Mga Tula ni Makata O.

Panalangin Para sa mga Pilipino

Oh, Ama naming mahabagin 

Purihin ang pangalan mo,

Pananampalataya namin

Di titinag kahit anong bagyo

Salamat sa tibay at lakas

Biyayang kaloob mo sa amin

Di kailanman magwawakas

Kami ngayo'y iyong dinggin.

Si Yolanda ay mapaminsala

Mga nilalang mo'y nagdurusa

Tulungan Mo kami, maawa ka

Oh, Panginoon kami ay ibangon, 

Sa pagkalugmok, sa pagkabaon

Bigyan Mo po kami ng pag-asa

Masilip ang mga ulap at langit

Sugat sa puso, paghilumin

Upang ganda nitong mundo

Muli naming makita't mahipo.

Wala kaming makakapitan, Ama,

Ikaw lamang, wala ng iba pa

Hindi ang aming sarili o kapwa

Ikaw, O Hesus, ikaw lamang

Salamat pong muli sa inyo

Sa pagdinig sa mga hiling na ito.

Sa ngalan ng Ama, ng Anak

At ng Espiritu Santo, Amen!