في بيتنا مقبرة

في بيتنا مقبرة الفصل الأول

في بيتنا مقبرة
الفصل الأول
بقلم أمنية عوض
قصتنا بدت لمن جينا من القري
طبعا ابوي عنده تركة جدي الله يرحمه لمن هو إتوفي أعمامي قسموا التركة وكل زول أخد نصيبه ونحن أصرينا علي أبوي نمشي نشتري بيت ونستقر في الخرطوم "أبوي كان رافض الفكرة دي بس بعد تحانيس وافق ركبنا اول قطر جاي الخرطوم بعد نزلنا ومتوجهين علي بوابة الخروج ركبنا أمجاد بس لحدي الآن ما أشترينا البيت والأمور كانت مجهجهة لآنو نحن أول مرة نجي الخرطوم دقيقة دقيقة أعرفكم
أنا صبأ 23 سنة سبأ أختي الجاية وراي 20 سنة صدام أخونا الأكبر 26 سنة أبوي حاجة معروف 52
سنة أمي رابحة 41 سنة
نزلنا في كفتيريا وقعدنا نريح شوية ونشرب لينا حاجة تروق دمنا أبوي قال بمشي يشوف بيت إيجار لأنو حالياً ما هلنقي بيت معروض للبيع قام أخوي صدام قال لي أبوي أنا بمشي إنت خليك مع ناس أمي قعدنا وراجين أخوي يجي عدت ساعات أخوي لسة ما جاء أمي قلقت وقالت لأبوي الود ده مالوا إتأخر كدة خايفة تكون حصلت ليهو حاجة أبوي قال ليها هو صغير راجل بشنبو ودقنو تخافي ليهو شنو أصبري بعد شوية بجي وفعلاً ما تمت خمسة دقائق جاء أخوي وكان منهك ومرهق قعد وأخد نفس ونحن قاعدين منتظرين يقول لينا لقيت بيت لأنو ما كنا مفتكرين الخرطوم ما بتلقي فيها بيوت إيجار بالشكل أفتكرنا زي القرية تقول عايز بيت إيجار أو إشتري تلقي في ثانية
أبوي قال لأخوي اها إن شاءالله لقيت البيت أخوي صدام قال ليهو لقيت نص بيت غرفة ومطبخ وحوش وحمامات أمي قالت شنوووو غرفة ومطبخ بس البيت ده ما بشيلنا شوف غيرو أبوي قال ليها نحن عايزين نستقر فيهو هو كلها كم يوم لحدي ما نشتري البيت الكبير المهم أمي إقتنعت وقمنا من هناك ماشين علي الزول البأجر لينا البيت وصلنا محلوا طلع معانا و ورانا البيت الصراحة كان بيت صغير شديد بس علي قول أبوي كلها كم يوم ونشتري بيتنا الجديد بهناك أبوي بتفق مع سيد البيت وأنا وأختي سبأ قاعدين نتفحص البيت دخلنا الحمامات وطلعنا علي المطبخ وجينا الغرفة وتاني جينا الحوش بعد شوية أسمع أمي بتقول لأبوي
ليه مليوون في البيت المهرهر ده ده خمسمية كتيرة عليهو أبوي قال ليها ما مشكلة المهم لقينا حتة نقعد فيها لحدي ما نشتري البيت بعد هرجت حتي سكتت أبوي رسل أخوي يجيب لينا خضار من السوق لأنو في سوق صغير بعيد من البيت بشوية أخوي طلع ونحن بقينا ننضف في الغرفة والمطبخ أمي دخلت الغرفة رتبتها وكنا جايبين معانا حاجات بسيطة حتي سراير ما جبناه معانا الصراحة ما جبنا غير ملابسنا
ختت فرشات جبناه معانا فرشناه وقعدنا بعد شوية أخوي جاء وجاب الخضار أمي دخلت طبخت
لينا وجبة حلوووة دقائق والليل دخل علينا نمنا وما حسينا بحالنا إلا علي صوت أبوي بصحينا للصلاة قمنا وصلينا وأمي كانت بتعمل الشاي
شربنا وأبوي قال لي أخوي صدام أطلع شوف ليك سمسار عشان يشوف لينا للبيع فعلاً بعد أخوي صدام خلص الشاي والقهوة حقتوو قام طلع وفكر يمشي للزول الأجر لينا البيت عشان يشوف ليهو للبيع وفعلاً مشي ليهو ونحن بقينا نساعد أمي في النضافة يعني غسيل عدة الشاي والقهوة وكدة أنا شلت المكنسة وبقيت أكنس وأختي سبأ قعدت تغسل العدة وأمي كانت بتتكلم مع أبوي بعد شوية جاتني سبأ قالت لي رايك شنو نقول لي أبوي يشتري لينا ملابس جديدة لأنو زي ما قلت ليكم ما جبنا معانا غير حاجات بسيطة والباقي خلينا هناك أمي إحتمال يجي زول محتاج يشيلوا ...
