جنت اسعد وحدة بهاي الفترة وجنت شاطرة وذكية ومتفوقة بدراستي عكس اخوتي كسولين وماعدهم واهس للدراسة طبعا ابوية كان ولازال مثلي الاعلى جنت من اخلص الدوام يمر علية للمدرسة ياخذني ونرجع لدوامة وطبعا ابوية شخصيتة واسلوبة كلش اعجبني والموظفين كلهم يحبونة ويحترمو تذكرون من كتلكم انو ابوية بالبيت مالة اي شخصية ويا بيبيتي وعمامي هاي النظرة تغيرت 180درجة ويوم عن يوم حبيتة وزاد تعلقي بي جان جدا مخلص بشغلة وشديد وخدوم وابد ميتقاعس عن مساعدة احد وجنت اني اقرب وحدة الة لان البنت الوحيدة بنص ولد وجان معجب بردود افعالي وشخصيتي وبنفس الوقت جنت ارجع للبيت اساعد امي اكنس انظف اساعد اخوتي واجباتهم بس عمود ابقى بالمدرسة وابوية بدا ترجع علاقتة باامي زينة بالنهاية ابوية وامي يحبون بعض ورجع ابوية ينام بغرفتة وعاف المظيف واني جنت انام يم اخوتي الصغار ويوم عن يوم اني صرت حجايتي بالبيت وابوية يريد خاطري وبيبيتي كامت تشوف العمى ولاتشوفني وتحرض اخواني يضربوني ويغلطون علية تكوللهم ضربوها لكم هاي من تكبر تكسر وجوهكم وصار الوكت الي اكسب اخواني بجانبي وانهي هذا الخلاف جان من يجي واحد من اخواني يضربني اكلة ليش تضربني مو اني اختك احيك واسمع كلامك وباجر عقبة منو يحن ع جهالك غيري ..صدك اخواني جان يشوفون عماتي شون يااذونة واكيد ميريدون جهالهم يعانون نفس الشي ...لهذا شوي شوي كسبتهم طبعا المدارا واني انسق ملابسهم وارتبهة ادافع عنهم كدام ابوية لان كلمتي مسموعة عندة .. وشوي شوي صدك بدت علاقتنا تقوى ونتكاتف ونتقارب ونصير عائلة وابوية كام مينطي مجال لالبيبيتي ولا عمامي يدخلون وحرم عليهم الطبة اذا هو مموجود ...
هسة ذكر حرام ميصير.... لان امي محرمة عليهم ...هههه .بعد وكت ميخالف المهم خلصنا وبيتنا صار هادي ...وماكو تعب على امي وبهاي الفترة امي حملت بااختي فاطمة ...الحمدلله عرفتو بيبيتي ليش سميني الساحرة لهذا ...
مرات انقهر عليها اشوفها وحدها كاعدة وبناتها مو يمهة اكلهة بيبي تجين نتمشى عالنهر بس هي ماشاء الله عليهة اسلوب ماكو منا ....
امشي ..امشي لج ...امشي عالشط شسوي بلة والله تاليتج تريدين تموتيني ادري بيج بت زهيرة تريدين تخلصين عليه اعرف بيج تربات كميلة ومحيسن ....تريدين تدفعيني بالشط وتكولين قضاء وقدر......
هههعه. هوب هوب بيبي مو هيج غبية اني شون اكتلج هيج اكو طرق اسهل....ومااشوف الا النعال طار بالكصة هههههه.والله سوالف عليهة بيبي واركض واسمع الحجي ورايا ....هاي السنة بكالوريا الله يسهل وانجح يارب ...وان شاء الله اكمل دراستي واحقق امنياتي ظلت امي تنك براس عمامي واخوتي عمود يبطلوني وابوية عمود يسكتهم كال تخلص سادس اول معليكم كملت سادس ابتداىي كوة ...وبالعطلة الصيفية امي جابت فطومة حبيبتي اخر العنقود والمدلله واسلوب اخوتي كلة تغير ..وصرنا غير عالم عن عمامي وعماتي وتصالح ابوية ويا خوالي بعد قطيعة لخاطر امي وعمتي زوجت عمو كريم وبعده فارس احلامي لان الضحكة والراحة شفتها بوجه خالتي اتمنى يوم واحد منة ....خلصت العطلة وردت ادخل متوسطة ساعتها عمامي وبيبيتي مقبلو اكمل وحتة حطو سلاح بيد اخواني عمود ماافوت للمدرسة والمدرسين توسلو باابوية ارجع لان شاطرة وطلعت الاولى ع مدرستي بس امالي خابت هالمرة فترة طويلة وابوية وعدني انو بس صير فرصة ويهدون اقدملك ع خارجي بس حقنا للدماء واخوتي متهورين خاف عليهم كعدت وسكتت وطبكت كتبي وامالي اكمل دراسة حسيت الوقت جكد طويل بس معفت كتب جنت اقرا بكتب الولد بلكي عسى ولعل اكدر اكمل ولاانسة المادة واكثر شي قهرني هاي السنة هي سنة السقوط والكل بوكتهة نجح وراحت عليه سنة بس فدوة لفطومة جنت اداريها وادير بالي لان امي تعبانةمو مثل قبل وخلصت السنة وسقطت بغداد وبدا قهر اهلي الجديد ابوية واخواني بعثين ويوميا انزال وياخذهم الامريكان جاية اخبارية ورا ها يعوفوهم والتف حول اخواني جماعة التنظيم لهذا ابوية اظطر يدزهم لسوريا اامن الهم لحد متستقر الاوضاع وراهة سنة اجوي الامريكان اعتقلو ابوية وعمامي وبقة بس حسين من اخوتي لان جان صغير وولد عماتي صح منحبهم بس ولدهم غير يحبونة ويعزونة وهم كامو يحامونا ...