منقوله للكاتبه زينب الموسوي
بارت1
زينب الموسوي
رغم أن الحب شعور جميل وتجربه حلوة يمر بيها الانسان لكن مرات هذا الحب يتحول الى عذاب وشقاء في حالات معينه هاي الحالات متسمح للانسان يشتاق ويعبر لحبيبه عن مشاعره ياترى شنو هاي الحالات نسمع القصه من صاحبتها احسن
السلام عليكم اني سوزي من اب عراقي من العمارة وام امريكيه مواليد ٩٤احچيلكم شلون بابا وصل لامريكا اسمه محسن كان عسكري بحرب الخليج ٩١ومن انسحب الجيش من الكويت هو وخاله عبدالله شاركوا بالانتفاضه الي صارت ضد الحكم ابوي كان متزوج وعنده بنيه اسمها اسراء ولد اثنين محمد وحسين وخاله عبدالله هم متزوج خاله احلام وعنده ولد اثنين فراس وفيصل من انتهت الانتفاضه والجيش سيطر على المدن انهزمت الناس الي شاركت بالانتفاضه لمعسكر رفحاء بالسعوديه خاله اخذ عائلته بس بابا زوجته وأطفاله كانوا بيت جدهم مگدروا يلحگوه طلع لرفحا ويه خاله وعائلة خاله وبقوا هناك تقريبا سنه ونص وبعدين بدت العالم تقدم لجوء الدول الاوربيه وامريكا لان رفحا كانت مجرد محطه للانتظار مامسموحلك تروح للمدينه او مدارس اوعمل بابا وخاله والعائله قدموا ملف واحد سوا كعائله وانقبلوا لاجئيين بامريكا وصلوا لامريكا صيف ٩٣استقبلتهم منظمه وقدمت كل المساعدات الهم وكانت المسؤوله عنهم مريه امريكيه اسمها نينا اهتمت بيهم وفرتلهم احتياجات مرات تجي عليهم تلگاهم ياكلون تگعد تاكل وياهم العاىلة كلهم حبوها وتعلقوا بيها وخاصة بابا حبها وتعلق بيها وزوجته الاولى ماقبلت تطلع وراه لامريكا لان ماحصلت جواز بسبب زوجها كان مطلوب فمحد انطاها موافقه امنيه بابا خطب نينا وتزوجها وظلت وياهم بنفس البيت حبتهم واخلصت وياهم وحبلت نينا وجابت بنيه اسمها سوزي سمتني على اغنيه امريكيه چانت تسمعها بفترة الحمل الاسم الثاني الي چان سوزي الخبله بيت ابو فراس سموني هيچ واكو اسباب لهاي التسميه الي لزگت بيه من الصغر...يتبع
طرف واحد
زينب الموسوي
بارت2
اسباب هذا الاسم هواي منها ماما من چنت زغيره اخذتني، وياها للتسوق بمجمع كبير وكانت تدفعني بالعربانه امي وكانت حامل وگع واحد من الرفوف علينا اثنينه وگعنا جوا والاغراض فوگانه والرفوف حديد نقلونا المستشفى امي صار عدها اجهاض واني الأطباء گالوا الضربه براسي ممكن تاثر على عقلي اهلي رفعوا قضيه تعويض على المجمع وطلعنا تعويض الأطباء بالغوا بالتقارير مالتي فقررت الحكومه الي راتب وتعويض ومو من حق اهلي يتصرفون بالتعويض إلى أن اني ابلغ سن الرشد يبقى بالبنگ ويزداد فوائد وتعويض امي اتصرفت بيه اشترينا بيت وفتحنا محل للبابا وخاله ابو فراس هذا سبب الثاني من كبرت وبديت احچي العراقي صعب عليه لان اني على طول يم امي عافت الشغل وتحچي كله انگليزي وبابا مااشوفه دوم بالشغل لان مصاريف عائلته بالعراق ومصاريفنا ومن اروح يم بيت خالو ابو فراس يظلون يضحكون على حچي العراقي لان اخطا بيه يعني بالعمارة يسمون المرايه مشوفه اني ماافرق بينها وبين المشط ويظلون يصيحون سوزي الخبله
بيتهم قريب من بيتنا وماما وخاله احلام صديقات واني وفراس. فيصل نترجم بس خاله احلام هم تعرف انگليزي وتحبني لان هي حبلت مرة ثالثه وجابت ولد فقار لذلك چانت تهتم بيه وتشتريلي بدلات وتمشط شعري واني چنت شنو تگول اسوي واتعلم منها عراقي وكل الي يسوونه فراس وفيصل احاول اسويه احسن منهم بالمدرسه بالبيت حتى اثبت الهم اني مو خبله فراس اكبر مني ،بست سنوات وفيصل خمس
ماما علمتني مااخاف واحب الحياة علمتني مااخفي مشاعري الي احبه اگله احبك وماعلمتني اكره صورتلي الحب قصة جميله مابيها تعقيدات حچتلي عن حبها البابا وصتني
لمن تعرفين شخص وتسمعين دگات گلبچ وانتي گباله انظري بعينه وگوليله احبك لاتحبسين الحب لان نعمه من الله
مافهمتني الرجل العربي يعتبر هذا استهتار وغباءهذا الشي اني اكتشفته بعدين
كبرت بين اهلي. بيت خالوا ابو فراس وخاله. احلام ماتضايق من يصيحولي الخبله لكن من يگولها فيصل حيل اضوج لان هو يزودها شويه ويحب يخلي أيده على شعري ويخربطه. يكول خبله من صار السقوط عمري تسع سنين بابا راح للعراق لزوجته واولاده وبقى فترة يمهم ماما رادت تأخذنا للسينما كلنا دخلنا اني وامي عليهم خاله احلام شافتني لابسه شورت حچت. وياي
سوزي انتي كبرتي بعد هذا البس عيب روحي لبسي لو بدله لو بنطرون
بس الدنيا حارة اليوم
جهنم احر تذكرين حچيتلچ على الجنه وجهنم بالجنه ميقبلون هذا اللبس وندارت على ماما حجبيها نينا ترى كبرت والبنيه شكلها مو عربي من تلبس الحجاب عاد تبين مسلمه
فيصل جاوبها ماما هي خبله ماعليها عتب
من سمعته طلعت من بيتهم وا لحگتني وماما ومارحنا اني وياها لسينما وماما مقبلت تحجبني
فيصل المكروه شگد شايف روحه بقيت سنين اسمع هذا الحچي اقتربت من اخواني بالعراق وظليت اراسلهم واتعلم منهم عراقي رجع بابا النا وظل بين العراق وامريكا كبرت فراس وفيصل بدوا يحاسبوني على لبسي واني اسمع كلامهم خاصة فيصل شنو يريد اسوي احسه رغم خبثه وياي قريب من گلبي خاصة من كبرت وصار عمري ١٥سنه علموني اصلي وكم ايه قرانيه بس امي چانت تشوفني زغيره على الحجاب وحاول ابوي يقنعها بس مقبلت فيصل حجى وياي
خبله دخلتي الاعداديه شوكت تتحجبين
ماما متقبل
يعني هسه انتي من تلبسين شي تاخذين رائيها بيه
لا البس بكيفي
خلص البسي الحجاب بكيفچ متجبرچ تنزعيه
ماعندي ربطات بالبيت
اسمها شالات حجابات امي عدها وصيها تجيبلچ
اوكي راح البس ...يتبع
