نور،،،،كل بنت منا عدها ذكريات بطفولتها وبمراهقتها وكل وحدة منا اكو اشياء خاصة مرت عليها بمراهقتها من يمر فد موقف معين او تسمع اغنية معينة او حتى عطر معين او لبسة معينة او حتى مكان معين ممكن يرجعها سنين ليورة تسترجع ذكريات واحلام وشقاوة المراهقة منو منا ماعاشت احلام المراهقة وتخيلت فارس احلامها ورسمت الة صورة خاصة هية بس وحدها تشوفها قصتنا قصة مراهقة مرت بتجربة قاسية لكنها كانت صبورة وكدرت تجتازها نور،،،احنة عائلتنة كأي عائلة عراقية محافظة وتحرص على العادات والتقاليد وتعتز بلمة العائلة وجمعة الاهل بكل مناسبة احنا عائلتنة مكونة من 3 ولد اكبر مني واني البنت الكعدة جنت مدللة والكل يحبني وميرفضلي طلب بس على قدر الدلال كانت امي تحرص انه تزرع بية اجمل الصفات ومتخلي الدلال يأثر بية اخوية الجبير علي متزوج وعندة بنوتات اثنين وحدة عمرها 6 سنين ووحدة 4 فطومة ورسل جان علي ممكمل ويشتغل بالتجارة وفقير وبحالة وميختلط ومو اجتماعي من شغلة للبيت ومن البيت للشغل عكس زوجتة الي جانت اجتماعية وگوية وبكلشي حاطة حالها ههههه ومحد يخلص من لسانها لذلك جانوا اقاربنا مو كلشي يحجون كدامها ومع هذا جنت احبها لان ماعندي اخت وهية وبناتها تارسين علينا البيت ومن تروح لأهلها اضوج اخوية الثاني انور بالجامعة نظم حاسبات جان عكس علي ملعب ولسان وحركات ويحب يطب ويطلع وشقاوجي بشكل حمودي اصغر الولد بالاعدادية ميحب الدراسة ويعشق الطوبة وليل ونهار اني وياه منبطل عركات ومناكرة جنت ثالث متوسط واحب الدراسة كلش وشاطرة واكل هم للدراسة اني ضخمة والي يشوفني ينطيني اكبر من عمري اتذكر جنت بالثاني متوسط ونروح ونرجع مشي من المدرسة اني وصديقاتي جنت اكشخ وكل يومية صدرية شكل وامي متخلي شي بنفسي وشنو اريد اشتري من ارقى واحلى شي بالسوك جنت بعدني مامتحجبة واسوي ضفيرة على جهة وشعري تمري وثخين وناعم واني بيضة ومدبدبة جنة منسلم من المعاكسات والتلطيشات بالشارع وجانوا صديقاتي يكولولي هاي المعاكسات كلها عليج لان انتي احلانا مرة بالمدرسة بدرس الاسلامية جانت المدرسة كالعادة تتكلمنا عن الدين وعن الحجاب وانه هو فرض علينا ولازم نلتزم بي وانه شعرنا يعتبر من المفاتن الي نهانا الله عز وجل ونبيه الكريم من اظهارها من رجعت للبيت جان كلامها كلة بالي شلت حجاب من حجابات ماما ووكفت كدام المرايا حاولت البسةبس جنت مااعرف طبت امي وكالت صلوات على النبي نويرة يخبل عليج نور،،،ماما اريد اتحجب ام نور ،،،اي يمة من الزينات الله يهديج من باجر اجيبلج احلى الشيلات الي بالسوك نور،،،،وماقصرت امي جابتلي اشكال بالبداية من تحجبت استغربت نفسي وحسيت عبالك مبهذلة لان مجنت اعرف البسة بس بمرور الايام تعودت عليه وارتاحيت بي كلش انور اخوية جان يحب وحدة ويا بالكلية واهلنا ميعرفون بي لانه جان يعرف رأي اهلنا بهل موضوع وميحبون العلاقات وجانوا يفضلون يزوجوه مثل علي زواج تقليدي لذلك جان ميحجي بهل موضوع لأحد بس جنت مرات من اصعدلة جاي او فواكه او اي شي وهو يحجي وياها ينطينياها اسلم عليها جنت مرات اسمع سوالفة وياها وشلون يتغزل بيها ويدلعها اضحك واكول هنيالها جنت اتمنى رب العالمين يقسملهم ويتزوجون وبعطلة 40 يوم كمت اطلع بالسطح مرات بالنهار انهزم من هوسة الجهال وادرس براحتي جانت عدنا قريولة حديد بالسطح ينامون بيها ولدنا مرات خاصة انور حتى يحجي براحتة مع الحب جنت من ادرس ماانتبه على الجوارين ولا على شي مركزة بكتابي وبس ومرة من المرات انتبهت على ولد يطير طيور بالسطح ويباوعلي تكررت هالحالة وكام يشمرلي حجي وسوالف تركت السطح وبعد مااطلع اجتي الامتحانات وامتحنت وعدت الايام ونجحت الحمدلله مجنت اريد اروح اعدادية وفضلت اروح معهد معلمات بالرغم انه مستواي جان زين واهلي بحكم محافظين شجعوني على المعهد قدمت معهد وقبلوني بسنتها ابوية وامي الله رزقهم وكتبلهم يحجون ومن رجعوا من الحج ذبحنالهم وسوينة عزيمة جمعنا كل اقاربنا خالاتي وعماتي وخوالي وعمامي وجانت اللمة تخبل خاصة انه بنات عمامي وبنات خوالي مجنت اشوفهم بس بالمناسبات صح اكبر مني بس جنت احبهم واحب سوالفهم جانوا بالجامعات ويحجون على الولد الي وياهم ونضل نضحك على مواقفهم لو المتزوجات يلتمن ويحجن على معاناتهن مع عماتهن بيومها طلعنا نغسل المواعين برة كدام المطبخ ونسولف ونضحك طلع انور وحمودي من الديوانية ومعاهم صلاح ابن عمي الي مجنا نشوفة بالسنة حسنة يدرس طبية جنت اضوج منة احسة خشم ومتكبر بس جان مقرب لأنور كلش طلع وصار بوجهنا جنت رافعة دشداشتي بسرعة نزلتها ومفرعة مالحكت البس شال سلم علينا وكالي بس لا انتي نور نور ،،،ابتسمت صلاح ،،،ماشاء الله صايرة مرة بأي صف صرتي؟ نور،،،اول معهد معلمات صلاح،،،شو معهد معلمات شعجب ماكملتي اذا مستواج زين انور،،،مستواها زين والله بس شلها بوجع هالراس هم تروح طبية وتظل تشكي مثلك صلاح،،،،ههههه بهاي معاك حق مااتمناها لعدوي هههه نور ،،، سلموا علينة وطلعوا وبدؤا بنات خالتي وبنات عمي يسولفون عليه وعلى جمالة ولبسة وعطرة الي اتغلغل بالمكان فصخوه تفصيخ وجانوا يكولون معقولة خالي وماعندة حبيبة والي دكول اتمنى اكبل وياه والي تردلها يمعودة معقد وخشم بس منظر واني اباوعلهم واضحك على سوالفهن كالولي نور مو تحجين سوالفنة هاي لأحد ديري بالج نور،،،لا لتوصوني اخذوا راحتكم سركم بير ههههه
وللقصة بقية ،،،،،
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
