طلعت سفرة علي وجان لازم اروح وياه مفكرت غير بس بدراستي رحت ال علي وكتلة شنو وضع دراستي انت كتلي تكملين وماعندك اعتراض منين طلعت هاي السفرة كال
علي: نبراس كل اللي دا اسوي ضمان المستقبلج دراستج راح تكمليها ي المانيا وتاخذين شهادة الهندسة مناك وحتى هم نخلص من سوالف زوجة عمج ونك امي ...
شفت حجي علي معقول ووافقت وكمنا نحضر للسفر لأن بعد شهر سفرتنا سوالي جواز وام علي اكلت كلبي تكولي همي نفسج اريد حفيد مجنت اجاوبها بس رونق جانت توكف دائما وياي لأن تعرف بعلاقة اخوها بية وتعرف بالاتفاق بس المستغربة منة علي ليش يسوي هشي كولة آلية ومن دون ميجبرني ويأخذ حقة مني بس الحمدلله هذا التفكير ماكو عندة لأن صدوك هاي المرة اكتل نفسي كرهت كل شي يتعلق بالعلاقات والحب شكد بنات يسولفون بالحب وبعلاقاتهم اني احس نفسي تكوم تلعب واهز ايدي وابتعد عنهم مااحب اسمع كلامهم المهم عدة الشهر من دون أي أحداث غير انو احنا دا نحضر ورحت ودعت عمي لأن مااعرف راح اشوفهم مرة ثانية لو لا بس الشخص اللي مجنت اتمنى اشوفة هوة منير بس للاسف جان موجود وكلي عود عبالج من راح تسافرين راح تخلصين مني لا يحلوة محزرتي مااخذت كلامة جد كلت بعد وين يلكاني وطارت بينا الطيارة من مطار بغداد إلى مطار عمان وبعد مرور 12 ساعة من التعب والإرهاق طارت طيارتنا إلى المانيا جانت تختلف تماما عن بغداد بشوارعها بالبيوت بالناس وطريقة لبسهم طريقة كلامهم طريقة تصرفهم بطريقة العيشة كولشي يختلف المهم اجر شقة علي كانت عبارة عن غرفتين وصالة وصحيات ومطبخ صغير قدملي علي على الاعدادية وبدى يجيبلي كتب اتعلم لغة كال اتعلمي اللغة الانكليزية اسهل وافضل واللغة الشائعة وين متروحين بقى طول الفترة المابيها دوام اتعلم بس مو كولش وبدى الدوام وعانيت كولش هواية بسبب اللغة بس جان اكو عرب وكدرت اتغلب على فقرة اللغة جانوا يساعدوني بالعربي ويفهموني ومن جهة ارجع علي بالبيت يدرسني علي حسيتة تغير من ناحيتي ودا يجنب الكلام وياية ومن اكعد يمة يروح الغرفتة ومرات يبات برة البيت مرة من المرات كلت لازم أسئلة كتلة علي ليش متغير علية ليش ما تجنبني احنا مو اصدقاء وأخوة كال لا مو اخوة اني زوجج كتلة علي احنا بينا اتفاق وانت من البداية ازوجتني على مود تساعدني واني حاستك اخوية اتقرب لزم ايدي حيل عصرها كال كلمة اخوج لا اجيبيها على السانج لا تنسين اني زوجج واكدر كولشي اسوي اني ارعبت كمت ادفع بي بس هوة جان اقوى مني اتقرب علية وباسني بوسة قوية من شفتي اذكرت سواية منير كمت ابجي وادفع مثل الواحد جان نايم وفز من حلم وخر مني اني كعدت بالكاع ابجي واصيح كولكم نفس الشي ماكو واحد بيكم زين ويخاف الله كام يفرك براسة وظرب ايدة بالحايط وطلع ظرب الباب بقوة وطلع بقيت بمكاني ابجي وافكر كلت اليوم عدت بس ابوسة اخاف بعدها يجاوز أكثر ويسوي مثل سواية منير ياربي ساعدني اصيح بصوت عالي
عدت الايام واني كمت اجنب اتواجه ويا علي حاول شكد يحجي وياي بس كمت ماامن بي عدت الايام وخلصت هاي السنة ونجحت خامس عرفت من رونق بعد مااتصلت انو علي طالبهم يجون يمنا هية وامها لأن بعد وفاة والد علي منو الهم مكتلكم انو ابو علي توفة بس مكدرنا اروح للعراق ممنوع الا نحصل على الاقامة يوم من الايام كتلكم العطلة الصيفية كاعدتها بليل وجان اسمع صوت علي يتقيئ بصوت عال حسيتة روحة راح تطلع خفت علي مهمة يكون هوة ساعدني ووكف وياي وحاول هوايةيصالحني وكال والله مو بوعي جنت المهم ركضت ونصدمت من شفت علي يتقيئ دم كمت الطم وابجي ركضت غسلتلة اشرلي على علاج كبسول جبتة بسرعة انطيتة ووياه مي بعد ماهدء كتلة علي هاي شنو شدا ايصير وليش هيج وشنو هذا الدم ....
