احببتها... ولكن؟؟
يقال النجاة في الصدق وما قرأت اصدق من هذه المقولة كلشي يكون واضح وصريح بالبداية احسن من الواحد ينصدم بالنهاية لان مو كل شخص ممكن يسامح ويعدي....
اتركم ويا ابطال القصة....
تحياتي... #ريم العبيدي
محمد..مرحبا اني محمد طالب كلية الطب مرحلة ثالثة متفوق بمرحلتي ومن الاوائل عندي اخوية اكبر مني موظف ومزوج وعنده اطفال ثنين وخواتي ثنين اصغر مني والدي متقاعد والدتي ربة بيت حالتنا ع كدنا والحمد لله بس اكو مشكلة وحدة الي هي عقدة حياتي ارجع بالزمن 5 سنين جان يوم عادي مثل كل يوم امتحانات نص السنه وباردة واني لازم ادرس بغرفتي وهدوء ردت اعلك الصوبة مبيها نفط رحت دا اترسها واني حيل مستعجل بس اريد الحك ع المادة وخليت بدل النفط بانزين بس شغلت الجداحة وانفجرت علية الصوبه ما اكدر اوصفلكم الالم الي حسيته والي عشته جانت ايام اتمنى امحيها من ذاكرتي درجه الحرق الثالثه والي هي اخطر شي الاطباء اجمعوا على موتي وياريت متت بس عشت وظليت سنة كاملة اتعالج وجهي متأثر بالحرق ابد بس جسمي صار مشوه لدرجة مخيفة بحيث اني بطلت اباوع على روحي بالمراية وتعقدت حيل جنت اني الي اسوي جو بالبيت اضحك واشاقة واسوي مقالب باهلي بس بعد الي صار صرت واحد ثاني نادر ما اضحك من كلبي واذا ضحكت مجاملة بس قررت اتفوق بدراستي واصير طبيب جلدية واعالج التشوهات والحروق لان محد حيحس بمعاناتهم كدي حاولت اكثر من مرة اسوي تجميل بس اهلي مجان عدهم هاي الامكانية...
وبيوم جنت بالكلية جانت الامتحانات النهائية وتعبانين حيل خلصنا اخر امتحان وطالعين من القاعة اخذت صديقي الوحيد حيدر ورحنا نشرب شاي من الكافتريا..
حيدر. .. اوكف محمد دتجي نسرين
محمد... واني اظل اصفن وحدي بالله ضايج اليوم الاسئلة طفرتني كلت نشرب شاي ونطلع اني وانت معاجبني حتى ارجع للبيت
حيدر... على كيفك اخذتني حاصل فاصل ابو دودة هو بس دا انطيها هديتها ونروح
حيدر جان خاطب بنت عمة نسرين وهي مرحلة اولى طب ويانه بيناتهم قصة حب كلش حلوة
محمد... ليش شنو عيد ميلادها
حيدر... لا هيج عجبتني شغلة واخذتها اله مناسبة
محمد... الله يحفظكم لبعض
اجتي نسرين و وياها بنية راح حيدر يمها واني ظليت واكف بصفحة بس البنية الي وياها جذبتني كلش حلوة نازكة محجبة بس مبين حجابها مو مظبوط عيونها عسلي كبار تخبل ظليت بس صافن عليها وهي مبرطمة مبين ممجاوبة بلامتحان بس متجرأت احجي كلمة وياها اني كلش طبعي خجول خاصة بعد الحادثة الي صارتلي احس كل العالم تعرف التشوه الي عندي مع انو اني ابد ما البس شي يبين جسمي ومحد يعرف الي بية حتى حيدر كلش معقد من هاي الشغلة هواي بنات بينو اعاجبهم الي ورادو علاقة لان شكلي حلو وشخصيتي قوية ومتفوق بدرساتي بس اني جنت دائما اصدهم اخاف لا بس تعرف الي بية تعوفني؛؛ راحو من يمنا واني ظليت صافن بيها
حيدر.... ولك وين صافن يلة منشرب شاي
محمد... ها اي هسه اكلك هاي منو الي جانت وياها
حيدر.... صديقتها هاي بنت اخوه لدكتور يحيى
محمد... الله عليك شو مو عكرة مثله
حيدر... شنو عجبتك
محمد... انجب لك... ولو هي ليش الجذب حلوة
حيدر... دير بالك هاي من طرف نسرين وحسب مفهمت منها لا تسوي علاقات ولا ابد وعمها دكتورنا بالسادس يعني روحنا يمه اكعد واسكت
محمد... ديله يابه افتهمنا
رجعت للبيت بالليل بعد مكظيناها دياحة اني وحيدر فرينا بغداد كلها ممصدكين خلصنا الامتحانات وعطلة،،،
اول مطبيت واسمع هلهولة
ام محمد... ككككلللششش شايف خير ومستاهلها
محمد... خير يمة شكو
ام محمد... غير خلصت لامتحانات ياعيني والله متت من يمي اني هلكد متعبت
محمد... ههههه والله يايوم شعندج سوالف
ابو محمد... ها حمودي ع الخير
محمد...اشكرك بابا،، لعد احمد وجهال وين
ام محمد... يمة اخوك اخذ مرته وجهالة وطلعوا يتعشون برا
ودلال بغرفتها
محمد... ماشي اني هم دروح انام بس قبلها ياريت بس شاي يمة وخابري شهد خل تجي وتجيب رهوفه والله شتاقيتلها
ام محمد... والله يمة رادت تجي اليوم بس كتلها خل يرتاح حمادة وباجر تعاي
محمد... ديلة يمة بس جيبيلي الشاي فدوة
رحت لفرفتي بدلت وتمددت اكلب بالفيس بس بالي ويا صديقة نسرين معرف ليش كلش عجبتني جنت دا اتخيل تفاصيل وجها وفاتت دلال
دلال... هلو حمادة هذا الشاي
محمد... شكرا حياتي اكلج شون جاوبتي اريد شدين حيلج لا مثل اختج بس اخذت شهادة السادس زوجت وبطلت
دلال... لا حبيبي لتخاف اذا ماجيب الصيدلة ما ارتاح
محمد.. عفية باختي
دلال... اي غير انت تكتب الراجيته واني انطي دوا
محمد.. ههههه ان شاء الله
دلال... ديلة تصبح على خير
محمد... وانتي من اهلو
مشت الايام وخلصت العطلة بسرعة بس صديقة نسرين مراحت من بالي ردت بس اداوم حتى اشوفها وفعلا اول مداومت شفتها كبالي بالحديقة بس هلمرة جانت فرحانة ودتضحك شكد حلوة ضحكتها معقولة ربي تصير من قسمتي كمت اراقبها باستمرار وعرفت اسمها اميرة وصدك اميرة بمشيتها بنظرتها بشموخها محد يكدر ينطخ بيها خاصة الكل يعرف عمها دكتور يحيى رئيس قسم الطبية
