#قتلتها لاجل عينيه
قصة حقيقية
للكاتبة ريم صباح
البارت الاول
بداية سنة 2017 جانت الدنيا باردة كلش اندكت باب بيت ام حسام جيراننا قوي والي دتدكها مرة يطلع عمرها بالاربعين مرتبة وكشخة ولابسة بنطرون كاوبوي احنة تعجبنا لان منطقتنا منطقة شعبية بالگيارة مابيها هيج نسوان طلعت ام حسام وهاي المرة كفشتها من شعرها وسحلتها بالشارع وتگلها طلعيها لبنتي لا اخلي حبل المشنقة برگابكم ،،
نترك ✍🏻 القلم لأم حسام تعرفكم على نفسها
مساء الخير شلونكم اني يسرى مواليد 1972 من عائلة فقيرة عايشين بأطراف بغداد
ابوية فلاح وامي فلاحة تحوش وياه البستان واحنة هم ننزل للبستان وياهم عندي خوات 4 وماعندي اخوة خواتي ال4 اتزوجوا وخلفوا واني الوسطانية اتأخرت بالزواج يعني اتزوجت ب97 جان عمري 25 سنة اني بالنسبة لاهلي من اتزوجت جبيرة كلش وفايتني القطار لذلك اي شخص يتقدملي ينطوني بدون حتى ميسالون عليه
ب97 رحت لبيت اختي بالگيارة شافني واحد من دنغسل الدربونة اني واختي ظل رايح جاي .. هو مدحدح ولابس دشداشة صراحة متستهويني هيج مواصفات اني جنت احلم بواحد حلو حالته زينة اقلها اخلص من هذا الفكر الي عايشين بي خلصت ثالث واهلي بطلوني بس جان طموحي اكمل واحصل على شهادة دائما يگلولي انتي حلوة مواصفاتي حنطاوية عيوني كبار وشعري اسود مو كلش سرح ،، المهم للعصر اجة هذا المدحدح ابو دشداشة سأل عني عيال اختي ،، زوج اختي گلها لاختي باجر اوديج لاهلج باليوسفية نرجع اختج لبيت اهلج وعندي حجاية وية ابوج .. بصراحة ولا اجة ابالي اي مو ضوع من هل قبيل المهم رحنا للعلاوي ركبنا سيارة اني وزوج اختي .. اختي جانت حامل و شايلة بقچة شكبراتها على راسها وكايدة جهالها 2
واني هم ساعدتها گدت واحد من جهالها وركبنا سيارة ووصلنا للعرب باليوسفية ابيت اهلي ،، ابوية اتلگانة واتلگى زوج اختي وسويناله غدة هالقاسمة الله اشو من ديطلع زوجها لاختي باوعت ابوية والفرحة بعينه ممصدك حتى النعال جابه يم رجل اختي حتى يلبسه من طلع الرجال ابوية صاح امي ودخلوا للحوش يتبسبسون ،، طلعت امي من يمه جاگة حلگها وجرتني من ايدي وگالت يمة اجاج عريس بيتهم بلبة بغداد واكبر منج بجم سنة مواليده 68 وحالته زينة هو منفصل عن زوجته وعنده بنية صغيرونة وانتي يمة جبيرة ومراح تجيج قسمة مثل هاي شتكولين ،، كتلها يمة غير اشوفه غير اتعرف عليه ،، امي گالت دفوتي لج ..صحلها رجال كالت اعور هو منو الي جاي داك بابنا حتى متقبلين على هذا الرجال وباجر يجي هو واهله ويريد موافقة من عدنا ،، اني اتحضرت ثاني يوم لبست دشداشة قديفة لونها ناري ،، يااااا شطلعت عمي هنياله لهذا الي راح ياخذني ،، اندگت الباب وشفت العريس من ورة البردة مال الباب 😣 وشفت المفاجأة الي خلتني لا اضحك ولا ابجي صفنت واتذكرت هذا العريس وين شايفته😳راسا اتذكرت هذا المدحدح ابو دشداشة جاي يخطبني
