#القفص
#ح_١
#روز_الفياض
.
.
.
كاعدين فوك السطح مبدلين ومنتظرين العروس.
شويه وصاحت علي خلود اختي جانت ماده راسها من الحايط تباوع للشارع جوه:
سميه سميه لحكي.
سميه :
شكو؟
خالده :
يمكن اجوا.
ماكمت مالي خلك ومااشتهي اشوف العروس صعبه وحده غريبه تدخل حياتنه وتاخذ مكان امنه الله يرحمها.
امي اتعاركت ويه ابوي وحركت نفسها بالحمام وماتت وخلت خواتي 3 براسي واخ واحد زغير طفل بعده اني الجبيره اكبر وحده بيهم وخالده ازغر مني وراها نهال وناديه واخوي الوحيد حسن.
ابوي جان موظف وامي ربة بيت ومن امهات قبل نادره وام بيت بس ابوي جان ميعجبه العجب شتسوي ينتقد.
بس اتوفت امي قرر ابوي يتزوج.
اني جنت بعدني طالبه بالسادس ادبي واتقدملي ابن عمتي وابوي وافق.
امي الله يرحمها مجانت تحب اهل ابوي لان اذوها هواي عماتي مبقن شي مسونه ويها .
المهم اليوم زواجه اصدقائه بالدوام شافوله مره مطلقه ميصير عدها اطفال ويكولون خوش مره واسمها نجيه.
سمعت صوت الهلاهل ...
معناها وصلت !!
الله يستر نهال وناديه ظلن يكمزن فرحانات بالعروس الجايه جهال ميفتهمن شي ..
اباوعلهن واكول بكلبي الله يستر كلها تكول مرة الابو كشره بس لاهاي تطلع هيج وتشلع كلبنه وتأذينه وتأذي اخواني.
شويه وصعدوها للسطح لان قبل الاعراس لو يصعدون العروس بالسطح لو بالحوش ماكو قاعات وهالسوالف ..
صعدوها وكعدوها ونهال وناديه فرحانات ويركصن ويكمزن على صوت الهلاهل والهوسات الي سونها عماتي الحنونات واهل العروس.
اجت خالده كعدت يمي كالت:
شرايج بيها؟
سميه :
وين شفتها ؟
متشوفيهن شلون ملتمات عليها مثل الذبان.
خلود :
هههههه صدك مثل الذبان بس الذبان يلتم بس على الشي الحلو ..
بس اخاف تطلع صدك حلوه وتلحس عقل ابوج وتخبله علينه خاف هو ناقص؟
سميه :
اصبري هسه يوخرن ونشوفها.
ولو يكولون الحلوه ماعدها حظ ..
خالده :
زين خل نكوم نسلم عليها ونباركلها غير مرت ابونه ؟
سميه :
خالده لو تسكتين وتصبرين لو كومي منا لتدوخيني شكد لحوحه وماعندج صبر لخاطر الله.
خالده :
شصبر ؟
شنتظر؟
ميكعدن ولايوخرن هيج وانت كاعده وصافنه.
سميه :
لعد شسوي ؟
خالده :
اهاا اني هسه اراويج.
كامت خالده راحت باتجاه العروس وصاحت :
صدك جذب كعدن عيني، كعدن حبايب ..
هم احنه نريد نشوف العروس نريد نسلم عليها نريد نباركلها خوما بس انتن ..