...............................نتعرف هسة على علي وشخصيتة هوة راح يحجيلكم كولشي إلى هذا الوقت
علي: اني علي اصير جيران نبراس واخو صديقتها مواصفاتي طولي وسط لون بشرتي حنطي لون عيوني عسلي جنت دائما اشوف نبراس صديقة اختي بنية حلوة وأخلاق بس حزينة ومهمومة سالت اختي كالت هاي نبراس يتيمة اهلها متوفين بحادث سير من جانت صغيرة واعتنة بيها عمها بس زوجة عمها مو زينة وياها ومتعبتها المهم البنية كولش استخطيتها وكلت اتقربلها وفعلا هذا الصار وبطلعان الروح صارت تثق بية وعرفت منها شلون معاملة زوجة عمها وابن عمها منير النذل والسواة بيها كمت انصحها واعلمها هواية امور مجاهلتها علمتها اليصير ومصير والحلال والحرام إلى أن بيوم انكطعت مدة اسبوعين ماكو هية وحتى من بدى الدوام سالت رونق وكالت مدا اداوم خليت رونق تروح البيت عمها وتعرف اخبارها عرفت انو منير راجع ودا يستفزها حتى تخضعلة اني فكرت بما انو ايامي معدودة لأن بية مرض مو زين وماذي رئاتي كلت خلي اسوي اجر وازوجها واخليها تصير قوية وتواجه الكل المهم اول مكلت الاهلي بالأول رفضوا على انو هية بعدهي صغيرة ومو مال زواج بس فهمتهم اني رايدها وحاليا تبقى بغرفة رونق إلى أن تكبر المهم اهلي معارضو لأن اني الوحيد ازوجتها وعادي حياتنا مشت وتخرجت من المتوسطة بس بنفس الوقت مرضي زاد جنت عايش على المسكنات كالوا سافر المانيا وهناك خوش أطباء بس اني مفكرت بنفسي لأن عرفت هذا المرض ماالة علاج فكرت اسافر واخذ رونق واخليها تبني مستقبلها خارج العراق وبنفس الوقت تخلص من استفزاز منير مبدئيا منير سكتة وبعدتة عنها بكم فلس المهم سافرنا وضبطت امورنا ودخلتها مدرسة واني راجعت أطباء بس مثل متوقعت حالتي ميئوس منها والمرض بمرحلتة الاخيرة انقهرت على امي واختي ونوب الزيد قهري والدي توفة رسلت على امي ورونق حتى يجون يعيشون هنا وكلت الوالدتي اصفي امورنا بالعراق وتبيع كولشي حتى هنا نشتري بيت وللعلم نبراس جنت احبها لأن بنية بريئة وربيتها على ايدي بس بسبب منير الكلب هية عدها رهبة من هاي العلاقة غلطت مرة بحالة من القهر والعصبية لأن راح انحرم منها وبستها وبقت تقريب السبع اشهر متحجي وياي إلى أن بيوم تخربطت وكمت اتقيئ دم جتي تركض وعرفت بمرضي.................
