راح اخليك بموقف صعب بس شسوي
انت ابويه وسندي وظهري اني ماعندي غيركم لان من وكع بس انتو تشيلوني
......والمطلوب مني شنو
كالتله امي
....اني راح اجنبك هذا الاحراج وراح اخابر ام سامي واحجي وياها
...سوي الي تريدي واني معليه وكام
وطلع من يمنه ودخل لغرفته
واني ماما وحدة تباوع على الثانيه وتضحك وثاني يوم ماما
خابرت علىً ام سامي وكلتلها
...اريدج بموضوع شوكت دكدرين تمريلي
لعد العصر انتظرج
سدت ماما التلفون وكالتلي اليوم العصر يجون سامي وامه
....وشكو يجي هذا سامي
....بعد متتحملين دسكتي شراح احجي البارحه الحفله مال مهر مالج واليوم تريدين تعوفي سكتي اني حايرة شراح احجي شراح اكول شلون موقف خليتيني بي صعبً
والعصر اجتي ام سامي وسامي واني ماقبلت اطلعلهم
وبعدين جتي امي عليه كالتلي كومي العالم يريدوج
...شكو شيريدون
....دمشي طلعي خلي نخلص
كمت لبست وطلعت
دخلت للصاله وكلت
....السلام وعليكم
...ام سامي ردت كالتلي
....وعليكم السلام
وسامي جان مبين عليه شلون ضايج وعصبي ومارد من سلمت
كعدت بصف والداتي
جان سامي يكول
...من بعد اذنكم ممكن احجي ويا ريمان وحدنا
...امي كالتله اي ممكن
وكالت لاام سامي تعاي عيني خلي يحجون براحتهم
وكامت امي وام سامي طلعو وبقيت اني وسامي
كلي
....ليش هيج
....شنو ليش هيج
....اني شنو الي بدر مني اني اذيتج بشي كوليلي
....لا ماسويت شي صدكني انت خوش انسان بس اني وياك
متجمعنه حياة صعبه كلش
....شنو الصعب بيها
....اني اسفه ولتزعل مني بس خلينا نفترق هسه احسن مانزوج وننفصل
....بس اني احبج ومستعد كلشي اسويلج شتريدين بس كوليلي
....مااريد شي ولتزعل مني بس اني ماااحبك كلبي موالك
...المن لعد ل سيف هههه والله ضحكتيني لعد ليش عفتي
شنو هاي الافلام
....ماكو افلام ولاابد بس هذا الي طلع ويايه
...اوكي ريمان بس اني ماااعوفج لان اني مولعبه بيدج
ولا راح اقبل تعوفيني لخاطر سيف
...انت شنو دخلك بسيف شعليك بي هو يمك حواليك
...اول مرة اضوج من انسان وأكره مثل سيف
...وانت شعليك بي ولجيب طاري سيف زين
....ماااعوفج وراح اسوي اي شي حتى اخذج الي
وخلي هذا الشي بالج اني مستعد احارب علمودج
....ليش بالكوة هو الحب والزواج مااريدك ياااخي. اني صحيح غلطت وياك واعتذرت منك واسفه الف مرة بس ماازوجك
مستحيل
...خلي نشوف يامرتي بماانو اني زوجج قانون وشرع
وطلع برة وطلعت اني على والدتي وام سامي وجنت منفعله كلش
وكتلها
....خاله الله يخليج كولي لاابنج خلي يروح عني
اني مااريد ازوجه هي مو بالعافيه الزواج
ظلت تباوع عليه وكامت وطلعت
امي كالت
...شكو
....كاعد يهدد ويكلي مااعوفج وانتي مرتي وكام يحجي على سيف
....استغفرالله على هاي المصيبه شلون طلعنه هذا صفح
بس برغم كلشي اليوم جنت اني احس نفسي خفيفه
وطايرة مثل العصفور
خفيفه مثل الريشه ماعندي هم ماعندي حزن سبحان الله من ينطينا الفرح
والسعادة صدك السعادة نعمه السعادة الي ماترتبط بمادة
للاسف دورات نفكر انو سعادتنه بفلوس وبملابس
بس السعادة تكون دائما مرتبطه بشعور بااحساس بحب
بشخص يكملنه شخص نعيش وياة واحنا نشعر بدكات كلبنه
شنو الفائدة اذا اني انثى واملك احساس بس عايشه وكلبي ماينبض
احلى شعور هو فيض المشاعر الي تصير بدواخلنا
اريد فرحتي تكمل ويجمعني بيت بسيف
بس ليش دائما يظهر شي ينغص فرحتنا
ويخليها مو كامله ليش عود مامكتوبنه الفرح مكتوب على كلوبنه ظل تتعذب وتالي وياك يازمن
ورة مايقارب اسبوع واني جنت فرحانه وجان اخويه مهند يريد يحجي ويا سامي حتى تخلص السالفه كلها وحتى اني وسيف نشوف دربنا
بس اليوم والدي لمن رجع للبيت بس جان كلش حزبن واحنا خفنا لايكون احد صاير بي شي
ماما كالتله
...شكو شصاير فدوة كلي شبيك ترة كلبي وكع
....بيت ابو سامي صار وياهم حادث البارحه بالليل
....يمه منو ابو سامي وام سامي
....لاابو سامي بالشمال سامي وامه وسامي وضعه كلش خطر
يكولون ميعيش
..يايمه شنو هاي المصيبه انت شمدريك
...جنت بالمستشفى
....وين صار الحادث
.... بغداد اني اليوم نمرد كلبي عليهم وكل هذا بصفحه ونظرات ابو سامي بصفحه وكعد يكول سامي صارله كم يوم مخنوك والدنيا طالعه من عينه واكيد جان ضايج وديسوق ومنتبه على الطريق وكاانما جان يكلي ابني سوة حادث بسببكم
.....واحنا شنو ذنبنا
....اني كلش اليوم تعبان ومقهور لان ماادري ليش حسيت اانو اني المذنب اخاف صدك جان ضايج بسبب الي صار
.... هذا قدر والله كاتبله هيج ان شاءالله يكوم بالسلامه
....مااعتقد يكوم لان الدكتور من سئلته كلي
الاعمار بيد الله
...يمه الله يساعدهم لا الله ليكولها بعدة ولد شاب
وجان ابويه يباوع عليه وكلي
.....ترة هذا بعدة رجلج المفروض توكفين بجانبه لان هسه اكيد محتاجج والمشاكل والانفصال هسه مو وقتها
سكتت ومجاوبت لان جان كلامه صحيح
ولازم اني اوكف بجانبه بعيد عن انو هو زوجي اعتبرة انسان محتاجني وحسيت فجأة بتأنيب الضمير
وخفت اكون فعلا اني السبب
يتبع .....
#الكاتبه #روجمان
