كنت باركة كنشرب في قهوتي في واحد تيراس بقلب المدينة , نتسنى في صاحبتي جوايه الحداش ونص ديال صباح .. (القهوة في هاذ الوقيتة منها كتسكت الجوع منها كتچهمني باش مناكلش بزاف في الغذا ؛ البنات و ما أدراك ما ما يفعلن من أجل مقاسهن ) ..
ما علينا .. عيني كمشيو مع الغاذي و يرجعو مع الجاي ، حتى طاحو على واحد الولد .. ويا ريت مشافتوش عيني ، في هاذيك اللحظة ، بدا عذاب القلب ،الكبدة ، الدوارة وحتى الچانصة .. أما القشاوش هاذوك منهضروش عليهم !
إنسان وجهو على صورة ملاك ، العينين باهتين فحال شي نمر .. الكتاف عراض مرسومين تقول غ عود ، طولة هي هاذيك و خليوني من التفاصيل ل نقدر ليكم لوضو ، المهم كعب غزال مسقي بالعسل من اللخر .. يتچطططر
هاز صف د الكتوبا واحد فوق لاخر حتى لعنقو .. والثقافة يا سيدي ..
وكل خطوة كخطيها أنا كنتمعن في تفاصيلو ، حتى وقفت ، و معرفتش كدرت حتى لقيت راسي دخلت فيه و تصاطحت معاه حتى الكتوبا تشتو في الأرض ..
أنا : آاااييييييي تشوك پارضو أوزور دليريم !
(سمحليا بزاف ..) و تحنيت بدين نجمع فيهم!
هو: يوك بشي ، بن حليديريم (مكاين والو انا غادي نجمعهم )
وغير جمعت ثلاثة د الكتوبة هزيت فيه راسي بغيت نعطيهم ليه ، جات عيني على عينيه شعري بدا كتطاير ، وبدات أغنية كيونكي توم هي هو زندچي توم هي هو أشكي تو هي هو ( كيفاش دخلت أغنية هندية مع ترجمة تركية ، حد الآن معرفتش ) ..؟؟
بقى كشوفيا ، بادلني نفس الدهشة نفس الاحساس نفس النظرات ..
هو : صاهول (يعطيك الصحة)
أنا: ريجا ايديريم (العفو)
هو: بن .. يحيى (انا يحيى)
أنا: ممنون اولدو ، بن سارا (تشرفت بيك انا سارا)
و مشيت ، وتبعني خذا نمرتي و من هذاك نهار و حنا كنتلاقاو ، شمنك يا حب و شمنك يا رومانسية و الدرب كلو حضر عرسنا ، والذايبة كثر من الطايحة و شمن غميز و شمن تصياد ، بان ليكم غ حبيبي يا المچملات .. واخا ظلووو ، أنا بغيت عينيكم يتكوانساو الفوق فحال باربي ملي ككمليها الحجر .. غ ثبتو يمووووووت عليا و يغير عليا و عينيه يظلو مقابلين عينيا فين كشوفو .. لنغلط و نحطهم على غيرو ! غمزو يا البايرات .. كون منخاف على هيبتي نهار عرسي كون هاذوك جوج زغيبات اللي عاجبينكم نتفهم و نعمر بيهم المخاد .. اللهم احفظ حبيبي من كل عين حاسدة ماسدة لعظلاته !
سارا ، ركزي مع ختك عافاك ، راه مغربي و أجرك ع الله .. سيري دخلي فيه و تشوفي ..
ورجعت بركت ، و عاودت وقفت و مشيت دخلت فيه بلعاني حتى الكتوبا كل واحد فين شدها .. اش جا ميجمعهم ، وفين غاذي تربعي باش تجمعيهم ؟؟ قدامو وراه لهيه ؟؟
أنا: أووووو سمح ليا عافاك !!
هو: العمى ، كيف البچرة غ مدرمة ؟! واش مكتشوفيش قدامك ؟؟
أنا: بچرة ؟ حشاك البهيمة .. و الكتوبة اللي كانو حدايا زدت زوعتهم لهيه برجلي .. وا طوطح جمعهم دبا أ الحصان البري !
هو: كون ما حشمت نجمع ختي بواحد نص .. نوريك حصان بري !
أنا : الى نسميك راجل .. اللي معندو سيدو عندو لالاه !
هو: وا لسان عندك ماضي ..
أنا: لا لسانك تبارك الله ناقصو البريض ! قلتها بالغوات ودخلت في حالة عصبية حتى الغذة الدرقية بداة كتبومبا .. تنفخ و تفش غاذي ننفاجر !
هو: غ بشوية عليك ، ما طرا باس .. غير شاد فيك
أنا: بررررررررردت
وعرض تغذينا مع بعضياتنا ، عاود ليا على حياتو و فهمني باللي الكتوبا اللي كان هاز عمرو حلهم ، كان غاذي بيهم لعند مول الزريعة يبيعهم ليه الكيلو .. ومنك يا ليام تزوجنا وعشنا بيخير .. وباركين أنا وياه في الصالون كنتفرجو حتى شدني الوجع ديال الولادة ..
أنا: هشااااااااام ؛ غ نولد غنولد غنولد
جري يا ماتجري حتى دخلنا لسبيطار وتسرحت في غرفة الولادة ..
هشام: أوف أوف أوف أوف
أنا: واش انت اللي كتولد و لا أنا ؟؟ سكتني كتعصبنييييي
هشام : آااااي ، وبلا عضااااان
صاحبتي نجلاء : سارا ، سارا هيهووووو
فين سارحة
أنا: الللله يا ختي، عتقتيني كنت كنزحم ..
نجلاء: كتزحمي؟! يرا و الباس عليك ، قربي نقايس حرارتك
أنا: آاه صعيب يا ختي زحيم كوعت .. صافي قررت غاذي ناخذ راجل بولادو ، واجد مهني الوقت !
نجلاء : تي علاش كتهضري ؟
أنا: الفالطة ديالك قلت ليك مية مرة طناش هي طناش ، غير كنتعطل على الغذا الجوع كدير فيا حالة؟ كلعب على عقلي حماداموس ، شي نهار ندير في شبابي شي مونتيف ..
وتلفت جيهت الولد ، لقيتو مازال واقف كهضر مع واحد الولد ،ترددت واش نمشي ندخل فيه ولا بلاش .. آش بان ليكم؟؟
#ساروشكا
