البارت ١
دهاليزالقدر
بقلم. الكاتبة
Nuha-d-h
السلام عليكم احب احجيلكم قصتي انا زهراء خريجة معهد معلما ت وصارلي سنتين من اتخرجت وطبعا حالي مثل حال هواي متخرجين ماكو تعيين احنة من الجنوب واهلي ناس فقرة على كد حالهم بابا يشتغل فراش بالمستشفى وامي خياطة وعندي خوات اثنين وحدة اكبر مني اسمهة زينب ومتزوجة ابن خالي مثنى وعندهة ولد اسمه محمد عمرة سنة
وهسة حامل بنونو واختي الثانية اصغر من عندي اسمه زينة تداوم ثالث متوسط طبعا نسيت اكللكم امي اصوله كردية يعني اجداده فلذالك ورثنة من عندهة البياض والعيون العسلية المائلة للون الزيتوني اني موصفاتي عيوني عسلي لون زيتوني وطولي ١٦٢وزني ٦٣ وبيضة وشعري اسود على بابا ومعاني وجهي جنوبية يعني عيون كبار الحلك ممتلئ وعمري 21سنة اتقدمولي هواي خطابة بس امي اصرت ان اخذ شهادتي واتعين يالله اتزوج لان ماتريد يصير بية مثل ما صار بأختي زينب تكول لوعندهة شهادة جان هسة فكت الهة عازة لان حالتهم المادية ضعيفة زوج زينب مثنى يشتغل حارس بعقد بشركة النفط فالراتب يادوب مكفيهم . وخطية ابوية رجال فقير على كد حالة ويحبنا ومعاملنا مثل الاميرات ابوية لبسني بوشية لان يخاف علية وعلى خواتي لان الوضع كلش تعبان واني فرحانة بيهة احس روحي اكثر امان وكأن هي درعي المصان من عيون الناس.
ام زهراء -بالله شو گومي منا صارلج ساعة صافنة احجي وياج وانتي صافنة
زهراء -اسفة يمة جنت اتذكر ايام المعهد وصديقاتي
ام زهراء -يالله حبيبة كومي عينيني اليوم عندي هواي خياط تعرفين العيد راح يجي والنسوان كلمن تريد ثوبه بالاول يخلص عفية بعد عليج الطبخ هاي الايام
زهراء-صار يمة تأمرين امر
-مايأمر عليج ظالم اي صدك اتذكرت ام احمد جوارينا تريد ٢كيلو كليجة وتكول بنهاية الشهر انطيج فلوسهن
زهراء- اهوووووو يمة هم ام احمد يعني تعرفين كلش زين هي شلون تشلع گلبي بالتسديد يمة معاميلج كلهم تعبانات
طبعا اني اسوي حلويات وكليجة وكبب درجة اولى كلش طيبة
الي ياكل من عندهة يرجع يطلب مني اسويلهم مرة ثانية بس اكثر الطلبيات تكون من النسوان الي تجي تخيط عند امي لان احنا مانطلع نادراً وسودة عليه بابا اذا انطوهم حوافز بالسنة حسنة ياخذنة على الكورنيش وامي تسوي كباب عروك (كباب بي لحم وكرفس وطحين )
وبابا يشتري عصاير النا واني اسوي كيكة تكون مكوناتهة زايدة من العندي
بس تصير طلعة تجنن وبعدين بابا يجيب حب شمسي ونظل نكرز مقابيل الشط واحنا فارشين البساط حبيبي بابا
طبعا الي احصلة من الشغل مالتي بابا مايقبل ياخذة مني يكلي بابا الحمدلله الله شايل حملي خليهم الج لذلك اني حتى اساعدهم كمت اني اتكفل بملازم زينة وملابسهة الي اكدر عليه ومرات اجمعلي كم فلس اضمهن من تجي زينب خطية انطيهم الهة رغم هي تمانع وماتقبل وتظل تحجي عليه.
