Unspoken Words

Papel at Panulat

Saksi ang papel at panulat
Sa lahat ng luha at pangarap
Naging sandalan sa gitna ng kawalan
Naging kausap sa gitna ng katahimikan

Doon sa lugar na walang makakasaksi
Pagpatak ng luha'y pilit ikinukubli
Bawat hikbi'y itinatagong mabuti
At sama ng loob pilit iwinawaksi

Doon sa gitna ng walang hanggang kadiliman
Labis na hinagpis pigil na pinapakawalan
Napakaraming tanong na wala namang kasagutan
Napakaraming sana na hanggang doon na lang

Sa mundong walang nakakaunawa
At puro kamalian ang nakikita
Walang puwang ang salitang 'tama'
Katiting na pag-asa unti-unting kinukuha

Sa mundong dapat nagmamahalan
Kinang ng pag-ibig, balewala na lang
Mga pangakong sinabi at binitawan
Hangin lang pala ang naging talaan

Sa bawat ngiti'y luha ang itinatago
Masayang makikita ngunit nagdurugo
Takot sumugal dahil takot mabigo
Sapagkat sa sakit, puso'y bilanggo

Sakit na ipinunla ng nakaraan
Tumutubo at yumayabong na sa kasalukuyan
Huwag na sanang muling madiligan
Upang 'di na anihin sa kinabukasan

Tulong! Tulong ang kailangan
Kunin sa kawalan at dalhin sa kalawakan
Bigyan ng musika sa gitna ng katahimikan
Lagyan ng ilaw ang madilim na kaisipan

Ang papel na naging saksi ng lahat
Muling makakadama ng bagong pangarap
'Di na mababasa ng luhang pumapatak
'Di na makikinig sa hikbi at iyak

Muling magagamit ang tinta ng panulat
Upang itala ang bagong pamagat
Bagong kabanata, ngayo'y isusulat
Salamat sa papel at panulat.