ورا هاي المرحلة شفت بيبيتي جكد سباعية وقوية ودارت الحلال كلة وحدهة وتوجه بالعمال وتركض تقابل فلان وتحجي ويا علان المسوولية شفتة عدهة عرفت هي تستحق هاي المكانة والاحترام عد ابناءهة بس حرمت علينة طلعة البيت واذا نطلع الا بوشي خواتي ماعدهم مشكلة بس اني مطلعت لحد مرجع ابوية بالسلامة وحسيت جكد مكانتة جبيرة وعزيزة ويومية ابجي عالمخدة واكول ربي رجعة بالسلامة هو واخوية حامد بس حامد معرفنا وين ذبو لهذا يومية بيبيتي تروح تقابل عمود يطلعون ابوية وعمامي ونسوانهم هم تبهذلو وامي هم ...وتقربنا من بعض وتحسنت علاقتنا نسوان عمامي يحبوني اكثر شي لان جوا ايديهم وانقللهم الاخبار ورا شهر من عام ٢٠٠٤صار سنة ابوية وعمامي محبوسين طلعو افراج وابوية تعبان ومكتئب جان حاد وعصبي والكل خايف منة هو ويسلم بس اني من حضنتة لزمني وحضني ولااستحى من العالم كاعدين بالديوان ودمعت عينة ....بس مكتبنة الفرحة وراهة خطفو رجل عمتي خالدة وظل يدورون علية...
والبيت انكلب ع سجاد رجل عمتي وجانت حيل تحبة وصار عدهة ولد اسمة حازم اصغر مني بسنة وابنة الثاني سافر ..
ورا كم يوم لكينا عمو سجاد جثتة مشمورة عالشط وصار هذا المنوال بعائلتنة يومية مخطوف واحد ويكتلو ويشمرو باب البيت لا والي يموت اكثر يحطون ويا قرص طريقة اعدامة عماتي ٣ولدهم ماتو وخافو عالباقي وانتقلو لمنطقة عود امينة ...بقينة هيج وجماعة التنظيم بدو يضايقون ابوية لو صير ويانا لو علينة وبيوم مطلعتلة شمس طلع ابوية ديحجي وياهم وصل للنهر
..
وشمر روحة وكسر ظهري كسرة العمر ابوية وكع بالنهر ومعرفنا هو مات لو رح يفتح يوم الباب ويكول هياتني يابنات ماكو شي يكسر ظهر البنية اكبر من فقدانه لاابوهة لان هو السند هو العمود ومن يوكع العامود يامن يدفينة يامن يحامينة يامن يحن علينة البيت صار حزن بحزن واني الم بصدري مينتهي مو مصدكة كل ميندك الباب اكول اجة بابا اجة شمعة البيت حسوني حسيتة كبر وشال مسوولية حلو بعدة صغير.وهيج...اما امي احجيلكم على امي يومية طلع هدوم ابوية تغسلهم وتبخرهم وتحضر كل نهاية اسبوع الاكلة الي يحبهة وتوزعهة ثواب لاابوية وحرمت ع روحهة الاكل نفسة ...اني طمست نص اوراقي واحزاني واهم شي اكتب شعر قصايد....قصيدة عن فقدان (الاب)
ماردت القدر يبعدني عنك يوم
ومـاردت السعــادة تعــوف بيبـــاني
ياليل ألاماااااان الماتمرّه غيوم
وياحظــرة حنين بحظنـه دفّــاني
ياأجمل قصيدة وبالوزن محكوم
وياأروع ندى اعلى أوراق بستاني
يانبع الكرم محتااااجتك هاليوم
مو تدري بغيابك طاحت أركاني
ياأجمل حلم وسط الجفن مرسوم
رحت والصور ظلت فوك حيطاني
الك حنيت يابوية اعلى بختك كوم
عفتني ويتمتني وضــاع عنــواني
أفز من نومي وأسمع صوتك المهموم
وأفكدك وأرجع أغرك ويه أحزاني
صرت أنعاك وأبجي اعليك من دموم
وآنه القلم صــــار اليــوم ينعــــاني
ردت أشريك بس اشبيدي ع المقسوم
يالفــركــاك هبّــط راسـي وأذانـي
بس انته أصبحت طير بجنااان يحوم
وهذا الذي مسّكن نوحي وأشجاني
(منقول).....
متعة القراءة اتمناها لكم لاتنسون صوتون للقصة اذا حبيتوهة رح انقطع فترة لحد ماصاحبة القصة تنقلي بقية الاحداث...
#نازك الملائكة