زينب -لا زهراء حبيبتي خليهم الج المفروض اني اجيبلج اشياء مثل الخوات الكبار وتنطي لاخته مو انتي سودة عليه تنطيني
زهراء-اهوووووو گلبتيه عليه دراما هندية دخذي اخذي هية اليسمع يگول مدري شن🤔و? انطيتج هي كم فلس يالله شلعتي گلبي اخذي بلا كلام
خطية زينب رغم الظروف الي تمر بيه ماتشتكي احنا بابا ربانا على النفس العزيزة
اخذت الفلوس وبجت واني سويت نفسي ما انتبهت
وبدلت الجو عليهة وظلليت احجي عن المرة ام خليل الي اجت وتريد تخيط عند امي وجايبة جناينه كلهن تريد الهن خياط القماش مالاتهم كلهن نفس التصميم ونفس اللون بس الفرق وحدة سمينة وحدة ضعيفة وطويلة وحدة وزين طوله بس حطيلج بطن وضحكي على شكولاتهم من لبسن الدشاديش يابة تگولين عبالك طالعات كشافة نفس الزي ادري هي بمدرسة وزي موحد خرب حظي وخطية جناينه فقيرات ما يكدرن يحجن ولا ونوب الاضرب تگول لامي ما تزوجيلنا هاي الحلوة تأشر على زينة ههههههههههه لان اني تصيحلي العانس الله ياخذج ام خليل
والضحك زينة كلما تشوفهة تسوي نفسه حولة هههههههه
واني اعجبج بالفزعة كلما تدلع وتريد تغلس على غسل المواعين زينة اهددهة
زهراء-ولج كل خير مابيج دخانج يعمي مابيج فايدة ماما خلي نزوجه لابن ام خليل ونرتاح منهة ههههههههههههههه
زينة -ههههههه ضحكتيني واني ما اريد اضحك مالت اي والله مالت اصوم اصوم وافطر على بصل
زينب😮-شوف هاي المفعوصة بعدهة تاكل جبس وتصيح اصوم اصوم ولج شتصومين ام سبونج بوب
زهراء -ههههه اثاري ماتنلام من تكول ام خليل عليه عانسس اذا هنا الاخت تصيح اصوم بعد شكول
ام زهراء-يمة زهراء حضري الكبب راح يجي ولد عليهن
صار ماما هسة احضرهم
لحظات وسمعت انطرق الباب
فمديت ايدي شايلة بيهة حافظة الكبب بس ما شفت منو ورة الباب كل ضني ان هو الولد الي جاي على الكبب بس استغربت لان ظليت مادة ايدي ومحد اخذهم فمديت راسي كلت خاف هذا طفل وما اشوف الاعيني تجي بعين رجال بوكتهة انصدمت وصرت بنص هدومي اشو هذا خزرني بس يمة شلون خزرة بعيونة تخوف اني ماتشوفون الا وراي غباري من الركض
وصلت للمطبخ وصادفت بابا بدربي كلتلة بابا هذا رجال بالباب كال اي بابا هذا ياسر خطية ابن الشيخ سلمان جبير عشيرة ال....................
