البارت٦
دهاليز القدر
للكاتبة
Nuha-d-h
زهراء-يمة😱 يمكن هو رجع ركضت بنفس مكاني لبدت ورة البردة بس والله من الخوف اجيت تكرمون اذب من راسي معدتي حيل انعقدت
عمار -طبعا نسيت كلام نوال
وكملت شلغي والله انهلكت هلاك حتى بناتي ما جاي اشوفهم هاي الايام من كثر اللود الصاير علية بالشغل الله يحفظة الوالد خلة كلشي براسي وياسر دكتور مو اختصاصة هاي الامور صار كلة براسي اني وخطية وشوية محمد هم يشيل عني بعض الاعمال
بس هم يبقى كلساع يتصل على كل صغيرة وجبيرة يسألني عنه
المهم دخلت للغرفة بعد ما خلصت شغلي حتى ماحضرت العزيمة الي مسويهة الحجي علمود ياسر رحت كبل بوجهي لشقتي اني ونوال ردت اسبح وابدل ملابسي لان راح يجون الزلم والناس على المولود وجايبين رادود معروف بالسلف يسويلنا المولود فدخلت
للغرفة وشميت ريحة عطر نسائي اول مرة اشمهة لان اني متعود اني اجيب العطور لنوال وكلهن اجيبهم وياي من ارجع من السفر من الامارات واعرفهن وحدة وحدة هاي ريحة العطر مو نفس الي اجيبهم
فما اهتميت حضرت ملابس وخليتهم على السرير
واخذت منشفة واجيت اطلع درت وجهي وانصدمت اكو رجلين بنية لابسة حذاء كعب مبينات من جوة البردة واكفة ورة البردة
اني سويت روحي ما شفتهة وطلعت وقفلت الباب وراي ردت اشوية العب بعصاب الي داخلة غرفتي
شي اكيد مو غريبة من بناتنا يمكن اختي اسيل خاف لابسة فستان وتستحي خاف اشوفهة بي خلي احرك اعصابهة شوية رحت سبحت ولفيت المنشفة على خصري والمنشفة الثانية على راسي وجاي انشف شعري ودخلت للغرفة ج
زهراء-سمعت صوت الباب انفتح واني على نفس وكفتي ورة البردة كلبي كام يرجف لويذبحوني قطرة دم ما بية
شفتة دخل ولاف الخاولي على خصرة يمة اني صرت طماطة من الخجل عزا العزاج زهيرة شورطتي نفسج شفت الولد كعد يتقدم باتجاه البردة وعلى وجه ابتسامة ذيب وكأن وكع على فريسة اني غمضت عيوني وخليت ايدي على وجهي وكأن بهاي الحركة راح اختفي وما راح يشوفني
فجأة انفتحت البردة وانسحبت من زندي حيل واندفع على السرير
اني مو متت من الخوف لا اني صنمت من الرهبة صرت بس ارجف
ظل واكف ويباوع علية كلي بصوت عالي خشن -رفعي ايدج من وجهج وكولي منو انتي يالله ً😡
زهراء وهي حمرة نزلت ايدي من على وجهي واني ارجف مثل السعفة
عمار من الصدمة رجعت ليورة -دخيلك يالعباس هاي شلون وصلت هنا بغرفتي
عمار وبخزرة -
انتي شجابج هنا
عمار ما اعرف مشاعري كانت على فرحة على خيبت امل ان الابنية المحتشمة والوقورة الي وكعت بحبهة تصير بهيج موقف بالله كانت مو بغرفتي مثلا بغرفة ياسر ويدخل ياسر ويشوفهة يعني اي واحد راح يكدر يشوفهة بسهولة
شنو ماعندهة احتشام
عمار -انتي شلون تفترينزبالبيت وداخلة بالغرف وانتي بهاي الملابس ماعندج حشمة لنفسج هذا بيت متروس شباب
زهراء اني انقهرت شلون يحجي وياي هيج وبهذا الاسلوب الي يرخص من نفسي وحشمتي -بصوت اقرب للهمس -والله اسفة هي خالة نوال جابتني هنا وكالت اخذي راحتج محد يدخل هنا
عفية الله يستر على عرضك استر علية اني ما ادري هاي غرفتك الله شاهد خالة نوال كالت هاي غرفتي ومحد يكدر يدخل عليج لاتخافين
والله ما ادري
هنا عمار اتذكر كلام نوال على المفاجئة الله يسامحج نوال خليتني اشك بالابنية
رجعت اباوع عليهة بس فدوة لربه شلون حلوة ونوب شلابسة ادري هاي شلون راح اخليهة تطلع بهاي ملابسهة والله اخاف حتى من عيون النسوان من يباوعن عليهة
