من شوية قريت جملة بتقول :
انتهاء العلاقة لا يعني انقطاع الوّد .
سرحت شوية كده وفتحت الكومنتات لقيت إن تفكيري فـ الكام دقيقة سرحان كان في محله تماماً ..
واللي فكرت فيه إن ازاي علاقة تنتهي ويفضل في وّد اذا كان الوّد ده مكنش موجود أصلاً فيها لأنه لو اتوجد مكنتش هتتقطع وتخلص بالساهل ده كان أول هام .
تاني هام بقى هو مين فينا بينهي علاقه ومبيقطعش الوّد احنا مش ملايكة علشان نعمل كده احنا بشر ولو كان فـ اللي قطعنا علاقتنا بيهم خير كنا استمرينا معاهم واللي مش عايز يقطع الوّد اعتقد هو شخص بيحب المرجحه ومش عارف هو عايز إيه فلما تقطع اقطع أصل الوّد بعد إنتهاء كل شيء مش هيصلح حاجه ولا هيرجع اللي فات علشان بتبقى خلاص كل الاقنعه وقعت والنفوس بانت على حقيقتها ومبقاش ينفع تمثيل أو أي كلام يتقال من أي نوع ..
الوّد الحقيقي للي رفض يمشي ، للي اتمسك وهو شايفنا بنسيب فـ صّحى فينا حاجات كنا ناسينها فـ قررنا نمسك فيه احنا كمان ونكمل ، الوّد للي شاف مننا مهما شاف واتحمل فأجبرنا على إعادة النظر في تصرفاتنا وتغييرها ، الوّد للي تقبلنا زي ما احنا بكل السوء اللي فينا قبل أي حاجه حلوة ، الوّد للي يستحقه يا جماعه !
خلوا عندكوا ضمير حتى لما تقطعوا علاقة بلاش مرجحه ومحاولات إصلاح وضحك على نفسكوا بإن الفرصة التانية مع نفس الشخص ممكن تكون أحسن والله هي لو أحسن كانت هتبقى أحسن من الأول مش هتحتاج إعادة ولا دور تاني علشان تنجح وافتكروا إن اللي بيدخل دور تاني وينجح مش بياخد غير ٥٠٪ من الدرجة ، متعيشوش نص حياة لما ممكن تعيشوا حياة كاملة من غير مشاكل ووجع دماغ !
وّد ايه اللي انت جاي تقول عليه 😊 !
هختم بجملة بحبها :
(اريته جانبي المظلم ، فوضع لي نجوماً) .
