#رغبات_لاأكثر 2
كرم : خير سامر شكو رجعتني من وكت صاير شي
سامر : كرم اني مااكدر اسافر على تركيا أميرة وضعها موزين انت لازم تروح وتوقع على العقود سالفة اسبوع عشرة ايام ترجع هم تريح الوالد لان شايل منك اهواية وهم راح تتونس .
كرم : خرب بحظي هسة وكت سفر والله اذا ورطتني بالشغل اهناك ارجع واعوف كلشي بس اذا بيها ونسة عادي نتحمل أروح .
حنين : داومت كالعادة اسمع الحجي والسوالف من البنات اشوف المجلات بيدهم مرات أستلفها منهم أجيبه ويايه للبيت طول اليوم ابقى اباوع واتامل الفساتين والتسريحات والمكياج اقرا الماركات صرت أعرف رموزها يوم اللي اجيب ويايه مجلة أخلص واجباتي بسرعة حتى اقرا واتامل براحتي .
أديبة: كومي يابنت الاميرة سويلنا عشه انتي وامج مابيه حيل وامي عازمة بيت اختها واذا بيضتي وجهي كدامهم راح أشتريلج مجلة من اللي بيدج
حنين : بعيني هسة والله راح ياكلون صوابعهم وراها بس صدك راح تشتريلي هاي كلش غالية الله عليج
أديبة: باجر راح أخذج ويايه للسوك واشتريلج كومي فزي
أميرة: سامر بعدك زعلان مني لان صيحت عليك والله اسفة تعرف من حبي الك صارلك اسبوع تنام يم نونه وعايفني
سامر : اميرة الف مرة كتلج صوتج لايعلى عليه تعرفين ماحب الصياح والمشاكل اني مو عصبي واذا عصبت تعرفيني احرك الاخضر واليابس عفتج حتى تحسين بغلطتج ويايه لاتستغلين معزتي الج
اميرة : شلون كدرت تنام من دوني أشكد قاسي لاتسوي بيه هيجي هالاسبوع مرت عليه بسنة كل ليلة جنت منتظرة تجي تصالحني ولا تجي .
روز: رجعت من المدرسة شفت سيارة عمي يمنه دخلت أخذت الخدامه مني الجنطة عرفت منها بيت عمي موجودين بيتنا ياحبي لك قاسم اشكد مشتاقتلك اتذكرت ديانا المكروهه صار مدة منحجي ويا بعض كلش متكبرة وشايفة روحها مببقية شاب بالكلية مجايبة راسه ومنتظرة كرم يتزوجها بأحلامها سلمت عليهم وعليها من ورا خشمي حتى لايحسون علينا.
ابو قاسم : أخويه شفت الاجانب شلون بالشغل والله كرم صاير مثل الساعة هلأسبوع مطلعين عينه مينطونه مجال يرتاح
أبو سامر : والله بردو كلبي منه عباله كلشي مثلنا ياخذ راحته يوم يجي عشرة ماكو وعايف مكتبه لو كاعد يمك لو يم سامر وقاسم لا بارحة خابروني احتمال يبقى شهر لان صار تعديلات على العقود شوية ويبجي
ام سامر : أشبيكم على ابني مااسمحلكم نازلين عليه كلكم تنتقمون منه خلو براحته بعده شاب بعدين هو راح يحس بالمسؤولية ويبدي يصير مثلكم
ام قاسم : والله كرم وردة مال الله دايما يفرحنا بكعداتنا مكانه خالي معزته من معزة قاسم بس ياريت لو يسمعون كلامنا ونزوجهم ونخلص الدنيا مو أمان .