قلت ليها خلينا بعد نستقر أول إفترضي إبوي أشتري لينا نختها ووين ونحن لسة ما جبنا دولاب حتي إقتنعت من كلامي مشت تغسل باقي عدتها
حضرنا الفطور وقعدنا كدة أخوي جاء داخل سلم ومشي غسل يده وجاء قعد يفطر معانا وثناء ما بنفطر أبوي سألوا اها عملتوو شنو إن شاءالله لقيت بيت أخوي قال ليهو لقينا واحد بس بعيد شوية أبوي قال ليهو وين بالضبط والبيت شكلوا كيف أخوي طلع التلفون وكان مصور البيت أبوي شال التلفون وبقي مبحلق فيهو ونحن بقينا منتظرين أبوي يدينا التلفون ونشوف نحن كمان بعد شاف أدي أمي شافت وهي كمان إتخلعت بالبيت ونحن نتلنا التلفون من يد أمي وشفنا البيت يا سلااااااااااااام 😻😻 ياااخ بيت ولا في الأحلام أنا لمن شفته لمن شهقتا من حلاوة البيت عماااااااارة مباااااااااالغة 😻👌🏻
وأختي سبأ دي علقت هههههه صدام شال مننا التلفون وقال لينا كفاية حتريلن بعد ده ههههه ...
أبوي قال ليهو البيت بكم ....
صدام قال ليهو ما حتصدق يا أبوي بيت رخيص جداً تتخيل ب ..... بس أبوي طبعاً ما صدق معقول بيت بالفخامة دي يكون بالمبلغ البسيط ده بس قال ليهو طوالي دايرنوا وبدون كلام أسي نمشي نتم الإجرات ونرحل فيهو بكرة بالكتير .. بعد خلصوا فطورهم طلعوا مشوا... ونحن الفرح ما سايعنا
فضلنا منتظرين أبوي يقول لينا إشترينا البيت بفارغ الصبر وبعد ساعة أمي جاها إتصال من أبوي وقال ليها خلاث إشترينا البيت وطوالي أمي جات كلمتنا طبعاً طرنا من الفرح وأبوي قال ليها جهزوا حالكم لأنو هنرحل اليوم أمي قالت ليهو اليوم ليه ونحن لسة ما تمينا باقي الشهر معقول تخلي ليهو باقي الشهر ده كدة. أبوي قال ليها يا مرة إستهدي بالله ما مشكلة كلها مليون يعني ما فرغت أبوي طبعاً يدو رخية القرش ما بفرغ معاهو قدر يهديها وجات تنق قالت لينا غايتو أبوكم ده مبذر بذار قامن معاي نلم لأنو راحلين اليوم
قمنا بسرعة البرق لمينا باقي حاجاتنا وإنتظرنا صدام لمن جاء وجاب معاهو عربية ركبنا ورفعنا حاجاتنا وبقينا طالعين والإبتسامة للضرس 😀
وصلنا وطبعاً منظر العمارة بهررررررنا واااااااااااااو😱😻 والله عمارة سمحة سماح ما كنت متخيلة بالمنظر ده صدام وأمي وسبأ نزلوا ودخلوا وأنا فضلت مخلوعة ومبهورة بمنظر العمارة الخلابة دي بعد شوية أحس بيد قرصتني في كتفي أتلفت أشوف ليك سبأ قالت لي يا بت ماليك سرحتي في غنم إبليس ولا شنو أرح ندخل عشان تشوفي منظر البيت من جوه ياااااخ رهيييييييييب دخلت طبعاً جري وبقيت أقول واو واو واو واو ده بيت ولا قصر مع إنو ما كان مفروش بس خيااااااالي 😍
أبوي قال لأمي أرح نمشي نجيب العفش قلت ليهو عفش من وين يا أبوي صدام نطا قال لي هيكون من ووين يعني أكيد من السوق قلت لي أبوي أنا ماشة معاك عشان أنا ذوقي حلو وهأختار ليكم أحلي عفش من قالوا لي خلاث أول واحدة مرقت 😂
وسبأ فضلت مع صدام يلموا باقي الكرور الكان في العمارة شكلوا كان ساكنين فيها ناس بس ما طولوا فيها لأنو كانت نضيفة ..
