-حب وانت فى ثانوي لانك مش هتحب وانت كبير.
-متتريقش على صاحبك اللى فى تجارة مهما كانت كليتك عشان لما تروح تشتري من المول بتاعه او السوبر ماركت الجامد فشخ يبقي يعمل معاك الواجب يادكتور يابو 285 جنيه فى الشهر.
-امك مش هيعجبها لبسك وابوك مهما كان البنطلون واسع بالنسبه ليه ضيق .. ومتحاولش تقنعه.
-نينتك مش هتديك اكتر من 10 جنيه عديه وممكن لو فقدت الذاكرة تديك 20.
-لو فاتح اللاب او الموبايل وبتعمل بحث علمي وابوك شافك فانت اكيد بتلعب عليه ولو امك فيبقي اكيد انت بتكلم البنت او زى ما عمتك بتقول "الموزة".
-الست اللى بتقول مش هنفرح بيكي بقي دي بتكون عايزة تعرف انتى اتخطبتي ولا لسه وبتقول كده عشان تجس نبضك بخبث عشان ترد على ام حنان جارتها على التليفون الارضي بعد العشا.
-مهما ذاكرت طول السنة لو مذاكرتش قبل الامتحان بساعتين فانت يعتبر معلمتش حاجة حتى لو تصحي تفتح الكتاب تقرأ الرقم البريدي بس يتفتح.
-بنات المنصورة احلى بنات فى الكوكب .
-من كام سنة اللاجئين الأفريقيين احتلوا الحي العاشر والتجمع الاول وماليزيا إحتلت الحي السابع والسادس بمدينة نصر.
-مهما تنصح طالب دفعتك الجديد مش هيشوفك غير فاشل وبتكسره .. فسيبه يلبس وبعدها إشمت فيه عشان هو يستاهل.
-مرسي مش راجع والسيسي مكمل ومفيش ثورة غير لولادنا وساعتها هنقولهم يابني اقعد مفيش حاجة هتتغير فهيشتمونا ويقولوا عواجيز وبتاع وبعدين هيعملوا اللى عملناه وهكذا وهكذا.
-مهما الزمالك كسب فالاهلى مش هيزعل عشان هو محوش كتير اووي .. ومهما الاهلي كسب مش بنفرح غير لما نكسب الزمالك عشان التحفيل واللذي منه.
-اخرج اول يوم العيد والله .. لان مصر كلها بتخرج تانى يوم عشان اول يوم بيكون زحمه.
-لو صليت الفجر مش هتصلي باقي الصلوات لانك بتصليه وانت سهران فبتنام وتصحي بعد العصر وبتتغدى المغرب وبتخرج العشا فيارب نسألك الهداية.
-الأجره فى القاهرة بتدفع مجرد ما بتبيض ع الكرسي .. صدقوني لو رحتوا الاقاليم السواق بيلمها وهو واقف ع الباب واحنا نازلين.
-امك وصاحبتها وعماتك وخلاتك هيفضلوا لحد ما يموتوا يتنافسوا فى طريقة عمل البيتزا والكيك .. وفى الاخر البيتزا بتبقي قرصه بطماطم .. والكيك بتفصل كيك مع اللبن وانت صغير والشاي وانت كبير.
-متدفعش فى البنطلون اكتر من 100 جنيه ولو خلاص يبقي 120 ده لمصلحتك.
-وفى النهاية احب اقولكوا "توفيق عكاشة مش أهبل احنا اللى هُبل"