خلي اشوف الرجال عيب يظل واكف بالباب
يالله سوينا جاي
زهراء-زينب زينب عفية وصلي صينة الجاي لبابا بالاستقبال اكو خطار اجت زينب واخذت الصينية من عندي
اشوية وسمعت صوت طرق الباب فحضرت الحافظة واجة بابا وداهة للولد اللي منتظر بالباب
وشوية وراح الرجال صديق بابا
ابو زهراء -زهراء بوية حضري مستمسكات وفايل التقديم لمعهد المعلمات حتى نروح للتربية الباجر الصبح
ام زهراء -صلوات شن🤔و? زهراء راح تتعين
زهراء😮
ابو زهراء-كولي ان شاء الله بلكي الله يوفقه وتتعين لكيت خ👍وش واسطة
اكو دكتور عندنا بالمستشفى جنة كاعدين اني ابو سالم نسولف وانطرقت سالفة التعيين واني كعدت اسولوف بزهراء معلمة وما لاكية تعيين وبالصدفة سمعني دكتور ياسر كان مقيم فكال عمو اني عندي معارف بالتربية هواي فالباجر روح للتربية واخذ بنتك وانطيك اسم واحد اسمة ابو غانم كلة من طرف الشيخ سلمان وهو يعرف شن🤔و? يسوي واني راح انطي خبر عنك بس انطيني اسم بنتك الثلاثي
والله طبعا هذا الولد ابن اجاويد وناس خيرة
ويحب يساعد الناس ورغم هو ابن خير وعندهم حلال خير من الله بس عليه نفس وتواضع الله يحفظة لشبابه
زهراء -بابا قصدك هذا الرجال الي اجة قبل شوية
ابو زهراء -اي بابا هو
زهراء -يبوي هذا الهيبة والكشخة وفوكاهة دكتور وخلاق قلبي الصغير لايتحمل
ان شاء الله بابا اني مجهزتهم
امي خطية كعدت تدعيلي وزينب فديته هم كعدت تدعيلي
كعدت زينة تصنف علية شلون اصير معلمة واركض ورة الزعاطيط ولازمة العصة ولابسة نظارتي واني منا عانس يمة اتخيلت روحي حيزبونة حشة مو معلمة
اجة الليل
وحضرنا عشا وكعدنا على الصينية
وبابا يضحك علية شلون اكرص بزينة وزينب خطية بس تبتسم وشوية واجة علية مثنى
رغم هو فقير بس كلش حباب ويموت على زينب
اني قبل لاتطلع زينب خليتلهة حافظة كبب وحافظة كليجة
وراحت
يوم ثاني الصبح كعدت قبلهم وحضرت الريوك وكعدت اكمل كم طلبية موصيني عليهة وبعدين خلصتهم وكتبت عليهة الاسماء حتى من يجون عليهن امي تعرف كل شخص اسمة وحافظته
كعد بابا ووزينة وماما وتريكنا وطلعنا ورحنا مشي للشارع العام حتى نروح عبرية لان بابا ماعندة سيارة ورحنا للتربية وسئلنا على ابو غانم وحجينا وياه احنة من طرف الشيخ سلمان وخية كام بينا وقدملنا وكمل وانطانة وصل كال هذا من تطلع اسماء التعيين تجيبون وصلكم وتجون ردنا نروح كال امانة سلمولي على الشيخ عمار كلولة ما انسى افظالكم عليه كلة بابا ان شاء الله يوصل سلامك
طلعنا وركبنا سيارات لتقاطع المستشفى
ابو زهراء-زهورة بس امر على المستشفى اتشكر من الدكتور ياسر
زهراء-اني كلبي صار طبل بس حمدت ربي ان اني لابسة بوشية(يعني نقاب )
يعني مايعرفني
اني دخلت وية بابا للمستشفى ومشيت شوية وبابا كال اوكفي هنا يم عمج ابو سالم بين ما اروح اسلم على الدكتور فظليت وامفة ومنتظرة بابا خطية ابو سالم رجال جبير بالعمر سلم عليه وكلي بوية زهورة شلونج
زهراء -الحمدلله عمو زينة بشرني انت صحتك شلونه جاي تاخذ علاجك
ابو سالم -اي بوية الحمدلله جاي اخذ بس ما يفيد بوية زهورة عاشت ايدج على الكليجة الي دزيتيه الي
زهراء-الف عافية عمو اذا تريد بعد اسويلك
