قصه جديده بعنوان :
#كبريائي_عقابك
للكاتبه
#هدى_ابراهيم_الزبيدي
في اول كتاباتي ..
امنياتي بمتابعه ممتعه الكم اعزائي القراء .......
#بارت_1_
:؛:؛:؛:؛:؛:؛:؛:؛:؛:؛:؛؛:؛:؛:؛:؛:؛::؛:؛:؛:؛:؛:؛:؛؛:؛:؛:
هلو اني جنات
جميله من جميلات بغداد
بقوام رشيق
وبشره بيضاء
وشعر بني لاسفل الظهر
بالنسبه للشكل
اما الشخصيه القويه والثقه العاليه بالنفس
فهذه صفات زرعها باباتي
بكل فرد من افراد عائلتنا الجميله
طموحي بالحياه ادخل كليه الهندسه
الي اعشقها من صغري
واكون مهندسه مدنيه ❤️
بيوم من ايام امتحانات البكالوريا
رجع بابا من شغله يحمل هموم الدنيا كلها
ع اكتافه
هموم خلته لاول مره بحياته يدخل علينا
بدون ابتسامه وكلمه حلوه
دخل مدنك تجاوز لمتنا ع ميز الطعام
واحنا ننتظر جيته حتى ناكل سوى مثل كل يوم
وصاح ع ماما .. امينه تعاي ..!!
دخلو للغرفه
واحنا واحد يباوع بوجه الثاني
والافكار السلبيه والقلق والخوف واضح ع كل ملامحنا
بابا عنده شي لازم يكوله لماما ..
شي مهم ..
بس ابدا ماممكن يكون شي حلو .. !!
يادوب كدرت انطق بشفايف ترجف ووجه ملئ بعلامات الاستفهام
همام شنو الموضوع ..
شتتوقع .. شصاير ..!!
اخويه همام حاله مو افضل من حالي وحال مهند وريا ..!!
جاوبني ماادري : الله يستر ..
بابا بحكم عمله كتاجر بالشورجه دائما يردد كلمه : التجاره ربح وخساره ..!!
معقوله يكون بابا خسران بشغله ..!
مطلوب .. عليه ديون
كل الافكار السلبيه بدت تهاجمني مره وحده
والوقت بدء يلعب ويانه لعبه حقيره
الساعه وكفت .. ماتتحرك
والميل صفن ويه صفناتنا ..
ياربي شكاعد يصير عاطت ريا ..!!
فز مهند من مكانه يروح لباب المطبخ ويرجع للميز .. وعلى هلمنوال ..!!
دكيت الباب بأيد ترجف ..
دكيتها اكثر .. واقوى
فتحتلي ماما الباب
بعدني اتذكر وجهها الاصفر ونظراتها الحزينه المكسوره ..!!
ماما شكاعد يصير بابا شبيه ؟؟
احچولنا الموضوع ..!!
كل واحد من اخواني يسأل .. ويستفهم بطريقته ..!!
بعد كل الحاحاتنا واسئلتنا هذه
جاوبتنا ماما : بابا عنده مشاكل بالشغل
تركوه يرتاح شويه ..!!
دخلنا كلنا لغرفتهم
جنا مثل الحمامات داير مدايره
كل واحد منا يكول كلمه
يمكن شويه نخفف عنه ..!!
بس بابا كأنو مجان يسمعنا ..
كأنو بابا بعالم ثاني ..!!
صارت الدنيا ليل
واحنا صافنين
كل واحد بينا صافن بركن
جان اصعب يوم بحياتنا
دخل كل واحد بينا غرفته
وبدينا صراع جديد مع النوم
ليلتها كل افراد عائلتنا ماضاكو النوم ..!
ومن ال 6 الصبح
اصوات ابواب غرفنا كلها انفتحت
لكينا بابا وماما كاعدين بالهول
والظاهر الكعده كعده من الليل
سألت ماما شنو فرق هالخساره عن باقي باقي الخسارات
واني بيني وبين نفسي اتمنى اسمع شي يغيرلي افكاري التشاؤميه ..!!
جاوبتني ماما
يمكن نضطر نبيع بيتنا ..!!
هنا اعتقد كدرت استوعب حجم الكارثه الي تنتظر عائلتنا كلها ..!!
بارت ( 1 )
منو يكدر يتخيل شنو يعني امتحانات بكالوريا + مصيبه عائليه راح تغير كل حياتنا ..!!
شلون راح ادرس .. شلون اركز ..
شلون راح اكدر اطلع معدل واحقق طموحي اذا جان يحقلي بهذه الظروف افكر بطموحي ..!!
هنا اجى الرد القوى من اولياء الامور :
ماعندج شي تسويه بحياتج غير الدراسه ..
والمعدل العالي ..!!
عشت صراعات .. مع نفسي .. مع دراستي .. ومع عائلتي الي بدت تنهار كدام عيوني ..
بيت الطفوله معروض للبيع ..
لازم نبيعه وننتقل لمنطقه ثانيه ..
وبيوم استلام النتائج تحديدآ
وفرحتي المتواضعه بمعدلي الكبير
بهذا اليوم تحديدآ
وصل المشتري واتفقو عالبيعه
واجى اليوم المشؤم
وانتقلنا لمنطقه ثانيه
ماعرفها ولاعندي بيها ذكريات
ماحبيتها
مو لان مستواها اقل من منطقتنا القديمه
بس عندي حنين لمنطقتي يخليني اكره ارتبط واعيش بأي مكان ثاني ..
منطقتي الي عاشت بيها ماما كل شبابها .. تزوجت .. خلفت .. كبرت بيها
ماحسيت نفسي بيوم انتمي لهذا المكان ..!!
چان عزائنا الوحيد دائما انو بابا تستعدل اموره من جديد
ونرجع نشتري بيت بمنطقتنا القديمه الحلوه ..!!
الشي الي مدافهمه والي فعلا محيرني
ليش بابا ماطلب مساعده من اعمامي او اخوالي ..!!
كلهم تجار ولد كار واحد
المفروض الي يوكع بيهم يشيلوه .. ويسندوه
مو يتخلون عنه ويتركوه لمحنته وحده ..!!
وخلصت العطله
وچانت اتعس عطله بحياتي
رغم انو كدرت احقق طموحي واوصل للمعدل والكليه الي اتمناهم ..!!
بقت امور بابا مامستقره
يوم فوك عشره تحت ..!!
الدنيا عاكسه وياه
وهو يلاويها بكل صلابه
وبيوم زارونا بيت عمي الكبير وعائلته
بعد لوم كبير لبابا طول الفتره ع بيعته للبيت وانتقالنا منه
باركولي دخولي كليه الهندسه
اما رواد الابن الكبير لعمي
باركلي ع طريقته الخاصه المزعجه
وكالي: اي شي تحتاجيه تسأليني اني
حتى الملزمات راح تستغنين عنها ...!!
مايبطل غرور هذا الكائن ..
عنجد مايتعب ..!!!!
يتبع .........
