ذلك الغريب ٤
زينب الموسوي
ردنا نطلع الولد مقبل ياخذ فلوس وگال حتى تجوون مره ثانيه واحنا هم ماصدگنا طلعنا التاير السياره كان بنچر واحنا كلشي منفتهم بالسياره ولانعرف نبدل سبير ظلينا واگفين نريد احد يساعدنا ماكو
لچ مريم فوتي للمطعم وصيحي هذا الولد خلي يساعدنا
وليش اني انتي روحي
لچ هو كان يباوعلچ وتاخرنا روحي وفضيها
رحت عليه تعجب من رجعت
بهاي السرعه اشتاقيتي لاكلنا
لا السياره بنچر ممكن تساعدنا
ممكن بس تگولين اسمچ
مريم اسمي مريم
يعني مثل مريم العذراء عدنا
اي نفس المعنى بس تحرك تاخرنا على البيت
لازم تساليني عن اسمي
ارجوك صدوگ تاخرنا شنواسمك
جوزف الكل يصيحلي جي ار
طلعنا بدا يساعدنا ورحاب وسما سوالف وضحك وياه سما سالته
هذا لون شعرك لو مصبوغ شتعقدين انتي. اعتقد طبيعي وانتي شنو لون شعرچ. اسود سال رحاب وانتي اسود. وسالني وانتي. ماعندي شعر خلصنا تاخرنا وانتي سما ورحاب كافي وظليت احچي وياهن بالعربي كافي ذوله امريكان ماعدهم زحف بطلن وعدنها على خير
رحاب جاوبت اذا ماعدهم زحف نعلمهم هذا تبادل ثقافي شكو بيها
خلي نتفرج شبيچ الفرجه بلاش تعاي نصوره وندز صوره لبنات عمي بالعراق ونكتب السايق مالتنا وفعلا صورنا وهو عند عادي
خلص قبل لااصعد گلي
مريم ارجعي مره ثانيه علينا
اوكي
صعدنا السياره خابرت امي گتلها كل الي صار تعصبت وتوسلت بيها تسامحني وبقينا نضحك على الي صار اني والبنات
رحاب اشو هذا الاثول مانطانه رقمه
سما هذا لو عراقي چان كتبه على التاير
لچ اخاف صدوگ كتبه على التاير انزل اشوف
عيني مريم اول طلعه وگعت امريكي ومن اصل ايطالي يعني يطبخ وينظف وكلشي يسوي والخلقه من تشوفيها تنسين اسمچ
والله صوچي اني طلعت وياكم هذا امريكي يعني عند صديقه وثاني شي باوع عباله ارهابيات وجايين نفجر وثالثا جاملنا حتى يمشي شغله دعايه لمطعمه يعرف راح نسولف لصديقاتنا وكلهن راح يوگفن سرا باچر بمطعمه يدري العرب اهم شي عدهم الاكل
وصلت على البيت امي رزلتني وعدتها بعد مااسويها وبابا كان ماموجود دخلت لغرفتي سلامات محد كفخني ثاني يوم اجتمعن اكثر من ست بنات حتى يروحون للمطعم مقبلت اروح وياهم اتصلت رحاب باليل عليه
لچ مريم هذا سال عليچ وحافظ اسمچ وگال المره الجايه جيبوها وياكم
موت كرفچ انتي وياه لچ هذا يسرح بيچن گاعد يمشي شغله بروسنا اليوم ماخذه سته باچر عشره وضحك وسوالف
دتعاي ويانا باچر خلي نشوف شيسوي
ليش هم راح تروحين باچر صدوك متستحين لچ هذا امريكي افتهمتي شنو قصدي
لا شنو قصدچ
يعني تفكيره مو مثل تفكيرنا ماعنده عيب وخجل وحرام وممنوع كلشي مباح من كل عقلچ يفكر بوحده عربيه كل شويه تگله شوكت تجي تخطبني ليش متفكرين بعقلچ
ظلوا البنات يوميه يروحون ويوميه يسالهم عليه لحد يوم سال عن اسم الاعداديه الي اداوم بيها
وشكو گلتي اله اسم الاعداديه وليش ماگله اذا اني نص الاعداديه اخذتها يتغدون يمه ليش يوميه تورحين جاوبيني الولد عاجبج. لا بس داتسلى وهو دمه خفيف ويسال عليچ شوفيه شيريد
انتي بطرانه لچ اني اذا اشوف كل ولد يباوع عليه شيريد افتح مضيف للولد هاي الولد شوفيها مليانه الاعداديه اذا اريد بنص ساعه اجيب خمسه بس اني مااريد انوب امريكي والله بابا مو بس يذبحني لا يذبحني ويذبني للچلاب
بعد كم يوم جتي سما عليه للبيت
مريم جي ار دز رقمه حتى تخابريه بس رحاب اخذت الرقم وهي خابرته صار يومين
وبس لا گالتله اني مريم
ماادري بس هو يلح على رقمچ
والله اذا انطته رقمي الا اسويها طلايب وعشاير عرف ولف وي هذا الامريكي بسيطه اني الها باچر
الليل كله بس افكر شنو هالورطه هذا منين طلعلي
من الصبح رحت على رحاب صدوگ تحچين ويه هذا الامريكي وبس لاگايلتله مريم انتي
لا مگتله هو يعرف صوتي وحاچي وياي اخذ رقمي حتى يوصلچ
اخر مره اگلچ مالچ شغله بيه لاتنطين رقمي ولاتحچين بسمي وياه والله اگول لاخويه سنان ويگول لاخوانچ
هاشبيچ عصبيه الولد عنده عادي يحچي وياي ويه غيري بس يلح على رقمچ
گوليله ماعندها رقم ومتريد احد يخابرها وتكره الامريكان زين
صار كل هذا اگوله بس صدوگ متفتهمين واذا مااخذه اني
بالعافيه عيوني هسه هو هم واگع باب بيتكم ويتوسل بيچ اخذيني لچ هذا مبين محترف يلعب عليچ وعلى غيرچ وشافچ ممصدگه انطاچ الرقم