ما احس الا شخص وراي يحمحم
-احم احم
ابو سالم -هلة بالدكتور شلونك بوية
ياسر عينة عليه-كله عمي ما عرفتنا
ابو سالم -اي بوية اقدملك المحروسة بنت ابو زينب المعلمة زهراء
زهراء اني گلبي صار طبل ياربي
ياسر-شلونج معلمتنا الوالد وين
زهراء-الحمدلله بابا هسة يجي
استحيت اكول راح يشوفك لان احس الكلمة كوة تطلع مني ياربي احمدك ما يشوف وجهي يمة يمة
ياسر -يالله اني اترخص عمي ما محتاج شي
ابو سالم -اريدك سالم ما تقصر ابن اجاويد
ياسر -عود ما اوصيك مو تاكل الكليجة كلهة ويرتفع السكر مالتك عود مرة ثانية بقيلي منه علمود صحتك
عافنة وراح بس يارب من شخصية شن🤔و? من عطر ياربي يحفظة لشبابة
شوية اجة بابا
ابو زهراء- يالله بابا امشينا
تسريع الاحداث بعد شهر
طلع تعيني بالاطراف كلش بعيدة عن المحافظة بحيث عبالك مسافرة يعني دوامي راح يصير كلة صباحي بس لازم اطلع الساعة بالاربعة ونص الفجر يجي علية السايق ما احجيلكم عن الطريق شلون طويل حتى اخذ وياي اكل وترمز جاي ومرات حتى انام 😂
بالطريق
طبعا هذا ابو الخط مال المدرسة الي بالقرية عرفتني عليه معلمة وياي يصير بيتهم بالمحافظة وبعد ويانة كم معلمة من القدامة هم قرب عن المحافظة بطريقنا نمر عليهم وناخذهم بس اني اول وحدة ياخذني طبعا اني وثنين معلمات جديدات بالمدرسة
اني صحيح لابسة عباية ونقاب بس جوة العباية لبسي كلة نازك وذوق ومرتب لان جسمي يساعد على اللبس
فاول يوم داومت رفعت النقاب عند غرفة المديرة
المديرة -ماشاء الله تبارك الرحمن اتفضلي بنتي انتي المعلمة الجديدةبدت المديرة تنصحنا اني اعتبروني مثل امكم احنا هنا عائلة وحدة راح تعانون شوية صعوبات بالمدرسة سواء من ناحية الخلفية الثقافية او من ناحية العادات حتى الكلام يختلف فاريدكم تتفاهمون لان انتو بعدكم صغيرات وجديدات على مجال التدريس (طبعا كان المعلمات الجديدات هم اجو بنفس اليوم الي داومت بي )
بالمدرسة اخذتنا المديرة وعرفتني على الكادر التدريسي الحلو كلهم بنات والحارس يوكف برة ما يدخل للمدرسة فاخذ راحتي واحنا جاي نمشي اتقدمت بنية من الجديدات اسمهة رفل هم تقريبا بعمري وهم كلش مرتبة ومبين من لبسه حالتهم المادية زينة
رفل -اوف شن🤔و? هاي المدرسة ويع شوفي الطالبات يمة عبالك من العصر الحجري ياربي شوفي شلون ينظرون شن🤔و? ماشايفين بشر
زهراء-اني ابتسملهم خطية معظهم فقرة وحتى البنات الي حالتهم زينة هم تشوفيه فقيرة بس فقيرة طبع يعني خام من شافو نقال رفل دك
عبالك فد معجزة الطالبات كلهة التمو على رفل ورفل بقت اتعيط عليهم
هههههههههههههههه المنطر كان يجنن لان رفل تحسسني عبالك مو بشر عبالك مكروبات
يابة على كيفج اميرة ديانا كلنة من ادم وادم من تراب
والمعلمة الثانية متزوجة وعندهة طفل وحامل اسمهة تبارك
كلش حبابة وتعرف تتعامل وية الطالبات خطية انطوهة صف اؤل واني انطوني صف ثاني وثالث علوم ورفل رياضيات هم صف ثاني وثالث
خلص الدوام اول يوم واني كلش فرحانة لان تجربة جديدة واكتشفت هواي اشياء بهذا اليوم
كنت اتخيل ان ماكو واحد افقر من عندنا بس متت قهر وضجت من نفسي من شفت وضع الطلبة هنا حيل تعبان من كل الجوانب