هي كامت تبجي فدوة ونوب زادت جمال من بجت هاي من اتزوجه اخليهة بس تبجي حتى اكعد بس ابوس بيهة واراضيهة اوف يابة انتبهت على روحي بطرك المنشفة على خصري
وهي مدنكة راسهة
زهراء-الله يستر على عرضك لاتباوع بعد علية مو كرهته لروحي
عمار اوف يابة الصوت عورة والوجه عورة والطول عورة والجيم عورة شنو ربي الواحد يخليهة بقفص ويكعد ما يخليهة تطلع
من الغرفة
اني شفت عباية يم رجلي واكعة كمت شلت العباية وخليته عليهة ودنكت
عمار -محشومة يبنت الناس اني هم عندي عرض وغيرة لا تخافين
رحت اخذت نقالي وطلعت من الغرفة واتصلت على نوال وبس ابتسم
عمار -الو نوال تعالي صعدي فوك بسرعة
نوال-صار شخنا
يااااا بس لاشاف الابنية
وصعدت بسرعة ركض للشقة لعمار
ودخلت جوة لكيت الابنية لابسة عبايتهة على راسهة وعيونهة كلهة دموع رفعت راسهة -
زهراء-خالة نوال انتي مو كلتي ان هاي غرفتج
طلع عمار من الغرفة من سمع صوت زهراء جاي تحجي وية نوال-
زهراء -خالة غير تنطين خبر لابنج ان اكو بنات بيهة
نوال ضحكت وباوعت على عمار -هههههه السموحة خالة هذا زوجي الشيخ عمار وما يدري ان اني صعدتج فوك هنا
هو ماجان موجود بالعزيمة خطية جان بالشغل
زهراء😱-اسفة خالة عذريني موقصدي بس
عمار قاطع كلامهة -يالله ماصار شي نوال نزلي الابنية جوة وها مو تخلين الزلم داخلة طالعة على البيت والله اكسر رجلة اليدخل للبيت
نوال 🤔
-اليوم شنو السالفة شجاكم بس تكسرون رجلين شسامعين اليوم انت تصيح اكسر رجلة اليدخل وياسر يصيح اكسر رجلة الي يفوت للبيت شكو شبيكم ولد سلمان
عمار -يالله اخذي الابنية صارت طماطة من وراج بعد الي صار اشك بعد راح تطلع من بيتهم من وراج
زهراء-اخذتني نوال وصلتني للديوان وشفتهم كلهن بنات حاضرات ونسوان كبار والحجية الحبيرة وام عمار واخذتني وعرفتني عليهم والحجية بس تصلي على محمد وتكول خالة وين اهلج
والبنات ظلن بس يباوعن علية
واني من الهبطة الي صارت وية شيخ عمار بالي مو يمهن واتمنى يخلص المولود حتى ارجع للبيت والله هذا اطول يوم بحياتي صار
شفت من بعيد تبارك تأشرلي هي ورفل والمعلمات
يمة عبالك اني شفت طوق النجات من شفت تبارك رحت كبل عليهة وحضنتهة
تبارك -ولج شطالعة صدقة لربج
رفل وهي تكلب بعيونهة وتباوع على الديكورات والبنات
رفل -خرب شوفيهن شلابسات كومة ذهب وشنو من البدلات اويلي يابة هاي وهو بس مولود زين لو عرس شنو راح يلبسن
طبعارفل كعدت تبتسم وراحت على الحجية وباستهة من راسهة وحشرت نفسهة قرب ام عمار عبالك راح تطير
وتبارك اشتغلت بالتصنيف على رفل
اني ظليت كاعدة بمكاني ابد ما اتحركت من الخوفة اشو بيوم واحد شبعت مفاجأت تكفيني لبقية عمري
وخلص المولود على خير واجة السايق علينة اني والمعلمات
ولبست عباتي ونقابي وظليت امشي بيت البنات حتى محد يشوفني
طلعنا برة بالباب صايرة لخة من الشباب والرياجيل
احنا وحدة تدعم بالثانية بس رفل بينا شخصيتهة
قوية وتباوع عليهم
شوية وسمعت صوت الشيخ عمار اقترب من عندنا
عمار بصوت خشن-هلة ست امنة ليش واكفات هنا
امنة-شيخنا منتضرين السايق كال هنا اني بالباب طلعولي اشو ماكو ما جاي نشوفة
عمار واني گلبي نار واشوفهة بين البنات ومدنكة فدوة لربج شلون خوافة
بس هم ظليت اعاين على الشباب شلون يستخفون دمهم كدام البنات
فرحت واشرت لواحد من اولاد عمي
وكلتلة روح صيح السايق مال المعلمات
والله راح شوية واجة سيارة كية مال المعلمات
وصعدن واني بقيت يم السايق وعيوني عليهة بحجة اسولف وية السايق شفتهة اول وحدة صعدت بيهن وظلت مدنكة وما رفعت راسهة ابد
