قراءة في عقيدة الصدمة..صعود رأسمالية الكوارث الجزء الأول

الجزء الأول

كتاب عقيدة الصدمة بيعتبر الشباك اللي هتشوف منه السياسة والاقتصاد والعلم ازاي بيخدموا بعض عشان يضمنوا استمرارية الفوضي البشرية اللي بنعاني منها وهتقضي علينا

فعشان اهميته الجبارة دي هحاول اعمل ملخص بسيط لكل فصل اقراه.البداية في توضيح اكبر مثال لتطويع وشراء العلم في خدمة الحروب

الحكاية بدأت مع جنود امريكين، السوفييت اسروهم وبعديها بشوية طلعوهم قدام الكاميرات عشان يعلنوا رفصهم الرأسمالية والامبريالية وامريكا وحشة.

فطلع دونالد هب عالم امريكي كان مدير قسم علم النفس في جامعة امريكية قالك ان الجنود دول اتعرضوا لعملية "مسح دماغي" و"حرمان حسي".

فصدقوا بتوع وزارة الدفاع الامريكية- ماهو وقت الحرب اي حاجة بتتقال ممكن تتصدق عادي- المهم ادوله المنحة التمام اللي تخليه يعمل تجاربه.

فراح جاب 63 طالب ادي لكل واحد عشرين دولار في اليوم 😂😂 هيعمل ايه بقا فيهم:

عزلهم وحرمان حواسهم سواء بالنظارات او تغطية اذرعتهم وارجلهم وكمان الطلبة دي تم اختيارهم علي اساس موقفهم الواحد من قضية معينة وطول فترة العزل كان بيتم تلقينهم افكار ضد مواقفهم دي. وبعد وقت معين من التجربة اكتشفوا ان الطلبة مواقفهم اتغيرت وقدرتهم علي التفكير بقت اضعف. فالدكتور دونالد قالك ان ده اشبه بعملية مسح اذهان الطلبة. بس دكتور دونالد كان الي حد ما همه علمي فقط فاما الطلبة اعترضوا علي ظروف التجربة الصعبة قام موقف الاستمرار في نظريته.

بس ياريت الموضوع وقف هنا كان في زميل لدكتور دونالد هيب كان بيقول عليه "غبي حتي الاجرام" وده لان همه مكنش علمي اد ما كان ايدولوجي. الغبي ده كان اسمه ايوين كاميرون

كاميرون اخد النتائج اللي وصلها دونالد هب وكمل عليها بتجارب قاسية بغباء.

بس زي ما اتفقنا ان عقيدة صدمة بيتكلم عن خدمة العلم للحكومات والحروب. فوكالة الاستخبارات الامريكية من خلال منحة 25 مليون دولار سنة 1957 لايوين كاميرون عشان ينفذ مشروع *أم كيه آلترا* واشترك في المشروع حوالي 44جامعة و12 مستشفي. المشروع عبارو عن تكملة لتجارب هب بس بظروف وصلت لحد انها استخدمت للتعذيب في المعتقلات والسجون.

الزيادات او تاتش ايوين كاميرون كانت ان التجربة الاساسية كان فيها استخدام الصدمات الكهربائية عن طريق جهاز *بايج_ راسل* الجهاز ده كان مصمم ان الشخص الواقع تحت التجربة يتعرض ل24 صدمة فردية طول فترة العلاج كاميرون بقا خلاها 360 صدمة. علاج ايه ماهو كاميرون كان بيدي انطباع ان بيعالج المرضي بتوعه بالصدمات الكهربائية وكانت فكرته انه يخلق ذهن خالي تماما يدمر الانسان تدمير تاااام ويجعل ذهنه وذاكراته وسلوكه صفحة بيضة يملاها باللي يشوفه.

هو ده المشروع تدمير تام لخلق جديد مرضي عنه ومسيطر عليه.

وعملية التدمير او المشروع او نظرية كاميرون كانت قايمة علي 3 اسلحة

الاول اتكلمنا عنه الصدمات الكهربائية بس بالمعدل الخرافي 360 صدمة.

السلاح التاني كان الحرمان الحسي وده استحدمه بردوا دونالد هب بس تاتش كاميرون ان العزلة التامة وصلت لمدة 30 يوم وكان المعدل عند دونالد هب 5 ايام واوقف التجربة لظروفها الغير انسانية.

السلاح التالت المنومات اللي خلت بعض المرضي يواصلوا نوم بشكل متواصل لمدة 65 يوم.

طب هل التجربة والمشروع نجحوا بعد كل ده؟؟

للاسف هضطر اتكلم عن التجربة كتجربة علمية والمشروع كمشروع لوكالة الاستخبارات الامريكية بمعني ان الاتنين انكتب ليهم مستقبل مختلف.

التجربة العلمية فشلت بشدة انها تبني الشخصية الجديدة بعد التهديم التام.

المشروع نجح ونجح جدا والدليل ان كل وسائل التعذيب الحديثة في المعتقلات والسجون زي غوانتانامو.ووكالة الاستخبارات بعد الضغط المتواصل عليه بعد سنين طويلة من الاجرام ده طلعت كتيب عن وسائل الاستجواب *الكوبارك* اللي هي وسائل التعذيب يعني والكتيب تم ذكر فيه انه قام علي استنتاجات مشروع ايوين كاميرون. اخر حاجة وهي بعض وسائل التعذيب زي ما تمت في التجارب وبتتم حاليا وهتبقا علي شكل نص من الكتاب ص71

""فبعد اعتقال السجناء مباشرة كان يعمد الي عزل حواسهم بشكل كبير، بواسطة الاغمية والنظارات الواقية، وسطامات الاذن التي تصد جميع الاصوات الممكنة. وكانوا يضعون في زنزانة عازلة لعدة شهور، ولا يتم اخراجهم منها سوي لقصف حواسهم بنباح الكلاب والاضواء المبهرة....التعليق بلوح حديدي والصعق بمسدسات صاعقة... الصدم بجهاز كهربي في الوجه والظهر والراس والاطراف والاعضاء التناسلية""

البوست الجاي هيكون عن الفصل التاني وهيبقا عن ميلتون فريدمان وتجربة نظرية الصدمة والسوق الحر في السياسة والاقتصاد..