حمدت ربي وشكرته الف مرة على النعمة الي عندنا وما حاسييين بيهة احنا بالنسبة الهم جايين من الصين من التقدم والتطور خطية حتى وعي ماعندهم
وصلت للبيت يمة بيتي ربي يديمة علينا ويحفظ بابا
خطية ماما واكفة على الطباخ وزينة راجعة قبلي من الدوام وجاي تحضر السفرة
ام زهراء -الله يساعدج يمة زهورة روحي بدلي وغسلي بين ما اصب غدة
طبعا اني اخر وحدة ارجع من دوامي
غسلت وبدلت ورحت للمطبخ حضرت الخضرة والملاعق وجبتهم للسفرة وكعدت
ابو زهراء-هلة بيوية زهورة بشري اليوم شلونج
زهراء-كول الحمدلله على سلامتج اني اعتبر من المسافرين
ابو زهراء-هههه والله يابوية حمدي ربج احسن من قبل اتذكر قبل اختي سعاد من تعينت بمدرسة تروح تعبر الشط ببلم (زوزق)
يالله توصل لمدرسته
زهراء😱
وكملنا اكل وحضرنا الجاي وصرت اسولف احداث اليوم وشنو سوينا
ومرشهر واني اداوم كل يوم وصارت علاقتي بالمعلمات قوية وكلش حبيتهم وكعدت اسويلهم كبب وحلويات بانواعها وكيك من يوصوني وطالبات صفي كلش حبابات ومطيعات وعلمتهم شلون يعتنون بظافتهم فيوم من الايام سئلتني طالبة صغير ست اريد اصير حلوة مثلج
فستغليت هاي الفرصة واخذت انصحهم ان النظافة سر الجمال يعني تعتني بنظافة شعرهة وجسمهة وملابسه يعني الفقر صح موجود بس النظافة ببلاش وهكذا شفت اكو تحسن بنظافة البنات وعنايتهم لنفسهم وهذا الشي كلش فرحني ولفت انتباه المديرة وخلتني مرشدة للصف الثاني واشتريت قماش بسيط وطلبت من ماما تخيطهم الي بردات للصف واشتريت سلة مهملات للصف خلقت عالم خاص الي مع طالباتي
طبعا ما احجيلكم عن الخطابة
كل يوم جاية مرة ام طالبة لو جدة طالبة تخطبني لولي العهد كل وحدة من توصف ابنهة تكولين براد بت وبعدين بالحلة انصدم اشوفة بياع خضرة الدشداشة ما مغسولة صالهة شهر خرب والثاني يمه سنونة صفر وشعرهة متروس دهن والي يكتلك امة تكول على الموديل ابني استغفر الله يعني اموووت من الضحك ما ادري ابجي
للكاتبة
Nuha-d-h
كل يوم بالطريق نمر على بساتين وهاي البساتين يكون بالوسط اربع بيوت او بالاصل اربع قصور بس اكو من بعيد عنهم بالنص قصر اكبر منهم بس ما شاء الله تبارك الرحمن شلون تصميم يعني الي يعبر من عند البيوت يتمنى يدخل داخل البيوت ويشوف شن🤔و? بيهة طبعا هذا شعوري كنت اتمنى ادخل اشوف
رفل بدلع -لازم اشوفلي فديوم وادخل عليهم بحجةحتى ابهرهم بجمالي واخليهم يتجننون عليه 😍ويقعون بشباكي هههههه لان الي مثلي لازم تعيش بهيج مكان من مستواي
تبارك -اهو كعدت رفل تحمة علينا حجت بصوت ناصي
ههههههههه
زهراء -خرب يومج تبارك
رفل-ست تبارك ضحكينا وياج
تبارك -لاهيج جنت اكول لو تدخلين عليهم وتهد عليج الجلاب مالتهم هههههههه جاي اتخيلج تصيرين مثل هذا بيب بيب
رفل😠
كانت ويانة بالخط معلمة اسمهة ست امنة شوية قديمة بالمدرسة فتعرف كل اهل القرية
حتى تعرف طباعهم فكعدت تسولف عن اهل هاي القصور
امنة-هذولي عشيرة ال........ناس كلش معرفين وصاحبين حلال وخير من الله املاك وحتى خارج العراق عندهم اعمال
راح تسئلوني ليش همة بعدهم بهاي القرية النائية البعيدة عن المدينة
