تعب الروح

تعب الروح ١٢

#تعب_الروح١٢
#زينب_الموسوي
بعد طلاگي من حمزه اسودت الدنيا بعيني واصعب ماكان هو يوم زواجه ابوه كان انسان حاقد اتصل بيه من رقم غريب وسمعني صوت الهلاهل والموسيقى وگلي گلت الحمزه اعزمها على العرس ماقبل يله سدي التلفون وروحي ابچي اني طول عمري قويه وشايله حمل جبال وساكته بس حمل ذاك اليوم ماتحملته بچيت لحد ماحسيت بنفسي عيوني جفت بعد مابيها دموع خابرت فاطمه حچيتلها گالت راح اجيچ بدت تواسيني وتگلي نذل وميسوا بعد الساعه ١٢بالليل اتصل حمزه انطيت الفاطمه التلفون وفتحت سبيكر حتى اسمع
ها يالعريس خلصت الحفله واتذكرت زينب شرايد بعد منها مو كافي ابوك فاتح تلفون ويسمعها عرسك انشالله عرس مصخم عليك وعليها ونسمع خبر فاتحة ابوك الكلب
ابوي متصل بزينب شوكت
لك انت الظاهر سطل طرن كلشي متدري عمي صدوگ اختي محظوظه ومااخذتك شرايد لك بهالليل
بس خلي تصدگني عمري ماحبيت غيرها وماكان قصدي اجرحها بس خلي تسمعني لاخر مره
امشي لك زعطوط مخبل يحبها يمك ست نرجس وحبها على راحتك اختي اذا ماخليها تتزوج وتفوت زفتها گبال بيتك ودگ ورگص يم بابكم وخلي تفيدك فلوس نرجس وروح خلص حياتك وياها وانت تتصور نفسك وي زينب
كانت اخر مكالمه حضرنا الرقم وگعدنا نبچي اني وياها سديت باب گلبي وقررت اكمل دراسه ماجستير قللت ساعات عملي بالمدرسه لان كل شويه وحده جايبه الي عريس هو اني الي حبيته ماوفى وياي انوب واحد مااعرفه ولايعرفني
عدنان ماخلى وسيله يتقرب بيها مني وكنت اصده وابعده امه فاتحت امي بالزواج رسمي وعرفت هو مدرس بالجامعه ويدرس بالمعهد بيتهم مسدديه ملك  وبدت امي واخواتي شن حرب عليه الا اوافق امي گالت طاوعتچ مره انت طاوعيني. هالمره بقيت مصره على رائي اي ارتباط هسه ادخله معناه اريد املي فراغ حمزه واتزوج وخلص   زواجي لازم يكون بقناعتي بالشخص المقابل وعدنان كنت اشوفه مره بالاسبوع بالمعهد هو ينطي محاضره واني انطي محاضره مااعرفه فهمت امي انطيني وقت اعرفه واجربه لا يطلع مثل حمزه حچي وقبض ماكو