جوابي دا الأخير
جوابي دا الأخير ليكي
يامعاليكي ،،
ياست الحسن
ياسبب الحزن والعلة '
ياشجرة حسبتها ضلة وطلعت نار ؛
مساء الخير علي الأزهار علي خدودك ''
مبنجرحش ، ومبنسمحش .. حد يقول كلام عنك.
لذلك ثم أما بعد ،
أنا الطفل اللي كان في عنيكي متشعبط ؛ يشوفك روحه تتلغبط
وقلبه من الحرام يضعف ويستعبط '
كإنك زار وأنا الدرويش
كإنك غار وأنا الحرافيش
كإنك كنتي قرش حشيش ،،،، دخل رئتيني وملأني.
كإنك دار وأنا اللي ماليش سوي الدار اللي لماني '
بغض الجرح مين خان مين
ومين قصر مع التاني .
وغض الطرف عن إسمك وطعم خروجه ف لساني ؛
أنا مليت من القصة ،
ومن لعبة خلاص لسه.
لقيتك غيمة في حياتي 'حسبتك مطرة قمت جريت.
وفجاة لقيت مفيش غير ليل
سحابة ضلمة كنتي إنتي.
أشوفك ،، ف الوجع بنتي ،
و أحسك أرضي وسفينتي ، وشمس بتملي ليلي شروق.
مفيش كام يوم ؛ لقيتني بفوق.
وأشوف الأتي للفعلي .
لقيتك أرض ،، متضمش سوي المطاريد.
وأنا عيل بيفتح إيد
يشوف خطك علي كفه.
عنيا عيال '' إذا بصيتي ،، يتدفوا.
حسبتك أم بتدور رحا الأحضان علي عيالها -
لقيتك ماسكة كاتم صوت ؛
رصاصك فات وجع جواي ،
وهو يا حلوة يعني الموت ،
بيفرق شكله كان إزاي.
وهو الجرح ، للستات ومش لينا.
مافي رجالة بتعيط
في رجالة بتفكر في عز الليل في ناس باعه
في راجل إذا فات ف المحيط وجعه لا بيساعه
وفي بكره بيتشخبط ، وفي عنواين بتتلخبط
وفي أطفال ميتولدوش في مستقبل مجاش قدام
وفي زفة مبتقومشي
في فرحة مبتدومشي
وفي نغزة فصميم الروح ،
مادام ف القصة في دابح ' أكيد ف القصة في مدبوح.
ولو كان القتيل راجل
ف دمه بيبقي مش بالسهل
خسرتي معاه وجود الأهل
خسرتي الحضن واللمة
خسرتي الضهر والضمة
وبكره هتندمي لما
تحسي البرد من دونه
ياريتك شوفتي ف عيونه حنان الأب ؛
أنا الشخص اللي كله عيوب
لكن مليان حاجات تتحب.
عملت حاجات ،
عملت حاجات لأول مرة ، بعملها
وكملت اُغنيات بيكي لأول أكملها
أشمك ريحة وأنا ماشي واَقول ماشي
وآكلم ربنا عنك ، وجع و غروب ،
عكستي المشهد المكتوب
مكنش الفيلم دي نهايته
كدا الكاتب ؛ لعب في النص
وفي لزق ف حياتي وقص
وفي تركيب لناس تانية
في مشهد خارجي مش محطوط .
أنا و إنتي ؛ مطرة بتغسل الشارع من الأحزان
حضنتيني زمان ومكان
وقولتيلي ، مفيش غيرك .
نزلت ف لحظة علي ركبي وأنا في إيديا كام وردة
ضحكتيلي
وطبطبطيلي علي خدي ،
كإنك كُنتي بتعدي علي قلبي بروح حافية '
مسكت الدمعة من عيني
بالعافية .
وضميتك ف عز البرد
لقيتني الفيلم بالكامل ، مفيش ولا لقطة ماسك ورد .
طلع في حاجات بتتصور ؛ وتتقصص من المونتاج
وأول ما المطر لمسك
لقيتك دوبتي ف المكياج ،
عروسة حلاوة
أو صورة
ملامح ڤاظة مكسورة
ف آخر جزء ف الذكري :
خسارة تكملي بكره .
يانور ساطع بيعمي العين مبينورش
أنا هفضل كده عيل ومبيكبرش
وبكره ؛ يجوز تقابليني ، في أي مكان
هشوفك وقتها دخان
بقوة ست هعشقا في زمان تاني
ولمسة طفل يشبهني ميشبهكيش
أنا جوايا كام ميت ،، وحابب أعيش .
لا هأتحول ولا هأرجع من الأول
ولا هأكتب عشانك شعر ؛
هبيعك دون نظر للسعر .
مكانك وردة مَسقِتهاش
ف دبلت من خريف موجوع .
دموعي رصيد بحوش فيه " لناس مستاهلة مني دموع .
وحلمي معاكي م الأول
خطيئة لأبد أكفرلها .
رميتك طفل ببرآته
وندم علي حاجة وكسرها .
يا أوحش حلو كان فيا
يا أطيب شر ف النية .
كسبت حاجات تسئ ليا
وجه الوقت اللي أنا أخسرها .