همة بقو هنا وفاءا لجدتهم الي اصرت تبقى هنا وتكول اموت من اطلع من بيتي قصدهة القرية تكول حتى الهوى يختلف هنا عن هوى المدينة هناك الهوى يخنك بحيث حتى شبابهم يطعلون للمدينة للونسة للعمل اي بس للسكن ما يتحملون يبعدون عن قريتهم
طبعا همة من العشائر القداما الي ساهمو بثورة العشرين يعني تخيلو بزمنهم القديم كدروا يطردون الانكليز من بلدهم
وهاي همة قبل هسة حاليا ضربوهم في اضعاف بالقوة والعدة والعدد والجاه
(ملاحظة طبعا محافظات الجنوب الى يومنا هذا يحكمها طابع العشائر يكون حتى فوق القانون والدولة خصوصا في المكان الي اني اداوم بي )
امنة-تعرفون ست فوزية ً
زهراء-اي اعرفهة معلمة التاريخ صف السادس
امنة-اي هي هاي تصير بتهم بنت الشيخ
رفل-😮 مامبين عليه بنتهم كلش بسيطة
زهراء-لامبين عليه كلش وقورة وحبابة وصاحبة اخلاق راقية حتى من وحدة تغيب هي مرات تسد الشاغر عنه ولاتكولين معلمة كبيرة بالعمر ولايوم شفته تتهرب عن درس
رفل -😒مو قصدي بالاخلاق قصدي باللبس والستايل مالته حيل بسيط
امنة-عيني هاي الي ماعاجبتج الهة بيت من القصور الي شفتوهة لان هي متزوجة ابن عمهة همة كلة ناس تعرف ناس الاغلبية ياخذون قرايب
رفل-😲
زهراء-الله يزيد ويبارك والله تستاهل كل الخير ست فوزية ام عزام
امنة -هي باستطاعته ان تلبس ارقى الجبب والعبي بس هي تواضعا وتتحسب للبنات الي حوله فتلبس بسيط حتى ما يحسون بالفروقات الطبقية
زهراء-الله اشكد احترم هيج ناس يعني والله نادرا ما يتواجد هيج اخلاق بهالزمن. اشو عندنا كلهة تفاخر بالمال والنسب والجاه
والله لو ما انتي حجيتي والله ما اعرف هي وين ساكنة او بنت منو
رفل -🙄
وصلت للبيت كالعادة كنت اسولف لامي واختى احداث اليوم ومرت اربع اشهر بالدوام
رغم تعب الطريق وحر الصيف والبرد هسة حاليا بس كنت من استلم راتبي كلش افرح اجمع من عندة قسم حتى اشتري سيارة لبابا واعزل من عندة فلوس السايق مال الخط وانطي منهم ٢٥الف لاختي زينب
زهراء-عفية زنوبة والله مافارغة اشتري شي لحمودي والبيبي الجاي بالطريق. فاخذي هذني واشتريلهم وكليلهم هاي من خالة زهراء
زينب -مشكورة زهورة ربي يفرحني بيج واشوفج عروسة وية ابن الحلال الي يحفظج ويصونج
زهراء-😊امين بس شكلي مثل ما كالت ام خليل عانس. ياختي كل عريس يجي اضرب من الثاني من القرية
زينب -والله من كلامج اتمنى اشوف اهل القرية والقرية
زهراء-ولج ناس حيل طيبيين من اهل الله على نياتهم ما يهتمون فلانة لبست او فلانة جنطتهة موديل او حذاء ماركة ناس عايشين ببساطة الغني والفقير متساوين
مرت اربع اشهر ولاحضت من مراقبتي للطالبات شفت بنية بين يوم ويوم تداوم وكانما مسويتهة جدول فاني كلش ضجت منه
وضليت ارزل بيهة على كثرة الغيابات والواجبات الي تفوتهة
وكل يوم على نفس المنوال ارزل ومايفيد
بس الغريب بالامر الطالبة بس تدنك راسه مرات تبجي مرات تسكت متجاوب بس بحجة ست بطني توجعني فكمت رسلت على اختةهة بصف السادس وحجيت عن غيابات اخته وتقصيرهة بالدراسة اخته سكتت ودنكت
كلتله هسة انتي مداومة وهي ما مدوامة شكو
ليش ما تكولين لامج عليه
الطالبة-صار ست المعلمة من اروح اخلي ابوي يكطعهة بس عفية لاتحجين كدام الطالبات
زهراء-؟؟؟؟؟؟؟؟!!!!!!!