مشينا القمة بعد سألنا منها لأنو بتذكر جارتنا عندها أختها ساكنة في الخرطوم وسمعتها قالت أختها أشترت عفش من القمة وكان في منتهي الشياكة المهم أول ما دخلنا عيني تقع علي دولاب مغوص من تحت ومصمم بطريقة عبقرية طوالي قلت لي أبوي نشيل ده أبوي وافق وفات سأل من سعره وإشتره وتاني أمي شافة واحد عجبها قالت عايزة أبوي دفع حقة وكمان السراير خشب والروسية شكل قلب كبير حلوات حلا مبالغة لكن المهم إشترينا كل العفش ما خلينا حاجة حتي الشاشة LSD إشتريناه وحملنا العفش في الدفار ونحن جينا بعربية أمجاد طبعاً بعد أمي إشترت حاجات المطبخ كمان غايتو خمينا السوق كلوو وجينا 🤣
وجو معانا كم نفر عشان ينزلوا معانا العفش أنا من نزلت من العربية جريت الغرفة حقتنا جو نفرين شايلين الدولاب المغوص من تحت قلت ليهم تعالوا تعالوا ده جيبو هنا دخلوا لينا طوالي بعد ساعتين كان البيت مكتمل وأخيراً خلصنا ونقدر نرتاح أنا من دربي دخلت الحمام أخدت شاور وجيت رقدت في غرفتي ونمت ما قمت إلا علي صوت أمي بتقول لي نوم المغرب ما كويس قومي قمت وأنا بدعك في جفوني لسة نعسانة ياخ بس أسوي شنو مدام أمي جات وصحتني تاني مافي لي طريقة نوم المهم قمت مشيت غسلت وشي وجيت عايزة أقعد المغرب أذن مشيت صليت وجيت قعدت
أمي حضرت الغداء وقالت لينا يلا تعالوا مشينا إتغدينا وقعدنا نتونس أنا جاني فضول أمشي أتفحص البيت كلو لأني ما شفت فيهو غير حاجة بسيطة لبست لي توب وطلعت بره العمارة عاينت هنا وهنا قلت غريبة ليه الحي ما فيهو جيران غير عمارتنا بس وكم بيت من بعيد كدة أعاين كدة أشوف جنينة صغيرة خلف العمارة مشيت دخلت فيها وكانت جميلة شديد لقيت أختي سبأ قاعدة قلت ليها ي بت إنتي جيتي هنا متين أنا مش خليتك جوه أسي 😳... ما ردت علي طوالي مشت بس الشئ الحيرني إنو ما عندها ضل لمن مشت يعني ما شفت ضلها قلت إحتمال عشان الواطة بقت تمغرب أقنعت حالي كدة قعدت شوية ومشيت دخلت لقيت ناس أبوي بشاهدوا في فلم أحمد حلمي مطب صناعي قعدت أشاهد معاهم بعد شوية أشوف ليك سبأ جاية وشايلة صينية كيك قلت ليها متين جيتي لمن عملتي كيك 😳 قالت لي أجي من وين يعني ما فاهمة قلت ليها إنتي مش قبل شوية كنتي معاي في الجنينة أو الحديقة بره ...قالت لي لالا أنا نهائي ما طلعت
أنا فضلت عاملة كدة 😨😨