التوأم بالليل بتقلبو كدايس؟ لو عاينت في المراية اكتر من 5 دقايق بتشوف قرينك! في قبيلة بعد المغرب بتحولو من بني ادم لي وحوش! لو حسيت بي حركه غريبة وانت كنت في الغرفه براك معناتا ده قرينك قاعد معاك وبراقب فيك؟! صحي الكدايس السود شياطين؟!!..
احمد احمد..انا بتكلم معاك..تعتقد التخاريف البتكلمو بيها الناس دي تطلع حقيقه؟
احمد:ههههه يوسف انت بي خشمك قلت تخاريف يعني اكيد ماصاح وبعدين ده شنو الكلام المسكت فيهو ده شايفك ليك كم يوم بتتكلم فيهو انت يازول جنيت ولا شنو؟
يوسف: والله يا احمد انا الحاجات الغريبة دي سامع بيها من وانا صغير نفسي اعرف حقايق عن العالم الغريب ده..نفسي اشوف حاجه ماطبيعية مع انو خوفي اكبر من كده بس ماعارفه الرغبه دي من شنو؟ وعندي كم أسئلة في راسي يا احمد وعايزة اجوبة!!
احمد: والله يا يوسف انت جنيت خلاص ده شنو ياخ مالك ومال الحاجات دي خليك في قرايتك ياخ اسي نحنا امتحاناتنا فاضل ليها شهر شكلك عايز تعمل فيها مجنون عشان تتهرب من القراية يامان فاهمك انا ..بعدين شنو الاسئلة العايز ليها اجوبة دي؟ وليه تسئلني انا شايفني شيطان قدامك؟
يوسف: والله انت اكبر شيطان..تعال نسئلك سؤال اسي انت يوم حصة القران لمن كان استاذ مدثر بقرا لينا في سورة الانفال انا لاحظت لي رجلك اليمين دي بقت تهتز كده وتتحرك حركه ماطبيعيه ..مالك حسيت بيك زي المتضايق كده من قراية القران؟
احمد: اها يايوسف انت عايز تصل لي شنو يعني؟ انا كنت بهز رجلي ساي وحاسي بي روحي ياشيخ انت..قالو الزول لو راكبو جن واستحضر مابحس بي حاجه وبعدين انا زاتي مابصدق الكلامات دي فعشان كده عليك الله تاني ماتفتح لي المواضيع الغريبة دي ..اسي ده موضوع لينا نتكلم فيهو عليك الله ..ياخ انت زاتو زول ماعندك موضوع..انا حادخل الواتس واتكلم مع زولتي مشتاق ليها عدييل ياخ.
يوسف: اهاا..منو دي؟ بس ماتقول لي دي ام جلحات ديك؟
احمد: هههه اي بس يااهاا زاتا..وانت مالك ومال جلحاتا عاجبني ههه
يوسف: يازول انا جبتك الليله تبيت معاي عشان تتونس معاي مش عشان توتسب لي مع ام جلحات
احمد: ياخ والله يايوسف ام جلحات دي ونستها احلا منك ياح انت ونستك الايامات دي بقت كلها شياطين وكدايس
يوسف: ههه خلاص ياخواف تاني مابفتح ليك موضوع بالشكل ده عليك الله اقفل التلفون ده واتونس معاي....
دي كانت البدايه ياجماعه ..بداية الكابوس الاسود..انا اخوكم في الله يوسف قمر الدين..حاليا عمري 20 سنه..انا داير احكي ليكم قصه..يمكن قصه مابتختلف كتير عن اخواتا..قصه واقع مرير..القصه دي حصلت لي صحبي احمد رحمه الله عليه..اي مات ماتستغربو!!!...اساسا الحوار الكان بيني وبينو القريتوهو قبل دقايق ده كان حاصل قبل خمسه سنوات..احمد مات..او بالاحرى قتلوهو!!