اني هنا سكتت واخذني الفضول بكلام الطالبة وطلبه الغريب
ليش ما دك الجرس ورحت لغرفة الادارة وسولفت لست امنة طبعا عرفة الادارة من ورة المعلمات صايرة حضانة على مطبخ منال العالم الي جايبة البامية تقلمهة والي تنظف خضرته حتى من يرجعون يلحكون على بيوتهن
امنة -ياااااا😱ولج بس لاهاي الطالبه بنت ام سامي
زهراء -ليش شبيهة
امنة -خطية هذولي حالتهم كلش فقيرة كلش وتعبانين بس ما اعرف ليش تغيب هم الفقر موحجة للغياب
زهراء-!!!!!
اخذت افكر بالطالبة ومن رجعت للبيت سولفت لبابا عن الطالبة
امي-انتي هواي متعلقة بالطالبات ترة انتي مو امهم وما معقولة تريدين كل الطالبات مثاليات على مرامج هم لازم بيهم الزين وبيهم المتخلف للنظام اصابع ايدج ما متساوية
بابا-صحيح كلامج ام زينب بس لاتنسين هي المسؤلة عنهم فلازم تنتبه عليهم لان هاي امانة جيل كامل بين ايدهة تتحاسب امام الله عنهم
فنصحني بابا ان اروح مع الطالبة لبيتهم واستفسر عنه بس كون باثناء الدوام حتى مايروح عليه الخط
والله ويوم ثاني سويت الي كال عنة بابا وشفت الطالبة مداومة واخذت اذن من المديرة ورحت اني وست امنة وياهة واحنا نمشي بالطريق
وما اشوف الا ست سيارات اربعة بيكم دبل قمارة سودة واثنين سيارت عالية هم سودة مضللات فأثنا ما مرت السيارة من قربي طفر علية ماي مخلوط بالطين على عباتي طبعا هذا الحجي ست امنة والطالبة يمشون كدامي
اني نزيت هي شهكة وهي وكعة على وجهي
مشت السيارات ووكفت سيارة وحدة سودة نزل من عندها رجال لابس زي خليجي بس ماشاء الله شن🤔و? من طول وهيبة وعيون
-خيرج اختي
زهراء اني عيوني انترست دموع-وما كدرت احجي
مد ايدة الي حتى يكومني من الارض
لان اني الحمدلله بسطت بالكاع عبالك ما شايفة كاع 😂
رفعت راسي اباوع للرجال وصارت عيني بعينة اشو هذا ظل فاتح حلكة ويباوع ويكول تبارك الرحمن شن🤔و? انس جن انتي ولج شنو المطلعج بالجولة ماتكولين ابوج شلون انطاه گلبه يعوف نعمة الله تمشي على الكاع
للكاتبة
Nuha-d-h
اني كبل خليت ايدي على وجهي وانتبهت ماكو نقابي اثاري من الوكعة انرفع فوك راسي بس ما اسولفلكم عن حالي
يتبع
